ശ്യാമരാധ

മലയുമലയാഴിയും മണിമുത്തമേകുന്ന
മലയാളനാടിന്റെ മാനസപുത്രിയായ്
സുകൃതനിയോഗമാര്‍ന്നെത്തിയകവയിത്രി
സുഗതകുമാരിക്കുനാടിന്റെ വന്ദനം!

Add Kesari Weekly as a preferred source on Google

നന്മകള്‍ നട്ടുനനച്ചുവളര്‍ത്തുവാന്‍
ജന്മംസമര്‍പ്പിച്ചൊരേകാന്തപഥികയായ്
കണ്ണുനീരാറ്റിന്റെ തീരത്തഹര്‍ന്നിശം
കണ്ണിമയ്ക്കാതാര്‍ത്തസഹജര്‍ക്കുതുണയായി
തോണികടത്തുവാനെത്തിയൊരു സ്‌നേഹ-
സത്യവതിക്കെന്റെ നാടിന്റെ വന്ദനം!

ഏതിരുള്‍ക്കാടും തെളിക്കുവാനുള്ളിലെ
തീയില്‍ ജ്വലിപ്പിച്ചപന്തവുമായല-
ഞ്ഞീടാര്‍ന്ന സൗഹൃദം പങ്കിട്ടുനല്‍കിയ
കാവല്‍മാലാഖയ്ക്കുസ്‌നേഹാഭിവന്ദനം!

നീതിനിഷേധങ്ങള്‍, ചൂഷണങ്ങള്‍കൊണ്ടു-
ജീവിതത്തിന്റെ കൊടിപ്പടംനീര്‍ത്തുവാ-
നാവാതനാഥമായ്ത്തീര്‍ന്നസമൂഹത്തി-
നാത്മാവു നല്‍കിയൊരുഭയയ്ക്കുവന്ദനം!

പൂവും പുഴയും കിളിയും മരങ്ങളും
മാനും മയിലും മരതകപ്പച്ചയും
മാനസവൃന്ദാവനത്തില്‍ നിറച്ചതാം
ശ്യാമരാധയ്ക്കാദരാന്വിതവന്ദനം!

കനിവിന്റെ നീരുറവയായൊലിച്ചെത്തുന്ന
കവിതയുടെ കല്‍ഹാരതീര്‍ത്ഥോദകംപകര്‍-
ന്നൊരുജനപദത്തിന്റെ, ഭാഷയുടെ, സംസ്‌കാര-
ഹൃദയാധിദേവതയ്ക്കാത്മാര്‍ത്ഥവന്ദനം.

വന്ദനംകൊണ്ടീക്കടം തീരുമോ, ധര്‍മ്മ-
സങ്കടം സാന്ത്വനം കൊണ്ടലിഞ്ഞീടുമോ
എങ്കിലും വാക്കുകളാകുന്ന നെയ്ത്തിരി
കൊണ്ടുഴുഞ്ഞീടുമ്പൊളന്തക്കരണത്തി
ലെന്തൊരുശാന്തി, ആ ശാന്തി മന്ത്രം ആത്മ-
സംഗീതമായ്‌പ്പെയ്ത പ്രതിഭയ്ക്കുവന്ദനം…!