ബംഗ്ലാദേശിന് വലുത് ദേശസുരക്ഷ; ഇവിടെ വലുത് റോഹിങ്ക്യൻ സുരക്ഷ!
ശാകല്യൻ
നമ്മുടെ തൊട്ടയല്‍പക്കത്തെ ഇസ്ലാമിക രാജ്യങ്ങള്‍ക്കുപോലും സ്വന്തം രാജ്യത്തിന്റെ സുരക്ഷയേക്കാള്‍ വലുതല്ല റോഹിങ്ക്യന്‍ മുസ്ലിങ്ങളുടെ സംരക്ഷണം. എന്നാല്‍ റോഹിങ്ക്യന്‍ മുസ്ലിങ്ങളെ ഭാരതം സംരക്ഷിച്ചേ പറ്റൂ എന്ന വാശിയിലാണ് ഇവിടുത്തെ മനുഷ്യാവകാശ വാദികളും അവരുടെ അന്നദാതാക്കളായ ഇസ്ലാമിസ്റ്റുകളും. ദേശസുരക്ഷ മുന്‍നിര്‍ത്തി കേന്ദ്ര സര്‍ക്കാര്‍ റോഹിങ്ക്യകളെ പുറത്താക്കാന്‍ നടപടി സ്വീകരിച്ചപ്പോള്‍ ദേശസുരക്ഷ അപകടത്തിലായാലും ശരി റോഹിങ്ക്യന്‍ മുസ്ലിങ്ങളെ സംരക്ഷിച്ചേ പറ്റൂ എന്ന് വാദിച്ചുകൊണ്ട് അവര്‍ സുപ്രീം കോടതി വരെ പോയി യുദ്ധം ചെയ്തു. പ്രശാന്ത് ഭൂഷണും കോളിന്‍ ഗോണ്‍ഗ്ലേവിയസുമാണ് ഇവരുടെ വക്കാലത്ത് എടുത്തത്. ലോകത്തിലുള്ള മുഴുവന്‍ അഭയാര്‍ത്ഥികള്‍ക്കും താമസിക്കാന്‍ ഭാരതം ധര്‍മ്മശാലയാണോ എന്ന് ഒരു എല്‍.ടി.ടി.ഇക്കാരന്റെ കേസില്‍ ചോദിച്ച സുപ്രീം കോടതി റോഹിങ്ക്യക്കാരെ പുറത്താക്കണം എന്നു പ്രശാന്ത് ഭൂഷണ്‍ വാദിച്ച കേസില്‍ തീര്‍ത്തു പറഞ്ഞു. റോഹിങ്ക്യക്കാരെ ഭാരതം കടലില്‍ തള്ളി എന്ന പരാതിയുമായി ഗോണ്‍ഗ്ലേവിയസ് എത്തിയപ്പോള്‍ കോടതി തെളിവു ഹാജരാക്കാന്‍ ആവശ്യപ്പെട് മടക്കിവിട്ടു. ഇതോടെ തങ്ങളുടെ അജണ്ട പൊളിഞ്ഞതില്‍ സങ്കടപ്പെട്ടു നില്‍ക്കുമ്പോഴാണ് നമ്മുടെ തൊട്ടടുത്ത മുസ്ലിം രാജ്യമായ ബംഗ്ലാദേശില്‍ നിന്ന് അവര്‍ക്ക് ഹൃദയം പിളര്‍ത്തുന്ന ഒരു വാര്‍ത്ത കിട്ടിയത്. റോഹിങ്ക്യന്‍ മുസ്ലിങ്ങള്‍ക്ക് തങ്ങളുടെ മണ്ണായ മ്യാന്‍മറിലെ റഖ്യാന്‍ പ്രദേശത്തേക്ക് പോകുന്നതിന് ഐക്യരാഷ്ട്രസഭ നിര്‍ദ്ദേശിച്ച ബംഗ്ലാദേശിലൂടെയുളള ‘മാനുഷിക ഇടനാഴി’ അനുവദിച്ചു കൊടുക്കാന്‍ അവിടുത്തെ മുഹമ്മദ് യൂനൂസ് സര്‍ക്കാര്‍ എടുത്ത തീരുമാനത്തിനെതിരെ പട്ടാളം ശക്തമായി രംഗത്തുവന്നു എന്നതാണാ വാര്‍ത്ത. ഈ ഇടനാഴി ബംഗ്ലാദേശിന്റെ ദേശീയ സുരക്ഷക്ക് ദോഷകരമാകും എന്നാണ് പട്ടാളം പറയുന്നത്. ജമാ അത്തെ ഇസ്ലാമിയാണ് റോഹിങ്ക്യന്‍ ഇടനാഴിയുടെ സൂത്രധാരന്മാരെങ്കിലും പട്ടാളം എതിര്‍ത്താല്‍ ബംഗ്ലാദേശില്‍ ഒന്നും നടക്കില്ല.
1947-ലെ വിഭജനത്തെ തുടര്‍ന്ന് ഇസ്ലാമിക സ്വര്‍ഗ്ഗം എന്ന വലിയ പ്രതീക്ഷയോടെ ഭാരതത്തില്‍ നിന്നും പാകിസ്ഥാനിലെ പഞ്ചാബിലേക്ക് കുടിയേറിയ മുജാഹിര്‍ വിഭാഗം മുസ്ലിങ്ങള്‍ അവിടെ ഇപ്പോഴും രണ്ടാംകിട പൗരന്മാരാണ്. പാകിസ്ഥാനുവേണ്ടി വോട്ടു ചെയ്ത അവര്‍ ഹിന്ദുസ്ഥാനികള്‍ എന്ന പരിഹാസവും സഹിച്ച് കഴിഞ്ഞു കൂടുന്നു. വിദ്യാഭാസത്തിലും തൊഴിലിലും വിവേചനം നേരിടുന്ന അവരുടെ നിലനില്‍പുതന്നെ ഭീഷണിയിലാണ്. പ്രശാന്ത് ഭൂഷണെ പോലുള്ള മനുഷ്യാവകാശ വാദക്കാര്‍ ആദ്യം അവരുടെ വക്കാലത്തെടുക്കട്ടെ, എന്നിട്ടുപോരേ റോഹിങ്ക്യക്കാര്‍ക്കായി വാദിക്കുന്നത്?
Latest
