ബാക്കിയാകുന്നത്…!

ഓണത്തിനൂഞ്ഞാലുകെട്ടുമ്പൊഴൊക്കെയും
എന്‍ കളിത്തോഴന്‍ വിളിച്ചിരുന്നെന്നെയും
തെക്കേപ്പുറത്തെ പുളിങ്കൊമ്പിനുച്ചിയില്‍
അച്ഛനവന്നായ് ചമച്ചൊരൂഞ്ഞാലുകള്‍
ആടിത്തിമിര്‍ത്ത സായന്തനക്കൂട്ടുകള്‍…
ആടിത്തൊടാനാഞ്ഞ ചില്ലതന്നോര്‍മ്മകള്‍

Add Kesari Weekly as a preferred source on Google

എത്തിപ്പിടിക്കുവാനാവാത്ത കൊമ്പുകള്‍
കുത്തിനോവിച്ചു തുടങ്ങിപിന്നെപ്പിന്നെ
കാലംകടന്നു വളര്‍ന്ന നോവാറുവാന്‍
ഒറ്റക്കയറില്‍ കൊരുത്തൊരൂഞ്ഞാലതില്‍
ഒറ്റയ്ക്കവന്നാടി നിര്‍ത്തിയാഘോഷങ്ങള്‍

എത്തി ഞാന്‍ വൈകിയെന്നാലും സുഹൃത്തിനെ
കണ്ടന്ത്യയാത്ര മൊഴിഞ്ഞു പോന്നീടുവാന്‍
എല്ലാം പഴയതുമാതിരി പൂമുഖത്തമ്മയിരി-
ക്കയാണാരെയോ കാത്തപോല്‍
ഇന്ദ്രിയമെല്ലാം ക്ഷയിച്ചു പോയെങ്കിലും
പുഞ്ചിരിയൊന്നെനിക്കേകാന്‍ മറന്നീല…

ADVERTISEMENT

ഉണ്ടവന്‍ കോടിപുതച്ചു നടുത്തള-
ത്തിണ്ണയില്‍ നന്നായുറങ്ങുന്ന മാതിരി…
എത്തി ഞാനെന്നറിഞ്ഞാലുണര്‍ന്നേറ്റവന്‍
കെട്ടിപ്പിടിച്ചുകുശലം മൊഴിഞ്ഞിടാം…
വേണ്ട ഞാനായിട്ടുണര്‍ത്തേണ്ടവന്‍ വിട്ടു –
പോയ ദു:ഖത്തിന്‍ വഴികള്‍ താണ്ടീടുവാന്‍

പാതി വായിച്ചുമടക്കാത്ത പുസ്തകം
പാതി കുടിച്ച ചായക്കോപ്പ പൊട്ടിയ
പാനപാത്രം കണ്ണുനീര്‍വീണ കത്തുകള്‍…
ഞെട്ടിത്തെറിച്ചു നിലച്ച വാച്ചും ഫോണുമുണ്ടു-
കിടപ്പുമുറിക്കകത്തിപ്പൊഴും…
ഉണ്ടവന്റേതായ ഗന്ധം കുടിച്ചതാം
ജീര്‍ണ്ണ കുപ്പായങ്ങളങ്ങിങ്ങനാഥമായ്…!
ഒക്കെയും ബാക്കിയാക്കി തൂങ്ങി നില്‍ക്കയാ-
ണിപ്പൊഴും പണ്ടത്തെ ഓണഊഞ്ഞാല്‍ക്കയര്‍ …!