അച്ചടക്കം സഹജസ്വഭാവമാകണം

അച്ചടക്കം സ്വയംസേവകന്റെ സ്വാഭാവികമായ അവസ്ഥയായി മാറണം എന്ന് സംഘം ആഗ്രഹിക്കുന്നു. ഈ സാഹചര്യത്തില്‍ ബാഹ്യമായ നിയന്ത്രണമോ നിര്‍ദ്ദേശമോ കൂടാതെ തന്നെ അച്ചടക്കം പാലിക്കുക എന്നത് സ്വയംസേവകന്റെ സഹജസ്വഭാവമായിത്തീരണം എന്നതാണ് സംഘത്തിന്റെ ഉദ്ദേശ്യം. ഈ അച്ചടക്കം സംഘടനാ കാര്യത്തില്‍ മാത്രമല്ല, വ്യക്തിജീവിതത്തിലും സാമൂഹ്യജീവിതത്തിലും സ്വയംസേവകന്‍ നിര്‍ബന്ധമായും പാലിക്കണം!

Add Kesari Weekly as a preferred source on Google

ബാരാബങ്കിയില്‍ പരംപൂജനീയ ശ്രീ ഗുരുജിയുടെ ബൗദ്ധിക് വര്‍ഗ് നടക്കുന്നു. ആ അവസരത്തില്‍ വര്‍ഗില്‍ പങ്കെടുത്ത ഒരു സ്വയംസേവകന്‍ കടലാസും പെന്‍സിലും കൊണ്ട് ശ്രീ ഗുരുജിയുടെ ചിത്രം വരയ്ക്കാന്‍ തുടങ്ങി. ബൗദ്ധിക് പൂര്‍ത്തിയാവുമ്പോഴേക്ക്, മൈക്കിന്റെ മുമ്പില്‍ നിന്ന് ശ്രീ ഗുരുജി ബൗദ്ധിക് നടത്തുന്ന ചിത്രം ആ സ്വയംസേവകന്‍ ഭംഗിയായി വരച്ചു.

ബൗദ്ധിക് വര്‍ഗിനുശേഷം, ആ സ്വയംസേവകന്‍ മാന്യ രജ്ജുഭയ്യയെ സമീപിച്ച് ആ ചിത്രത്തില്‍ ശ്രീഗുരുജിയുടെ കയ്യൊപ്പ് വാങ്ങാനുള്ള തന്റെ ആഗ്രഹം അറിയിച്ചു. രജ്ജുഭയ്യ ആ സ്വയംസേവകനേയും കൂട്ടി ശ്രീ ഗുരുജിയുടെ അടുത്തേക്ക് ചെന്നു. ആ ചിത്രം കണ്ട ശ്രീ ഗുരുജി ആ സ്വയംസേവകനോടു ചോദിച്ചു: ”നിങ്ങള്‍ കേവലം ചിത്രകാരന്‍ മാത്രമാണോ, അതോ സ്വയംസേവകന്‍ കൂടിയാണോ?” ”ഞാന്‍ സ്വയംസേവകനാണ്; ദിവസവും ശാഖയില്‍ പോകാറുണ്ട്” സ്വയംസേവകന്റെ മറുപടി. ശ്രീ ഗുരുജി ഉടനെ പറഞ്ഞു: ”ഞാന്‍ എന്റെ സമ്പൂര്‍ണ ശക്തിയുമുപയോഗിച്ച് എന്റെ ഹൃദയഭാവങ്ങളെ വാക്കുകളിലൂടെ വ്യക്തമാക്കിക്കൊണ്ടിരുന്ന നേരത്ത് അതില്‍ ശ്രദ്ധിക്കാതെ നിങ്ങള്‍ ചിത്രരചനയാണ് നടത്തിയത്. ആ സമയം അതിനുള്ളതായിരുന്നില്ല. നിങ്ങള്‍ സ്വയംസേവകനാണെന്ന് പറയുന്നതെങ്ങനെ?”