സി.പി.ഐയിലും ‘ആര്‍.എസ്.എസ്. ഗ്യാങ്ങ്’

ദില്ലി സി.പി.ഐ ആസ്ഥാനത്താണ് താമസമെങ്കിലും ആനിരാജയുടെ ഹൃദയം കുറച്ചുനാളായി ഇങ്ങ് കേരളത്തിലായിരുന്നു. കേരളത്തിലെ പോലീസ് സ്ത്രീകളെ പീഡിപ്പിക്കുകയും കുട്ടികളെ ദ്രോഹിക്കുകയുമൊക്കെ ചെയ്യുന്നതിന്റെ വാര്‍ത്ത കണ്ട് ദേശീയ മഹിളാ ഫെഡറേഷന്‍ ജനറല്‍ സെക്രട്ടറിയുടെ ഹൃദയം നുറുങ്ങുകയായിരുന്നു. വിജയന്‍ സഖാവിന്റെ പോലീസിന് എന്തുപറ്റി എന്നറിയാന്‍ പാര്‍ട്ടിയാപ്പീസില്‍ സ്റ്റാലിന്റെ കാലത്ത് സൂക്ഷിച്ചിരുന്ന ഭൂതക്കണ്ണാടിയെടുത്ത് തുടച്ച് മിനുക്കി അതിലൂടെ കേരളത്തിലേക്ക് നോക്കി. ഇടതുഭരണത്തില്‍ ചുകന്നുതുടുത്തു നില്‍ക്കുന്ന കേരളത്തിലെ പോലീസ് വകുപ്പിനെ പ്രതീക്ഷിച്ച സഖാത്തി ഞെട്ടിത്തരിച്ചുപോയി. പോലീസ് ആസ്ഥാനത്തു കൂടി ‘ആര്‍.എസ്. എസ് ഗ്യാങ്ങ്’ മാര്‍ച്ചു ചെയ്യുന്നു. അക്കൂട്ടരാണ് ഈ സ്ത്രീപീഡനവും ബാലപീഡനവുമൊക്കെ നടത്തുന്നത് എന്നു തറപ്പിച്ചു പറയാന്‍ സഖാത്തിക്ക് രണ്ടാമതൊന്ന് ആലോചിക്കേണ്ടി വന്നില്ല. ദില്ലിയിലെ മലയാളി പത്രക്കാരെ വിളിച്ച് കേരളത്തിലെ പോലീസ്സില്‍ ആര്‍.എസ്.എസ് ഗ്യാങ് ഉണ്ടെന്ന് ഉറക്കെ വിളിച്ചു പറഞ്ഞപ്പോഴാണ് അല്പം സമാധാനമായത്. പത്രക്കാര്‍ ഈ വാര്‍ത്ത ആഘോഷിക്കുമ്പോള്‍ സഖാവത്തി സി.പി.ഐ ആസ്ഥാനത്തിരുന്ന് അഭിമാനം കൊള്ളുകയായിരുന്നു.

തന്റെ പ്രസ്താവനയ്ക്കുള്ള പ്രതികരണം എന്തെന്നറിയാന്‍ സഖാത്തി വീണ്ടും തന്റെ ഭൂതക്കണ്ണാടി കയ്യിലെടുത്തു. അതിലൂടെ ആദ്യം നോക്കിയത് തിരുവനന്തപുരത്തെ എം.എന്‍ മന്ദിരത്തിലേയ്ക്കാണ്. തന്റെ പ്രസ്താവന ചാനലുകളില്‍ കണ്ട് കോള്‍മയിരണിയുന്ന സംസ്ഥാന പാര്‍ട്ടി സഖാക്കളുടെ മുഖമൊന്നു നേരില്‍ കണ്ട് പുളകിതയാകാനായിരുന്നു അത്. എന്നാല്‍ അവിടുത്തെ കാഴ്ച കണ്ട് സഖാത്തി ഞെട്ടിപ്പോയി. എം.എന്‍.മന്ദിരത്തിനകത്ത് ‘ആര്‍.എസ്.എസ്. ഗ്യാങ്ങ്’ റൂട്ട് മാര്‍ച്ച് നടത്തുന്നു! പാര്‍ട്ടി സംസ്ഥാന സെക്രട്ടറി കാനം രാജേന്ദ്രന്‍ മുതല്‍ ഇടതു മുന്നണിയിലെ സി.പി.ഐ. മന്ത്രിമാര്‍ വരെ റൂട്ടുമാര്‍ച്ചില്‍ അണിനിരന്നിരിക്കുന്നു. എന്നു മാത്രമല്ല ആനിരാജക്കെതിരെ അവര്‍ അമര്‍ഷം കൊള്ളുകയും ചെയ്യുന്നു.

പോലീസിലെ ‘ആര്‍.എസ്.എസ്. ഗ്യാങ്ങ്’ സ്ത്രീപീഡനമാണ് നടത്തുന്നതെങ്കില്‍ സി.പി.ഐയിലെ ‘ആര്‍.എസ്.എസ്.ഗ്യാങ്ങ്’ ആനിരാജ പീഡനത്തിനു അരയും തലയും മുറുക്കുകയാണ്. സി.പി. ഐ ദേശീയനിര്‍വ്വാഹകസമിതി യോഗത്തില്‍ പ്രശ്‌നം ഉന്നയിച്ച് ആനിയെക്കൊണ്ട് വിശദീകരണം നല്‍കിപ്പിച്ചേ അടങ്ങു എന്നാണവരുടെ ഭാവം. അവര്‍ സഖാത്തിക്കുമേല്‍ ചാര്‍ത്തുന്ന കുറ്റം ചെറുതല്ല; പാര്‍ട്ടിചട്ടം ലംഘിച്ചു എന്നതാണ്. ദേശീയ നിര്‍വ്വാഹക സമിതി അംഗങ്ങള്‍ സംസ്ഥാനവിഷയത്തില്‍ ഇടപെടുന്നതിനു മുമ്പ് സംസ്ഥാന ഘടകത്തോട് ചര്‍ച്ച ചെയ്യണമെന്നാണത്രേ ചട്ടം. കേരളത്തിലെ പാര്‍ട്ടി ഘടകത്തോട് ചോദിക്കാതെ കേരളക്കാര്യത്തില്‍ തലയിട്ട ആനി മാഡത്തെ പരസ്യമായി പീഡിപ്പിക്കാന്‍ പാര്‍ട്ടി സംസ്ഥാന സെക്രട്ടറിയും കൂട്ടരും ചേര്‍ന്നു ശ്രമിക്കുമ്പോള്‍ തന്റെ ഭര്‍ത്താവായ പാര്‍ട്ടി ദേശീയ സെക്രട്ടറി രാജാസഖാവിനുപോലും ഇടപെടാനാവാത്ത അവസ്ഥ! നോക്കണേ ആനിരാജാ സഖാത്തിയുടെ ഗതികേട്.