നിളാനദിക്കരയിൽ

മാഘം മാധവശോഭയോടെ നിളയില്‍
പൂജയ്‌ക്കൊരുങ്ങുന്നു; പൂ-
ത്താലം കൈകളിലേന്തിനിന്നു വരവേല്‍
ക്കുന്നുണ്ടുഷസ്സന്ധ്യയാള്‍!
വേദംകേട്ടുടനോടിയെത്തി കിളികള്‍
സ്‌തോത്രങ്ങള്‍ പാടുന്നു; വെണ്‍ –
ശംഖം നാമമുരുക്കഴിപ്പു മകനേ,
നാവാമുകുന്ദാശ്രമേ!

Add Kesari Weekly as a preferred source on Google

തീര്‍ത്ഥം കൈയിലെടുത്തു, ഭക്തിഭരിതം
ഗായത്രിചൊല്ലുന്നിതാ!
പ്രാര്‍ത്ഥിപ്പൂ ജനസഞ്ചയം; വരബലം
തേടുന്നു സന്യാസിമാര്‍!
ധര്‍മ്മം കാലടിതെറ്റിവീണു മരുഭൂ
വായ്ത്തീര്‍ന്ന ചിത്തങ്ങള്‍തന്‍-
മര്‍മ്മംതൊട്ടുഴിയുന്ന കാഴ്ച സുത!
നീ കണ്ടാലുമത്യുത്സുകം!

എങ്ങും മംഗളവാദ്യഘോഷമകിലിന്‍
ഗന്ധം, മണല്‍ത്തിട്ടമേല്‍-
പ്പൊങ്ങും നാമജപങ്ങള്‍, മന്ത്രമുണരും
ഹൃത്താമരപ്പൊയ്കകള്‍!
തിങ്ങും മാനവസഞ്ചയങ്ങളമൃത
സ്‌നാനത്തിനെത്തുന്നു, ഹാ!
മങ്ങും ദീപശിഖയ്ക്കു നല്ലനറുനെയ്
തൂവുന്നു സന്ധ്യാര്‍ച്ചന!

ADVERTISEMENT

ജ്ഞാനാബ്ധിക്കകമേയടിഞ്ഞ നവമാം
വെണ്‍ശംഖെടുത്തിട്ടൊരാള്‍
സ്ഫീതാനന്ദമരന്ദഗംഗയൊഴുകും
പുണ്യസ്ഥലത്തേകനായ്
ധ്യാനിക്കുന്നു;യുഗങ്ങള്‍താണ്ടിയവിടേ
ക്കെത്തുന്നു സപ്തര്‍ഷിമാര്‍
വല്മീകങ്ങളിടിഞ്ഞുവീണു സുകൃതം
പെയ്യും നികുഞ്ജങ്ങളില്‍!

പാറും കാവിപതാകകള്‍ക്കു പറയാ
നുണ്ടേറെയീ മണ്ണില്‍, തീ-
പാറും ഖഡ്ഗമുനയ്ക്കുമുന്നിലടരാ
ടാന്‍നിന്ന സദ്ഗാഥകള്‍!
പായും നീരദപംക്തിപോല്‍ മറയുവാന്‍
വെമ്പുന്നൊരോര്‍മ്മയ്ക്കു നല്‍-
പ്പാടീരാമൃതസാരമേകുമിനിയും
തീരങ്ങളെന്നോമലേ!

വെണ്‍കൊറ്റക്കുടകള്‍ക്കുതാഴെ രജനീ
തല്പത്തിലെന്നും മഹാ-
വിദ്യുത്ക്കാന്തിതരംഗമാലസമമായ്
കാണുന്നു ദീപാരതി!
ശംഖിന്‍നാദമുയര്‍ന്നുകേള്‍പ്പു; നികടേ
വെഞ്ചാമരം വീശിപോല്‍
മാമാങ്കസ്മൃതിയില്‍ക്കുളിച്ചു നനവോലും കാറ്റുമന്ത്രാന്വിതം!

സംഗീതം മധുചന്ദ്രികാസദൃശമായ്
പാലാഴിതീര്‍ക്കുന്നു; വിണ്‍-
ഗംഗാതീരമൊരാരതിക്കു മകനേ,
ദീപം കൊളുത്തുന്നിതാ!
ശങ്കോപേതമകന്നുനിന്ന മനമെ
ല്ലാമൊറ്റലക്ഷ്യത്തിനാ-
യംഗോപാംഗമണച്ചിടുന്നു
വിരവോടദ്വൈതസാരങ്ങളെ!

രാവിന്‍തുംഗഹിമാലയത്തിലുയരും
തീജ്വാലകള്‍ക്കായ് ഹവി-
സ്സേന്തും കൈകളുമായഘോരി നടനം
ചെയ്യുന്നു കുഞ്ജങ്ങളില്‍!
താരാനായകശേഖരന്റെ പദതാര്‍
മൂടുന്നു പുഷ്പങ്ങളാ-
ലീയാറ്റിന്‍കര വീണ്ടുമിന്നു മകുടം
ചാര്‍ത്തിക്കയായ് ധാത്രിയെ!

ബ്രഹ്മാവിഷ്ണു മഹേശ്വരാദി വിബുധേ
ന്ദ്രന്മാരിരിക്കുന്നതിന്‍-
മദ്ധ്യേ ശ്രീപരമേശ്വരിക്കുനിജമാ
മാസ്ഥാനമാകുന്നിടം
ബ്രഹ്മാനന്ദസുധാരസത്തിലമരും
മാഘോത്സവത്തിന്നക-
ത്തെങ്ങാന്‍ മണ്‍തരിയായ് പിറക്കുകിലതിന്‍
മേലെന്തു പുണ്യോദയം!

വാനം കാവിപുതച്ചുനില്‍പ്പു; നിശതന്‍
വാതില്‍പ്പടിക്കിപ്പുറം
നാണംപൂണ്ടു കുണുങ്ങിനില്‍പ്പു നിറവേറും
മുഗ്ദ്ധസന്ധ്യാംഗന!
ധ്യാനംനിര്‍ത്തി, തപോവനത്തില്‍ മുനിമാ
രാഹൂതി ചെയ്യുന്നു; ഹൃത്-
ഗാനംമൂളി വിലോലതന്ത്രി നിതരാം
മീട്ടുന്നു നാമെന്തിനോ!