അക്കരപ്പച്ച

ഇക്കരെ മേയും പയ്യിനു തോന്നി
അക്കരയല്ലോ കേമം
പാറിയണഞ്ഞൊരു പരുന്തു ചൊല്ലീ
പയ്യേ, അക്കരനല്ലൂ.

പച്ചപ്പുല്ലുപരക്കേയുണ്ട്
പച്ച മരത്തണലുണ്ട്
തഴുകിയുറക്കാന്‍ കുളിര്‍ കാറ്റുണ്ട്
തെളിനീരുറവകളുണ്ട്
ചങ്ങാത്തത്തിനു മാനും മയിലും
മഞ്ഞക്കിളികളുമുണ്ട്….

പയ്യതു കേട്ടു ഗമിച്ചൂ വേഗം
പരുന്തു മുന്നേ പാറി
പാടം താണ്ടി മേടുകള്‍ താണ്ടി
തോടിന്നക്കര പൂകി

അക്കരെ ചെന്നൊരു പയ്യിന്നുള്ളം
തീക്കനല്‍ പോലെ തപിച്ചു
പുല്ലില്ലവിടെ പൂമരമില്ല
കല്ലും കാരച്ചെടിയും
തെളിനീരില്ല വരണ്ട മണ്ണില്‍
തേളുകളും ചെറു പാമ്പും
കുറ്റിക്കാട്ടില്‍ മറഞ്ഞിരിക്കും
കുറുക്കനോരി മുഴക്കി
ചീറ്റും പാമ്പുകള്‍ ചുറ്റും കൂടി
കൊത്താന്‍പത്തി വിടര്‍ത്തി
മുള്ളു മരത്തിന്‍ കൂട്ടിലിരിപ്പൂ
മോഹിപ്പിച്ച പരുന്ത്…..

അക്കരെ നില്‍ക്കും പയ്യറിയുന്നു
തന്‍ കര തന്നെ കേമം!