ഹമാസ് എന്നു കേട്ടാല്‍ ചോര തിളയ്ക്കുന്നവര്‍

പണ്ട് ഹിരണ്യാക്ഷന്‍ എന്ന അസുരന്‍ നാരായണ എന്ന നാമം ചൊല്ലരുത് എന്നു കല്പന പുറപ്പെടുവിച്ചിരുന്നു. കുട്ടികളെ ഹിരണ്യായ നമഃ എന്നു പഠിപ്പിക്കാന്‍ ആശാന്മാരെയും നിശ്ചയിച്ചിരുന്നു. ഇന്ന് കേരളത്തിലെ മുഖ്യമന്ത്രി വിജയന്‍ സഖാവ് പറയുകയാണ് കേരളത്തിലെ കുട്ടികളെ ഭാരതം എന്നു പഠിപ്പിക്കില്ല എന്ന്. പാഠപുസ്തകത്തില്‍ ഭാരതം എന്നത് ഒഴിവാക്കുമത്രെ. വിജയന്‍ സഖാവ് പാര്‍ട്ടി സെക്രട്ടറിയായതു മുതല്‍ സഖാക്കളെല്ലാം വിജയായ നമ: എന്നു ചൊല്ലാന്‍ തുടങ്ങി. ചൊല്ലാത്തവരെ വെട്ടി നിരത്തി. വിജയന്‍ സഖാവ് മുഖ്യമന്ത്രിയായതോടെ ഇടതുമുന്നണിയും വിജയായനമ: എന്നു മന്ത്രിക്കുകയാണ്. അതു പോര ജനങ്ങളെ കൂടി അതു ഏറ്റുപറയിക്കാന്‍ 140 മണ്ഡലങ്ങളിലും മന്ത്രിപ്പടയുടെ പര്യടനം നിശ്ചയിച്ചിരിക്കുന്നു. അതു നടത്തിക്കേണ്ട ചുമതല സര്‍ക്കാര്‍ ഉദ്യോഗസ്ഥന്മാര്‍ക്കും കല്പിച്ചു നല്‍കിയിരിക്കുന്നു.

പ്രതിപക്ഷത്തിരിക്കുന്ന യു.ഡി.എഫിനും ഭാരതത്തോട് അലര്‍ജിയാണ്. ഭാരതം വേണ്ട ഇന്ത്യ മതി എന്നാണ് അവരുടെ നിശ്ചയം. ഇടതും വലതും ഒരേ തൂവല്‍ പക്ഷികളാവുകയാണ് മഹാകവി വള്ളത്തോളിന്റെ പ്രശസ്തമായ വരികള്‍ തിരുത്തിയെഴുതുന്നതില്‍. ഭാരതമെന്നു കേട്ടാലഭിമാനപൂരിതമാകണമന്തരംഗം കേരളമെന്നു കേട്ടാലോ തിളയ്ക്കണം ചോര ഞരമ്പുകളില്‍ എന്നാണ് മഹാകവിയുടെ വരികള്‍. ഇടതന്മാരും വലതന്മാരും ചേര്‍ന്ന് അത് തിരുത്തിയത് ഇങ്ങനെയാണ്: ഭാരതമെന്നു കേട്ടാലപമാനപൂരിതമാകണമന്തരംഗം ഹമാസെന്നു കേട്ടാലോ തിളയ്ക്കണം ചോര ഞരമ്പുകളില്‍. കോഴിക്കോട് കടപ്പുറത്ത് ലീഗുകാര്‍ സംഘടിപ്പിച്ച ഹമാസ് അനുകൂല റാലിയില്‍ ശശി തരൂര്‍ നടത്തിയ പ്രസംഗം വിവാദമായപ്പോള്‍ പോലും മാര്‍ക്‌സിസ്റ്റ് നേതാവ് ഗോവിന്ദന്‍ മാസ്റ്റര്‍ അതിനെ നിസ്സാരവല്‍ക്കരിച്ചു. അതിനെ കത്തിക്കാന്‍ ശ്രമിച്ച ജലീലിനേയും സ്വരാജിനേയും കണ്ണുരുട്ടി കാട്ടി വായടപ്പിച്ചു. സമസ്തയെ പുകഴ്ത്തി. ഇസ്രായേലിന്റെ അതിര്‍ത്തിക്കകത്ത് കടന്ന് ആയിരത്തിലധികം പേരെ കൊല്ലുകയും നിരവധി പേരേ ബന്ദികളാക്കുകയും ചെയ്ത ഹമാസ് ഭീകരരല്ല; കേവലം ഇരകള്‍ മാത്രം. പ്രതിരോധത്തിനു നിര്‍ബ്ബന്ധിതരായ ഇസ്രായേല്‍ ഭീകരര്‍. ഹമാസിനെക്കുറിച്ച് എന്തെങ്കിലും പറഞ്ഞാല്‍ അവരുടെ ചോര തിളയ്ക്കും.