രാഷ്ട്രീയാവശ്യത്തിനല്ലെങ്കില്‍ പിന്നെ എന്തിന് പാര്‍ട്ടി ക്ഷേത്രം ഭരിക്കണം?

തിരുവിതാംകൂര്‍ ദേവസ്വം ബോര്‍ഡിന്റെ ചെവിക്കുപിടിച്ച് കേരള ഹൈക്കോടതി പറഞ്ഞിരിക്കയാണ് ക്ഷേത്രങ്ങള്‍ രാഷ്ട്രീയ ആവശ്യത്തിന് ഉപയോഗിക്കരുതെന്ന്. രാഷ്ട്രീയാവശ്യത്തിനായി മതസ്ഥാപനങ്ങള്‍ ദുരുപയോഗം ചെയ്യുന്നത് തടയുന്ന മതസ്ഥാപന ദുരുപയോഗം തടയല്‍ ചട്ടം (റിലിജിയസ് ഇന്‍സ്റ്റിറ്റിയൂഷന്‍സ് പ്രിവന്‍ഷന്‍ ഓഫ് മിസ് യൂസ്) കര്‍ശനമായി പാലിച്ചോളണം എന്ന് താക്കീതു ചെയ്തിട്ടുമുണ്ട്. രാഷ്ട്രീയ ആവശ്യം നടപ്പാക്കാന്‍ പാര്‍ട്ടി നിശ്ചയിച്ച ഉറച്ച സഖാക്കളാണ് ദേവസ്വം ബോര്‍ഡിന്റെ ഉന്നതങ്ങളില്‍ പ്രതിഷ്ഠിക്കപ്പെട്ടത്. അവരോടാണ് ഹൈക്കോടതിയുടെ ഈ കണ്ണുരുട്ടല്‍. പാര്‍ട്ടി നിര്‍ദ്ദേശിക്കുന്ന രാഷ്ട്രീയ ആവശ്യങ്ങള്‍ നടപ്പാക്കാനല്ലെങ്കില്‍ പിന്നെ അവര്‍ അവിടെ ഇരിക്കണ്ടതില്ലല്ലോ. കൊല്ലം കടയ്ക്കല്‍ ദേവീക്ഷേത്രത്തില്‍ വിപ്ലവഗാനം പാടിയതാണ് ജസ്റ്റിസുമാരായ കെ.നരേന്ദ്രനെയും എസ്. മുരളികൃഷ്ണനെയും പ്രകോപിപ്പിച്ചത്. ഇതു സംബന്ധിച്ച് അവരുടെ മുമ്പില്‍ എത്തിയ അഡ്വ.വിഷ്ണു സുനിലിന്റെ പരാതിയിലാണ് ഈ ഉത്തരവുണ്ടായത്. പത്തൊമ്പത് ക്രിമിനല്‍ കേസുകളില്‍ പ്രതിയായ ആള്‍ എങ്ങനെ ക്ഷേത്രോപദേശക സമിതി പ്രസിഡന്റാകും എന്നും കോടതി ചോദിച്ചിരിക്കയാണ്. സഖാവാണ് എന്നതാണ് ഇയാളുടെ യോഗ്യത എന്നത് കോടതിക്കറിയില്ലല്ലോ.

ക്ഷേത്രങ്ങള്‍ രാഷ്ട്രീയാവശ്യത്തിന് ദുരുപയോഗം ചെയ്യരുത് എന്നത് മാര്‍ക്‌സിസ്റ്റ് പാര്‍ട്ടിക്ക് ബാധകമല്ല. ദേവസ്വം മന്ത്രിയടക്കം. സംസ്ഥാനത്തെ ദേവസ്വം ബോര്‍ഡ് ഭരിക്കുന്നത് സഖാക്കളാണ്. അമ്പലം നന്നാക്കാനോ ഭക്തന്മാരെ സേവിക്കാനോ അല്ല പാര്‍ട്ടിയുടെ രാഷ്ട്രീയ ആവശ്യം നടപ്പാക്കാനാണ് അവരെ അവിടെ പാര്‍ട്ടി പ്രതിഷ്ഠിച്ചത്.. ഗുരുവായൂര്‍ ദേവസ്വത്തിനകത്ത് പാര്‍ട്ടി യൂനിറ്റു ഉണ്ടാക്കിയതും ഗുരുവായൂരപ്പനുമീതെ പാര്‍ട്ടിയുടെ ശാസന നടപ്പാക്കാനാണ്. അഞ്ചു വര്‍ഷം വരെ തടവും പിഴയുമുള്ള മതസ്ഥാപന ദുരുപയോഗം സംബന്ധിച്ച ചട്ടം നടപ്പാക്കിയാല്‍ ദേവസ്വം മന്ത്രി ഉള്‍പ്പെടെ ദേവസ്വത്തിലിരുന്ന് രാഷ്ട്രീയം കളിക്കുന്ന സഖാക്കളെല്ലാം അഴിയെണ്ണേണ്ടി വരും. കണ്ണൂര്‍ ജില്ലയില്‍ ക്ഷേത്രോത്സവത്തില്‍ പാര്‍ട്ടിക്കാരായ ക്രിമിനല്‍പുള്ളികളുടെ ചിത്രം വെച്ച് അവര്‍ക്ക് ജയ് വിളിച്ച് ഘോഷയാത്ര നടത്തിയ സഖാക്കളുടെയും ക്ഷേത്രമതിലിനകത്ത് പാര്‍ട്ടി പരിപാടി നടത്തിയവരുടെയും കാര്യം പറയേണ്ടല്ലോ. ദേവസ്വം മന്ത്രിയെ കുറ്റം പറയരുതല്ലോ ക്ഷേത്രപരിസരത്ത് കാലാകാലമായി ക്ഷേത്രത്തിനോ ക്ഷേത്രാചാരത്തിനോ ഒരു വിഘ്‌നവും വരുത്താതെ നടന്നു വന്നിരുന്ന ആര്‍.എസ്.എസ്. ശാഖകള്‍ അവിടെ നിന്നും മാറ്റാന്‍ ഇതേ സഖാക്കള്‍ക്ക് എന്ത് ആവേശമായിരുന്നു. ആരാണ് ക്ഷേത്രങ്ങളെ രാഷ്ട്രീയാവശ്യത്തിന് ഉപയോഗിക്കുന്നതെന്നും ദുരൂപയോഗം ചെയ്യുന്നതെന്നും ഇപ്പോള്‍ കോടതിക്കും ജനങ്ങള്‍ക്കും ബോധ്യപ്പെട്ടുവല്ലോ.