No products in the cart.
Add Kesari Weekly as a preferred source on Google
ഇടത്-വലത് വീടിന്റെ ഐശ്വര്യം പോറ്റി തന്നെ !
മണ്ഡലമാസ വ്രതം കഴിഞ്ഞതോടെ അമ്പലങ്ങളിലെ ശരണം വിളിയും ഭജനയുമൊക്കെ കുറഞ്ഞുകൊണ്ടിരിക്കയാണെങ്കിലും ഏ.കെ.ജി സെന്ററുകളിലും ഇന്ദിരാ ഭവനങ്ങളിലും പാരഡി കീര്ത്തനങ്ങള് ദിവസം കഴിയും തോറും ഊര്ജ്ജിതമായിവരികയാണ്. കോണ്ഗ്രസ് ആപ്പീസുകളില് നിന്ന് ഉയരുന്നത് ‘പോറ്റിയേ കേറ്റിയേ’ ആണെങ്കില് മാര്ക്സിസ്റ്റ് പാര്ട്ടി ഓഫീസില് നിന്ന് കേള്ക്കുന്നത് ‘ആദ്യം കേറ്റിയത് നിങ്ങളല്ലേ? കൂടെ പോയത് പ്രകാശനല്ലേ?’ എന്ന മുദ്രാവാക്യ രൂപത്തിലുള്ള പാരഡിയാണ്. പത്രസമ്മേളനത്തിനു മുമ്പ് ഈ പാരഡി പാടിയാലേ കോണ്ഗ്രസ്സിന്റെ ദേശീയ നേതാക്കള്ക്കു വരെ ഊര്ജം കിട്ടൂ. മുഖ്യമന്ത്രിക്കും മണിക്കൂര് നീണ്ട പത്രസമ്മേളനത്തില് ഉഷാര് കിട്ടാന് വെള്ളം കുടിച്ചാല് മാത്രം പോര, പുതിയ പാരഡി മുദ്രാവാക്യം കൂടി വിളിക്കണം. ഇരു മുന്നണി നേതാക്കളും ‘ഈ വീടിന്റെ ഐശ്വര്യം ഉണ്ണികൃഷ്ണന് പോറ്റി’ എന്ന് പാര്ട്ടി ഓഫീസില് എഴുതിവെച്ചോ എന്നറിയില്ല.
ശബരിമലയില് നിന്ന് നഷ്ടപ്പെട്ട വിശിഷ്ട വസ്തുക്കളുടെ കണക്കാണ് ഓരോ ദിവസവും പുറത്തുവരുന്നത്. ഇതൊക്കെ ഏതു ഗോഡൗണിലേക്കാണ് പോയത് എന്നു എസ്.ഐ.ടിക്ക് അറിയില്ല. മോഹവിലയുള്ള പുരാവസ്തു മാര്ക്കറ്റിലേക്ക് ഇത് പോയി എന്നാണ് രമേശ് ചെന്നിത്തല പറഞ്ഞത്. വിജയന് സഖാവിന്റെ സ്വന്തക്കാരനായ മോണ്സണ് മാവുങ്കല് പീഡനക്കേസ്സില് അകത്തായതിനാലാവാം ഡിണ്ടിക്കല് മണി ഇടനിലക്കാരനായത്. ആ കച്ചവടത്തിനിടക്ക് പോറ്റി എന്തിന് അടൂര് പ്രകാശിനേയും ആന്റോ ആന്റണിയെയും കൂട്ടി സോണിയയെ കാണാന് പോയി എന്നാണ് വിജയന് സഖാവ് ചോദിക്കുന്നത്? അതിന് കോണ്ഗ്രസ് നേതാക്കള്ക്ക് ഉത്തരമില്ല. സോണിയയുടെ സഹോദരിക്ക് ഇറ്റലിയില് വന് പുരാവസ്തു കച്ചവടമുണ്ട് എന്നാണ് വാര്ത്ത. പോറ്റി തങ്ങളുടെ ഡീല് ഒഴിവാക്കി സോണിയയുമായി പുതിയ ഡീല് ഉണ്ടാക്കിയോ എന്ന് സഖാവിന് അറിയണം. വിജയന് സഖാവും സതീശനും കൊള്ള മുതലില് കണ്ണുവെച്ച് ചക്കളത്തിപോരു കളിക്കുന്നു; കഥയറിയാതെ മലയാളി ആട്ടം കാണുന്നു.
ADVERTISEMENT
Latest
