No products in the cart.
Add Kesari Weekly as a preferred source on Google
വിടപറയാനാകാതെ
മരണമരികില് വന്നെത്തി വിളിക്കുന്നു
വരിക, സഹജരെ പിരിയേണ്ട നേരമായ്.
ചിറകടിച്ചുയിരുലയും മുഹൂര്ത്തമായ്
പുറകിലൊന്നായൊടുങ്ങിടുന്നാരവം.
ശരികള് തെറ്റുകളിഴകോര്ത്ത ജീവിത-
സരണിയില് പൂത്തുലഞ്ഞ സ്വപ്നങ്ങളും
അരികില് സ്നേഹവായ്പാവോളമേന്തിയോര്
വരിയുമാശ്ലേഷമാവേശമേറ്റിയോര്.
മുറകള് തെറ്റുന്നുണ്ടറിവിന്റെ ജാലകം
മറകള് മാറ്റിക്കുതിക്കുന്നുണ്ടാരവം.
അരുതുകള്ക്കകം പൊലിയുന്ന സ്വപ്നവും
ഉരുകി ഉലകളില് തെളിയുന്ന ചിന്തകള്.
കുരുതി നല്കാന് മടിക്കാത്ത പോരിടം
കരുതലായ് കരുത്താര്ജ്ജിച്ചുയര്ന്നുപോ.
കലവറകളില് നിറവായ് നിറഞ്ഞതാം
നിലവറകള് കുമിഞ്ഞ സമ്പത്തുകള്
അതിവിചിത്രമാം ആവേശമാര്ന്നതാം
അതിരുതാണ്ടികുതിച്ച വേഗങ്ങളില്
വലയെറിഞ്ഞകം പിടയുന്ന കാഴ്ചകള്
ശില സമാനമായ് ഘോഷിച്ച നാളുകള്.
പതിരു ചേറ്റിപ്പറകള് നിറച്ചിടും
കതിരു നിറയും കലവറക്കാഴ്ചകള്
വിളിവരുന്നൊരു നാളിന്നപൂര്വ്വമാം
തെളിമചാര്ത്തിപ്പടര്ന്നെത്തുമോര്മ്മകള്
നിളയിലമ്പിളി തെളിയുന്നിളക്കമായ്
ഒളിയിലോളങ്ങളുണരും മുഹൂര്ത്തമായ്.
വരവുമേകനായ് പിരിയുന്നേകനായ്
തിരകള് നിരയായിത്തഴുകും സമീരനായ്.
വഴികള് പിരിയുന്ന കവലക്കുരുക്കിലായ്
ഇഴയുമാവേഗ സഞ്ചാരമെന്നതായ്.
തുള്ളികള് വീണൊരു തോണിയിലേകനായ്
ഇളകുമലകളിലലയുന്ന നാളുകള്
വിധിവിചിത്രമാം വേറിട്ട പാതയില്
നിധികള് തേടിത്തുലയുന്ന നാളുകള്
പിടിതരാതോടി മറയുമജ്ഞാതരാം
മടിയരായ് നുകം പേറുന്നനന്തമായ്
മതിവരാത്തൊരീ വസുധൈകബന്ധനം
അതിവിചിത്രമായ് നാളെണ്ണിയാത്രകള്
വഴികളടയുന്നടവിയിലനുദിനം
പഴികള് കേള്ക്കേ വിതുമ്പുന്നനുചരര്.
മരണമരികില് വന്നെത്തി വിളിക്കുന്നു
തരിക വിടയിന്നു പിരിയുവാന് നേരമായ്!
ADVERTISEMENT
Latest
