എല്ലാ ഭരണകൂടവും സ്വേച്ഛാധിപതികളെ സൃഷ്ടിക്കുന്നുണ്ടെന്നും അവരുടെ ഈഗോ നിരപരാധികളെ തടവിലിടുന്നുണ്ടെന്നുമുള്ള മഹദ്വചനം മാവോവാദി ബന്ധമാരോപിച്ച് അറസ്റ്റിലായ അലന് സുഹൈബിന്റെ അമ്മ സബിത ടീച്ചറുടെതാണ്. ടീച്ചര് സാമൂഹ്യമാധ്യമത്തില് എഴുതിയ കത്തിലെ വാക്കുകള് മകനുള്ളതാണെങ്കിലും അത് പ്രത്യക്ഷത്തില് മുഖ്യന് സഖാവിനുള്ളതാണ് എന്ന് അരിയാഹാരം കഴിക്കുന്ന ആര്ക്കും ബോധ്യമാകും. സ്വേച്ഛാധിപതിയുടെ ഈഗോയുടെ ഇരയ്ക്കുവേണ്ടി മുന് നക്സല് താരം കെ.അജിതയ്ക്കൊപ്പം സബിത ടീച്ചര് കോഴിക്കോട്ട് നിരാഹാരമാചരിക്കുകയും ചെയ്തു. പാര്ട്ടിയുടെ സജീവപ്രവര്ത്തകയായ സബിത മാത്രമല്ല സ്വേച്ഛാധിപതി സഖാവിന്റെ ഈഗോയുടെ ഇരകള് എന്ന് ഇടതു മുന്നണികള് തന്നെ പറയുന്നു.
ഭൂപരിഷ്കരണ നിയമത്തിന്റെ അമ്പതാം വാര്ഷികാഘോഷച്ചടങ്ങില് മുഖ്യന് സഖാവ് മുന് മുഖ്യമന്ത്രി സി. അച്യുതമേനോന്റെ പേര് പരാമര്ശിക്കുകപോലും ചെയ്തില്ല. ഈ ഈഗോയുടെ ഇര സി.പി.ഐ ആയിരുന്നു. മന്ത്രി ചന്ദ്രശേഖരന് നെഞ്ചത്തടിച്ച് നിലവിളിച്ചത് മിച്ചം. പേരു പറയാത്തത് തന്റെ ഔചിത്യം കൊണ്ടാണെന്ന് മുഖ്യന് സഖാവ് പറഞ്ഞപ്പോഴാണ് സി.പി.ഐക്കാര് ഈഗോയുടെ ആഴം തെളിഞ്ഞു കണ്ടത്. കഴിഞ്ഞ വര്ഷം ഇതു പച്ച യ്ക്ക് അനുഭവിച്ചയാള് പാര്ട്ടിയുടെ വിശ്വസ്തനായ മുന്തിരുവിതാംകൂര് ദേവസ്വം പ്രസിഡന്റ് എം.പത്മകുമാറാണ്. കഴിഞ്ഞ വര്ഷത്തെ മണ്ഡലകാലത്ത് യുവതികളെ ശബരിമല കയറ്റാന് ധൃതികാട്ടണ്ട എന്ന് പത്മകുമാര് പറഞ്ഞിട്ടും വിജയന് സഖാവ് പിടിവാശി വിട്ടില്ല. സഖാവിന്റെ ഈഗോയില് കേരളം പ്രക്ഷോഭ ഭൂമിയായി. അതിന്റെ ഫലമായി തടവിലായത് നിരപരാധികളായ നൂറുകണക്കിന് അയ്യപ്പഭക്തരാണ്. പത്തനംതിട്ട ജില്ലാ സെക്രട്ടറിയേറ്റ് യോഗത്തിലാണ് പത്മകുമാര് തന്റെ അഭിപ്രായം പറഞ്ഞത്. പാര്ട്ടിക്കാര് തന്നെ സ്വേച്ഛാധിപതിയുടെ ഈഗോ തിരിച്ചറിയാന് തുടങ്ങി എന്നത് നല്ലതുതന്നെ.