വീരഭദ്രാസനം (യോഗപദ്ധതി 52)

വീരഭദ്രാസനത്തിന്റെ ഒരു വൈവിധ്യമാണ് ഇവിടെ വരുന്നത്. ശിവഭൂതഗണങ്ങളുടെ നായകനായ വീരഭദ്രസ്വാമി ക്രോധത്തിന്റെയും ഭക്തിയുടെയും പര്യായമാണ്. ഈ ശിവഭക്തന്‍ ശിവന് നേരിട്ട അപമാനത്തില്‍ ക്രോധിയായ ശിവന്റെ ജടയില്‍ നിന്നുല്‍ഭവിച്ചവനാണ്. ശിവനെ അപമാനിച്ചതിന് ദക്ഷപ്രജാപതിയോട് പ്രതികാരം ചെയ്യുന്നു, വീരഭദ്രന്‍.

Add Kesari Weekly as a preferred source on Google

ചെയ്യുന്ന വിധം
കാലുകള്‍ ചേര്‍ത്ത് നിവര്‍ന്നു നില്ക്കുക. ശ്വാസമെടുത്തുകൊണ്ട് ചാടി രണ്ടു കാലുകളും 4 അടി അകത്തുക. രണ്ടു കൈകളും വശങ്ങളിലൂടെ മുട്ടുമടങ്ങാതെ ഭൂമിക്കു സമാന്തരമായി ഉയര്‍ത്തുക. കൈപ്പത്തികള്‍ താഴോട്ട് മുഖമായി. ശ്വാസം വിട്ടുകൊണ്ട് വലത്തോട്ടു തിരിയുക. വലതു കാല്‍പ്പത്തി 90 ഡിഗ്രി തിരിക്കുക. ഇടതു കാല്‍പത്തി 10 ഡിഗ്രിയും. വലതു കാല്‍മുട്ടു മടക്കി വലതു തുട ഭൂമിക്കു സമാന്തരമാവും വിധം മുന്നോട്ടായുക. വലതു ജംഘാസ്ഥി ഭൂമിക്കു ലംബം. വലതു കാല്‍ മുട്ടില്‍ 90 ഡിഗ്രി കോണ്‍. ഇടതുകാല്‍ മുട്ടു മടങ്ങാതെ വലിഞ്ഞിരിക്കും. വലതു കൈയില്‍ ദൃഷ്ടിയുറപ്പിക്കുക. ദേഹം മുഴുവന്‍ വലിഞ്ഞിരിക്കും. കൈകള്‍ രണ്ടാളുകള്‍ രണ്ടറ്റത്തു നിന്നും വലിക്കുന്നതു പോലെ വലിഞ്ഞിരിക്കും.

സാധാരണ ശ്വാസത്തില്‍ 20 സെക്കന്റ് നിന്ന ശേഷം തിരിച്ചു വരിക. ഇടതു ഭാഗം ആവര്‍ത്തിക്കുക.

ADVERTISEMENT

ഗുണങ്ങള്‍
നെഞ്ചിന് വികാസം കിട്ടുന്നതിനാല്‍ ദീര്‍ഘശ്വാസത്തെ സഹായിക്കും. ചുമലിനും നട്ടെല്ലിനും കഴുത്തിനും വലിവും വഴക്കവും ലഭിക്കും. കാലിലെ പേശികള്‍ക്കും ആയാസം കിട്ടും.