ഉദയനിധിയുടെ വാളിന്റെ നീളം മതിയാകുമോ?

സനാതന ധര്‍മ്മത്തിന്റെ ഉന്മൂലനാശത്തിനായി വാളുമെടുത്ത് കച്ചകെട്ടിയിറങ്ങിയിരിക്കയാണ് അങ്കച്ചേകവന്മാരായ മകന്‍ സ്റ്റാലിനും അച്ഛന്‍ സ്റ്റാലിനും. കൂട്ടക്കുരുതിക്കാരായി തന്റെ പിന്‍തലമുറ വളരട്ടെ എന്നു കരുതിയാവാം റഷ്യന്‍ വംശഹത്യയുടെ നായകനായ സ്റ്റാലിന്റെ പേരു തന്നെ മകന് കരുണാനിധി നല്‍കിയത്. സപ്തംബര്‍ രണ്ടിന് ഉദയനിധി സ്റ്റാലിന്‍ ആഹ്വാനം ചെയ്തത് സനാതന ധര്‍മ്മത്തെ ഉന്മൂലനം ചെയ്യാനാണ്. ഇത് യാഥാര്‍ത്ഥ്യമാക്കാന്‍ ഭാരത ജനസംഖ്യയുടെ 80 ശതമാനത്തെ കൂട്ടക്കുരുതി നടത്തണം. അതുകൊണ്ടും തീരില്ല അവരുടെ ദൗത്യം. ഭാരത ജനസംഖ്യയിലെ സനാതന ധര്‍മ്മക്കാരെ കൂട്ടക്കുരുതി നടത്തിയാലും രാജ്യത്തിനു പുറത്തുള്ള സനാതന ധര്‍മ്മക്കാര്‍ ഉണ്ടാകില്ലേ? ജി. 20 ഉച്ചകോടിക്ക് എത്തിയവരില്‍ ഒരാള്‍ ബ്രിട്ടീഷ് പ്രധാനമന്ത്രി ഋഷി സുനക് ആണ്. ഹിന്ദുവെന്നതില്‍ താന്‍ അഭിമാനിക്കുന്നു, എന്നെ ഞാനാക്കിയത് അതാണ് എന്നാണദ്ദേഹം വിമാനമിറങ്ങിയപ്പോള്‍ പറഞ്ഞത്. ബ്രിട്ടനില്‍ രക്ഷാബന്ധന്‍ പരിപാടിയില്‍ പങ്കെടുത്തെങ്കിലും ജന്മാഷ്ടമി പരിപാടിക്ക് പങ്കെടുക്കാനായില്ല എന്ന ഖേദം ഇവിടെ ക്ഷേത്ര ദര്‍ശനം നടത്തി വേണം തീര്‍ക്കാന്‍ എന്നും പറഞ്ഞു. കറകളഞ്ഞ സനാതന ധര്‍മ്മക്കാരന്‍. ഇവനെ തട്ടണ്ടേ? അദ്ദേഹത്തെ ഉന്മൂലനം ചെയ്താലും പ്രശ്‌നം തീരില്ലല്ലോ ഉദയനിധി സ്റ്റാലിന്‍!

ജി 20ന് എത്തിയ അമേരിക്കന്‍ ഉപ പ്രധാനമന്ത്രി കമലഹാരിസ് അപ്പോഴും ബാക്കിയല്ലേ? സുറിനാമിലെ ഒമ്പതാംപ്രസിഡന്റ് ചന്ദ്രശേഖര പ്രസാദ് ഗാന്‍ സന്തോഷ്, മൗറീഷ്യസ് ഭരണം കയ്യാളിയ പ്രവിന്ദ് കുമാര്‍ ജുഗ്‌നാതു, പൃത്ഥിരാജ് സിംഗ് രൂപൂണ, സിങ്കപ്പൂരിലെ തര്‍മന്‍ ഷണ്‍മുഖ രത്‌നം, കനഡയിലെ ഫെഡറല്‍ മന്ത്രി അനിതാ ആനന്ദ്, ന്യൂസിലാന്റിലെ പ്രിയന്‍സ രാധാകൃഷ്ണന്‍, ആസ്‌ത്രേലിയന്‍ മന്ത്രിസഭയിലെ ദേവാനന്ദ ദേവശര്‍മ തുടങ്ങി ഉദയനിധി സ്റ്റാലിന്‍ ലിസ്റ്റു തയ്യാറാക്കേണ്ടവര്‍ നിരവധിയാണ്. 15 രാജ്യങ്ങളില്‍ ക്യാബിനറ്റ് റാങ്ക് വഹിക്കുന്ന ഭാരതവംശജര്‍ 60 ലധികമാണ്. അതില്‍ ഏറെയും സനാതന ധര്‍മ്മ പാരമ്പര്യമുള്ളവരാണ്. ലോക ജനസംഖ്യയില്‍ 32 കോടി ഭാരതവംശജരാണെന്നാണ് വിദേശകാര്യ വകുപ്പിന്റെ കണക്ക്. അതില്‍ ബഹുഭൂരിപക്ഷവും സനാതന ധര്‍മ്മക്കാര്‍ തന്നെ. ഇവരെയൊക്കെ ഉന്മൂലനം ചെയ്യാന്‍ രണ്ടു സ്റ്റാലിന്മാരുടെ കയ്യിലുമുള്ള വാളിന് നീളം തികയുമോ?