എന്നാലും സ്റ്റാലിനേ ഇത്രയ്ക്ക് വേണ്ടിയിരുന്നോ?

ദക്ഷിണേന്ത്യന്‍ രാഷ്ട്രീയത്തിലെ സയാമീസ് ഇരട്ടകളാണ് താനും തമിഴ്‌നാട് മുഖ്യന്‍ സ്റ്റാലിനും എന്ന അഹങ്കാരത്തിലായിരുന്നു കേരള മുഖ്യന്‍ വിജയന്‍ സഖാവ്. വൈക്കം സത്യഗ്രഹത്തിന്റെ നൂറാം വാര്‍ഷിക പരിപാടിയുടെ വേദിയില്‍ വെച്ച് വിജയന്‍ സഖാവിനെ നോക്കി സ്റ്റാലിന്‍ മലയാളത്തില്‍ പറഞ്ഞത് ‘ഉടല് വേറെ വേറെ ആണെങ്കിലും ചിന്ത ഒന്നാണെ’ ന്നാണ്. രണ്ട് ഉടലും ഒരു ഉയിരുമായി കഴിയുന്ന സയാമീസ് ഇരട്ടകള്‍. ചിന്തയില്‍ മാത്രമല്ല സ്വഭാവത്തിലും പ്രവൃത്തിയിലുമൊക്കെ ഇരട്ടകള്‍ തന്നെ. സ്റ്റാലിന്‍ മകനെ മന്ത്രിയാക്കി; വിജയന്‍ മരുമകനെ മന്ത്രിയാക്കി. സ്റ്റാലിന്‍ പാര്‍ട്ടി കുടുംബസ്വത്താക്കി. വിജയനും പാര്‍ട്ടി വഴി കുടുംബ സ്വത്ത് ഉണ്ടാക്കി. സാന്‍ഡിയാഗോ മാര്‍ട്ടിന്‍ നല്കിയ സംഭാവന പങ്കുവെക്കുന്നതിലും അവര്‍ ഇരട്ടകള്‍ തന്നെ. ഇരട്ടകളുടെ സാമ്യം അവിടെ തീര്‍ന്നില്ല. സ്റ്റാലിനും വിജയനും ഒരേ സ്വരത്തില്‍ സനാതന ധര്‍മ്മത്തെ എതിര്‍ക്കുന്നു. സി.എ.എ വിരുദ്ധ നിലപാടിലും രണ്ടു പേര്‍ക്കും ഒരേ ചിന്ത. പരസ്യമായി പറഞ്ഞു തങ്ങളത് നടപ്പാക്കില്ല. കടമെടുപ്പിനുള്ള അവകാശമുള്‍പ്പെടെ സംസ്ഥാന സ്വയംഭരണത്തിന് വിജയന്‍ സഖാവ് ദില്ലിയില്‍ നടത്തിയ ധര്‍ണ്ണക്ക് സ്റ്റാലിന്റെ പൂര്‍ണ്ണ പിന്തുണ കിട്ടി. ഡി.എം.കെ ക്കാര്‍ കറുത്ത ഷര്‍ട്ട് ധരിച്ചു പങ്കെടുക്കുകയും ചെയ്തു. വൈക്കത്തെ വേദിയില്‍ സ്റ്റാലിന്റെ പ്രസംഗം കേട്ട് കോള്‍മയിരണിഞ്ഞ വിജയന്‍ പറഞ്ഞത് ഇനിയങ്ങോട്ടും ഞങ്ങള്‍ ഇങ്ങനെത്തന്നെ എന്നാണ്. സ്റ്റാലിന് വിജയന്‍ ചുകപ്പ് ഷാളുമണിയിച്ചു.

താനും സ്റ്റാലിനും സാമന്തരാജാക്കന്മാരായി കേരളവും തമിഴ്‌നാടും ഭരിക്കുന്നതിന്റെ സ്വപ്‌നത്തില്‍ മുഴുകിയിരിക്കെ വിജയന്‍ സഖാവിന്റെ മുഖത്ത് ആഞ്ഞൊരടി കിട്ടി. കത്തിന്റെ രൂപത്തിലാണ് അടി വന്നുകൊണ്ടത്. വട്ടവടയിലെ കര്‍ഷകര്‍ക്കുവേണ്ടി കേരള സര്‍ക്കാര്‍ ചിലന്തിയാറ്റില്‍ പണിയാന്‍ ഉദ്ദേശിക്കുന്ന തടയണയുടെ പണി ഉടനെ നിര്‍ത്തിക്കോളണം എന്നാണ് സ്റ്റാലിന്റെ കത്ത്. മുഖം തടവി കാര്യമെന്തെന്ന് മനസ്സിലാക്കി വരുമ്പോഴേക്കും വരുന്നു മറ്റേ കരണത്ത് അതിലും ശക്തമായ തൊഴി. മുല്ലപ്പെരിയാര്‍ അണക്കെട്ടിനുമുകളില്‍ കയറിനിന്ന് തമിഴ്‌സിനിമയിലെ നായകനെപ്പോലെ വാള്‍ വീശി ബദല്‍ അണക്കെട്ടിന്റെ പണിയുമായി മുന്നോട്ടു പോയാല്‍ ‘കൊല്ലുവേന്‍’ എന്ന ആക്രോശമാണ് സ്റ്റാലിനില്‍ നിന്ന് കേട്ടത്. സൂക്ഷിച്ചു നോക്കിയപ്പോള്‍ സ്റ്റാലിന്റെ പുറകില്‍ അരിവാള്‍ ചുറ്റികയുള്ള ചെങ്കൊടി. അതുമായി നില്‍ക്കുന്നത് തമിഴ്‌നാട് സി.പി.എം സംസ്ഥാന കമ്മറ്റി. സഖാവ് വിജയന്‍ സ്വപ്‌നലോകത്തോ അതോ ഭൂമിയിലോ എന്ന് ഏ.കെ.ജി സെന്ററിലുള്ളവര്‍ അദ്ദേഹത്തിന് ഒന്നു പറഞ്ഞുകൊടുക്കണേ.