സിപിഎമ്മിന്റെ ചെമ്പന്‍ മാനവികതയ്ക്കും ഭീകരരുടെ തോക്കിനും ഇര ഒന്നു തന്നെ

‘ഊണിന്നാസ്തകുറഞ്ഞു നിദ്ര നിശയിങ്കല്‍ പോലുമില്ലാതെയായി’ എന്ന് കവി പാടിയത് മാര്‍ക്‌സിസ്റ്റു പാര്‍ട്ടിയുടെ പുതിയ ജനറല്‍ സെക്രട്ടറി എം. എ. ബേബിയെ മനസ്സില്‍ കണ്ടിട്ടായിരുന്നോ എന്നറിയില്ല. മററുള്ളവരുടെ വേദന കാണുമ്പോള്‍ സഖാവിന് അങ്ങനെയാണ്. മോദിസര്‍ക്കാര്‍ 370-ാം വകുപ്പ് റദ്ദാക്കിയതറിഞ്ഞതോടെ പാകിസ്ഥാനിലിരിക്കുന്ന റസിഡന്‍സ് ഓഫ് കാശ്മീര്‍ ഫ്രന്‍സ് എന്ന ഇസ്ലാമിക തീവ്രവാദികള്‍ക്ക് വല്ലാത്ത ഹൃദയവേദന. ഈ വേദന തിരിച്ചറിയാന്‍ സര്‍ഗ്ഗശേഷിയുള്ള ഇന്ത്യയിലെ ഒരേയൊരു സാംസ്‌കാരിക രാഷ്ട്രീയ നേതാവ് ബേബി സഖാവ് മാത്രമാണ്. അതുകൊണ്ടാണ് പഹല്‍ഗാം കൂട്ടക്കൊലക്കിരയായ കുടുംബങ്ങളുടെ വേദനയില്‍ ഒട്ടും വിഷമം തോന്നാതെ അതിലും എത്രയോ ഘോരമായ വേദന അനുഭവിച്ചു കൊണ്ടിരിക്കുന്ന ഇസ്ലാമിക തീവ്രവാദികള്‍ക്കായി സഖാവിന്റെ ഹൃദയം കേണത്. കേഴുന്നതിനിടക്ക് ഒന്നു വിതുമ്പിപ്പോയപ്പോഴാണ് സഖാവിന്റെ ആത്മഗതം പത്രക്കാര്‍ കേട്ടതും 370-ാം വകുപ്പ് റദ്ദാക്കിയതിലുളള വേദനയാണ് പഹല്‍ഗാം കൂട്ടക്കൊലക്ക് കാരണം എന്ന് ബേബി സഖാവ് പ്രതികരിച്ചുവെന്ന് അവര്‍ റിപ്പോര്‍ട്ടു ചെയ്തതും. പിന്നീട് പത്രക്കാര്‍ ഇതിനെക്കുറിച്ച് ചോദിച്ചപ്പോള്‍ അതിനെക്കുറിച്ച് പ്രതികരിക്കേണ്ട സമയമല്ല ഇതെന്ന് പറഞ്ഞ് സഖാവ് ഒഴിഞ്ഞു മാറിയപ്പോഴും പഴയ നിലപാട് തിരുത്തിയിട്ടില്ല. കാശ്മീരിലെ ജനങ്ങള്‍ ഈ ഭീകരര്‍ക്കെതിരെ ശക്തമായി പ്രതികരിച്ചപ്പോഴും സഖാവിന്റെ നിലപാടില്‍ മാറ്റമില്ല.

നോവലിസ്റ്റ് എം.മുകുന്ദന്‍ കണ്ടതില്‍ വെച്ച് ഏറ്റവും വലിയ വായനക്കാരനാണ് എം.എ.ബേബി. അദ്ദേഹത്തിന്റെ മഹത്വത്തിന് വേറെ സര്‍ട്ടിഫിക്കറ്റ് വേണ്ടല്ലോ.ഭീകരരുടെ വേദന കാണുമ്പോള്‍ ഉരുകുന്നതാണ് ആ ഹൃദയമെങ്കിലും അദ്ദേഹം നയിക്കുന്ന സി.പി.എമ്മിന് ഭീകരതയോട് ഒരു വിട്ടുവീഴ്ചയുമില്ല. ‘ഭീകരതക്കെതിരെ മാനവികത’ എന്ന മുദ്രാവാക്യവുമായി പാര്‍ട്ടി ഏരിയാ കേന്ദ്രങ്ങളില്‍ ജനസദസ്സുകള്‍ നടത്തിയിരിക്കയാണ്. ഹിന്ദുക്കളെ തിരഞ്ഞുപിടിച്ച് വെടിവെച്ചുകൊന്ന് മതസ്പര്‍ദ്ധക്ക് ശ്രമിച്ച ഭീകരര്‍ക്കെതിരെ ജനവികാരമുയര്‍ത്താനല്ല, കാശ്മീരിന്റെ പ്രത്യേക പദവി ഉടനെ വീണ്ടെടുക്കണം എന്നും സ്വയംഭരണാവകാശം അംഗീകരിക്കണം എന്ന് ആവശ്യപ്പെടാനും കേന്ദ്രസര്‍ക്കാറിനെ കുറ്റപ്പെടുത്താനുമാണ് ഈ സദസ്സുകളിലെ പ്രസംഗത്തില്‍ സഖാക്കള്‍ ശ്രമിച്ചത്. ഇതു തന്നെയായിരുന്നു പഹല്‍ഗാമില്‍ കൂട്ടക്കൊല നടത്തിയ റസിഡന്‍സ് ഫ്രണ്ട്‌സ് എന്ന ഭീകരവാദ ഗ്രൂപ്പിന്റെയും ആവശ്യം. ഭീകരവാദത്തിനെതിരെ മാര്‍ക്‌സിസ്റ്റു പാര്‍ട്ടി സംഘടിപ്പിച്ച ചുകപ്പന്‍ മാനവികതക്കും പഹല്‍ഗാമില്‍ ഇസ്ലാമിക ഭീകരവാദികള്‍ ചിന്തിയ ചോരക്കും ഒരേ നിറം! ഫലത്തില്‍ ഭീകരരുടെ തോക്കിന്റെ ഇരയും സി.പി.എമ്മിന്റെ മാനവിക സദസ്സിന്റെ ഇരയും ഒന്നുതന്നെ.