ചെറുധാന്യങ്ങള്‍ ശീലമാക്കാം ആരോഗ്യം സംരക്ഷിക്കാം

അമിതവണ്ണം കുറയ്ക്കാനും രോഗ പ്രതിരോധശേഷി കൂട്ടാനും മില്ലറ്റ്‌സ് ശീലമാക്കാം. ഇവ പോഷകങ്ങളുടെ കലവറയാണ്, സമീകൃതാഹാരത്തിന്റെ സമ്പന്നമായ ഉറവിടമാണ്. ഭാരതത്തില്‍ പല ഇനത്തില്‍പ്പെട്ട മില്ലറ്റുകള്‍ പരമ്പരാഗതമായി കൃഷി ചെയ്തുവരുന്നു, ദേശീയ ധാന്യമായി ഉപയോഗിച്ചു വരുകയും ചെയ്യുന്നു. ഐക്യരാഷ്ട്രസഭ 2023 നെ അന്താരാഷ്ട്ര ചെറുധാന്യ വര്‍ഷമായി പ്രഖ്യാപിക്കുകയും ചെയ്തു.

മില്ലറ്റ്‌സിനെ മേജര്‍ മില്ലറ്റ്‌സ്, മൈനര്‍ മില്ലറ്റ്‌സ് എന്ന് രണ്ടായി തരം തിരിക്കാം. ഫിംഗര്‍ മില്ലറ്റ് അഥവാ റാഗി, കൂവരക്; ജോവര്‍ അഥവാ മണിച്ചോളം; പേള്‍ മില്ലറ്റ് അഥവാ ബജ്‌റാ, കമ്പ് എന്നിവ മേജര്‍ മില്ലറ്റില്‍ ഉള്‍പ്പെടുന്നു. ലിറ്റില്‍ മില്ലറ്റ് അഥവാ ചാമ, ഫോക്‌സ് ടെയില്‍ അഥവാ തിന, ബാന്‍യാഡ് അഥവാ കതിരവാലി, കോഡോ അഥവാ വരഗ്, പ്രോസോ അഥവാ പനി വരഗ്, ബ്രൗണ്‍ ടോപ് അഥവാ കൊറലെ എന്നിവ മൈനര്‍ മില്ലറ്റ്‌സില്‍ ഉള്‍പ്പെടുന്നു.

നമ്മുടെ മുഖ്യ ആഹാരമായ ചോറുമായി താരതമ്യം ചെയ്യുമ്പോള്‍ മില്ലറ്റ്‌സിന്റെ ന്യുട്രീഷനല്‍ വാല്യൂ വളരെ കൂടുതലാണ്, അവ താഴെ പറയും വിധമാണ് …..
100 ഗ്രാം മില്ലറ്റ്‌സില്‍
*കലോറി …378
*ഫാറ്റ് …4.2 ഗ്രാം
*അന്നജം …73 ഗ്രാം
*പ്രോട്ടീന്‍ …11 ഗ്രാം
*സോഡിയം …5 മില്ലിഗ്രാം
*ഡയറ്ററിഫൈബര്‍ …8.5 ഗ്രാം
*കാല്‍സ്യം …8 മില്ലി ഗ്രാം
*അയണ്‍ ..3 മിഗ്രാം
*പൊട്ടാസ്യം …195മിഗ്രാം

മില്ലറ്റ്‌സിന്റെ ഉപയോഗത്തിലൂടെ
ലഭ്യമാകുന്ന ഗുണങ്ങള്‍
* ട്രിപ്‌റ്റോഫാന്‍ തുടങ്ങിയ അമീനോ ആസിഡ് ശരീരഭാരം കുറയ്ക്കാന്‍ സഹായിക്കുന്നു.
* വന്‍കുടല്‍ ക്യാന്‍സര്‍, സ്തനാര്‍ബുദം സാദ്ധ്യത ഗണ്യമായി കുറയ്ക്കുന്നു.
* രക്തസമ്മര്‍ദ്ദം നിയന്ത്രിക്കുന്നു
* ഹൃദയസംബന്ധമായ അസുഖങ്ങള്‍, ആസ്തമ, മൈഗ്രയിന്‍ എന്നിവ കുറയ്ക്കുന്നു.
* പ്രമേഹത്തെ നിയന്ത്രിക്കുന്നു.
* എല്‍ഡിഎല്‍ നെ കുറയ്ക്കുന്നു.
* പേശികളെ ശക്തമാക്കുന്നു.
* ഗ്ലൂട്ടണ്‍ വിമുക്തമായതിനാല്‍ സീലിയാക് രോഗികള്‍ക്കും അലര്‍ജി ഉളളവര്‍ക്കും മില്ലറ്റ്‌സ് ഉപയോഗിക്കാം.

മില്ലറ്റ്‌സില്‍ ധാരളമായി കാണുന്ന അമിനോ ആസിഡുകള്‍ ഫൈബറുകള്‍ ഫൈറ്റോ ന്യുടിയന്റ്‌സ് മറ്റു വിറ്റാമിനുകള്‍ ധാതുക്കള്‍ എന്നിവയാണ് അസുഖങ്ങള്‍ വരാതെ നമ്മുടെ ആരോഗ്യം സംരക്ഷിക്കുന്നത്.

(ആരോഗ്യഭാരതി സംസ്ഥാന ഉപാദ്ധ്യക്ഷനാണ് ലേഖകന്‍)