സിദ്ധരാമയ്യ കഴുത്തിലിട്ട ജാതിസെന്‍സസ് പാമ്പ്

പ്രധാനമന്ത്രിക്കസേരയിലിരിക്കെ, മന്‍മോഹന്‍സിംഗ് സോണിയ മൈനോയുടെ റിമോട്ട് കണ്‍ട്രോളിലായിരുന്നെങ്കില്‍ കര്‍ണ്ണാടക മുഖ്യമന്ത്രി സിദ്ധരാമയ്യ രാഹുലിന്റെ വിദൂര നിയന്ത്രണത്തിലാണ്. രണ്ടാളുടെ കഴുത്തിലെ സെന്‍സറിന്റെയും നിയന്ത്രണ കേന്ദ്രം ഒരേ സ്ഥലം തന്നെ. മന്‍മോഹന്‍ സിംഗിന്റെ കാലത്ത് ഓഫീസ് ഫയല്‍ സോണിയയുടെ വീട്ടില്‍ എത്തണമായിരുന്നു. സോണിയയുടെ ഈ വിദൂര നിയന്ത്രണം അധികമാരുമറിഞ്ഞിരുന്നില്ല. എന്നാല്‍ അങ്ങാടിപ്പാട്ടാക്കിക്കൊണ്ടാണ് രാഹുലിന്റെ നടപടി. ഇടിമിന്നല്‍ പോലെ എക്‌സിലൂടെ രാജകുമാരന്റെ ശാസന വരും. അത് അപ്പടി അനുസരിച്ചു കൊള്ളാമെന്ന ഉറപ്പ് ഉടനെ തിരിച്ചു കിട്ടണം. പിന്നാലെ അത് നടപ്പാക്കിയതിന്റെ റിപ്പോര്‍ട്ടുപോകണം. കര്‍ണ്ണാടക തിരഞ്ഞെടുപ്പിനുമുമ്പു തന്നെ, കോണ്‍ഗ്രസ് ജയിച്ചാല്‍ ജാതിസെന്‍സസ് നടപ്പാക്കുമെന്ന രാഹുലിന്റെ പ്രഖ്യാപനം വന്നു. സിദ്ധരാമയ്യ ആമേന്‍ പറഞ്ഞു. ഭരണം വന്നപ്പോള്‍ ഉടനെ ജാതിസെന്‍സസ് നടപ്പാക്കണമെന്ന നിര്‍ദ്ദേശം രാഹുലില്‍ നിന്നു കിട്ടി. അതുപ്രകാരം സിദ്ധരാമയ്യ ഉത്തരവിറക്കി. ജാതിസെന്‍സസ് അനുസരിച്ചുള്ള കണക്ക് പുറത്തുവന്നപ്പോഴാണ് അത് തന്റെ കഴുത്തില്‍ ചുറ്റിയ പാമ്പാണെന്ന് സിദ്ധരാമയ്യ മനസ്സിലാക്കിയത്. റിപ്പോര്‍ട്ടനുസരിച്ച് ജനസംഖ്യയുടെ 2.6 ശതമാനമാണ് ബ്രാഹ്മണര്‍. അതായത് അവര്‍ ന്യൂനപക്ഷമാണ് എന്ന് സിദ്ധരാമയ്യക്ക് സമ്മതിക്കേണ്ടി വന്നിരിക്കുന്നു. അപ്പോള്‍ ന്യൂനപക്ഷ സംവരണം നല്‍കേണ്ടത് മുസ്ലിങ്ങള്‍ക്കല്ല, ബ്രാഹ്മണര്‍ക്കാണ്. ജാതിയില്ലാത്ത മതമാണ് ഇസ്ലാം എന്നു വാദിച്ച ഇസ്ലാമിസ്റ്റുകള്‍ക്കും തലവേദനയായി സെന്‍സസ് റിപ്പോര്‍ട്ട്. ബ്രാഹ്മണര്‍ 59 ഉപജാതികളാണെങ്കില്‍ മുസ്ലിങ്ങള്‍ 99 ഉപജാതികളാണ് എന്നാണ് റിപ്പോര്‍ട്ടില്‍ പറയുന്നത്.

ഈ തലവേദന തീരുന്നതിനു മുമ്പ് രാഹുല്‍ രാജകുമാരന്റെ അടുത്ത തിട്ടൂരം സാമൂഹ്യമാധ്യമം വഴി സിദ്ധരാമയ്യയ്ക്ക് കിട്ടി. ജാതിവിവേചനം തടയാന്‍ രോഹിത് വെമുല നിയമം ഉടനെ നടപ്പാക്കണമെന്നാണ് ഉത്തരവ്. അംബേദ്കര്‍ ജയന്തി ദിനത്തില്‍ രാഹുലിന്റെ തലയില്‍ ഉണ്ടായ വെളിപാടാണത്രെ ഇത്. ഈ നിയമം കൊണ്ടുവരുന്നതോടെ സംസ്ഥാനത്തെ ഒരു കുട്ടിക്കും സാമുദായികമായ വിവേചനം ഉണ്ടാവാന്‍ പാടില്ല എന്നാണ് ഉത്തരവിലുള്ളത്. പ്രഖ്യാപനം നടത്തിയും നിയമം പാസ്സാക്കിയും പ്രശ്‌നങ്ങളൊക്കെ തീരുമായിരുന്നെങ്കില്‍ ഇന്ദിരഗാന്ധി ഗരീബി ഹഠാവോ പ്രഖ്യാപിച്ചപ്പോള്‍ തന്നെ ദാരിദ്യം ഇന്ത്യ വിട്ടുപോകേണ്ടതായിരുന്നു. എല്ലാവരും തുല്യരാണെന്ന് പറയുന്ന ഭരണഘടന പാസ്സാക്കിയ ഉടനെ സാമുദായിക വിവേചനവും പമ്പകടക്കേണ്ടതായിരുന്നു. ഇതൊക്കെ അറിയുന്ന സിദ്ധരാമയ്യ ഈ ഉത്തരവ് നടപ്പാക്കാമേ എന്ന് മറുപടി നല്കി അതിനുള്ള നെട്ടോട്ടത്തിലാണ്. കഴുത്തിലിട്ട പാമ്പില്‍ നിന്ന് രക്ഷപ്പെടാന്‍ എന്തു വഴി എന്നറിയാതെ ഉഴലുകയാണ് ആ പാവം!