പള്ളി പുനര്‍നിര്‍മ്മാണം മാറ്റത്തിന്റെ സൂചന

ജമ്മുകാശ്മീരിലെ 370-ാം വകുപ്പ് നീക്കം ചെയ്തപ്പോള്‍ വലിയ വിപത്ത് സംഭവിച്ചു എന്നായിരുന്നു ചിലരുടെ പ്രചരണം. എന്നാല്‍ ഈ പ്രദേശത്തെ വികസനവും ചരിത്രപരമായ സ്മാരകങ്ങളുടെ പുനരുദ്ധാരണവും ഒക്കെയായി വികസനം യാഥാര്‍ത്ഥ്യമാകുന്നു എന്ന് കാണുമ്പോള്‍ അവരുടെ വായടയുകയാണ്. ശ്രീനഗറിലെ ഡെല്‍റ്റാ ഗേറ്റില്‍ ശങ്കരാചാര്യ കുന്നിന്‍ താഴെയുള്ള സെന്റ് ലൂക്ക്‌സ് ക്രിസ്ത്യന്‍ പള്ളിയുടെ പുനരുദ്ധാരണം അതിന്റെ സൂചനയാണ്. അവഗണനയില്‍ നാശോന്മുഖമായി കിടക്കുകയായിരുന്ന ഈ പള്ളി പുനര്‍നിര്‍മ്മിച്ച് ഈ ക്രിസ്തുമസ് വേളയില്‍ പ്രാര്‍ത്ഥനയ്ക്കായി തുറന്നുകൊടുത്തു. പൈതൃക സംരക്ഷണ പദ്ധതിയുടെ ഭാഗമായി പ്രമുഖ മതസ്ഥാപനങ്ങള്‍ പുനരുദ്ധരിക്കുന്ന കൂട്ടത്തിലാണ് ഈ പള്ളി പുനര്‍നിര്‍മ്മിച്ചത്. 70 ലക്ഷം രൂപയാണ് പുനര്‍നിര്‍മ്മാണത്തിന് ചെലവായത്. 35 വര്‍ഷമായി ആരാധന നടക്കുന്നില്ല. പിന്നീട് പള്ളി അവഗണനയില്‍ ആവുകയും മേല്‍ക്കൂര ചോര്‍ന്നൊലിക്കാന്‍ തുടങ്ങുകയും ചെയ്തു. ഇതേ അവസ്ഥയില്‍ ആയിരുന്നു ജമ്മുകാശ്മീരിലെ പല ക്ഷേത്രങ്ങളുടെയും സ്ഥിതി. ഇതൊന്നും പരിശോധിക്കാന്‍ അവിടുത്തെ ‘മതേതര’ സര്‍ക്കാരുകള്‍ക്ക് സമയമുണ്ടായിരുന്നില്ല.

ഇന്ന് തീവ്രവാദികളെ നേരിടാനും കാശ്മീരിന്റെ പൈതൃക സംരക്ഷണത്തിനും സര്‍ക്കാര്‍ പ്രതിജ്ഞാബദ്ധമാണ്. ടൂറിസം വികസന വകുപ്പാണ് ഈ പദ്ധതിക്ക് ചുക്കാന്‍ പിടിക്കുന്നത്. ഓരോ ആരാധനാലയവും അവയുടെ പൈതൃക സ്വഭാവം നിലനിര്‍ത്തിക്കൊണ്ടാണ് പുനര്‍നിര്‍മ്മിക്കുന്നത്. വിനോദസഞ്ചാരം മുഖ്യ വരുമാന മാര്‍ഗ്ഗമായ ജമ്മുകാശ്മീര്‍ പ്രദേശങ്ങളില്‍ വികസനത്തിനുള്ള പ്രതിബന്ധം മുസ്ലിം ഭീകരവാദമാണ്. ജനങ്ങള്‍ ഇത് തിരിച്ചറിയുകയും ഭീകരവാദത്തെ നേരിടാന്‍ സര്‍ക്കാറിനൊപ്പം നില്‍ക്കുകയും ചെയ്യുന്നു. അതിനാല്‍ ഈ പ്രദേശത്ത് മുസ്ലിം തീവ്രവാദത്തെ നേരിടാന്‍ സര്‍ക്കാരിനും സാധിക്കുന്നു. ഇത് വലിയ മാറ്റത്തിന്റെ ലക്ഷണമാണ്.