No products in the cart.
Add Kesari Weekly as a preferred source on Google
മാധ്യമവിചാരണ അധാര്മ്മികം: പി.എസ്. ശ്രീധരന്പിള്ള
മാധ്യമങ്ങളിലൂടെ വിചാരണ ചെയ്യപ്പെടുന്ന പുതിയ പ്രവണത അധാര്മ്മികമാണെന്ന് ബഹു. ഗോവ ഗവര്ണര് അഡ്വ. പി.എസ്. ശ്രീധരന്പിള്ള.
പക്ഷപാതപരമായി വിധി നിര്ണയിക്കാന് ന്യായാധിപന്മാരെ ഇത്തരം മാധ്യമചര്ച്ചകള് പ്രേരിപ്പിക്കുമെന്നും ഏതുരംഗത്തെയും പോലെ മാധ്യമരംഗത്തും ധാര്മ്മികതയാണ് മര്മ്മപ്രധാനം എന്ന ബോധമില്ലാത്തുകൊണ്ടാണ് ഇത്തരം ചര്ച്ചകള് സംഭവിക്കുന്നതെന്നും അദ്ദേഹം പറഞ്ഞു. മഹാത്മാഗാന്ധി കോളേജ് ഓഫ് മാസ് കമ്മ്യൂണിക്കേഷന്റെ വെബ്സൈറ്റ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
മാധ്യമപ്രവര്ത്തനം ഇന്ത്യന് സ്വാതന്ത്ര്യസമരപ്രസ്ഥാനത്തിന്റെ മര്മ്മങ്ങളിലൊന്നാണ്. ഗാന്ധിജിയുടെ ജീവിതത്തിന്റെ മര്മ്മവും ധര്മ്മമാണ്. വ്യത്യസ്തതകളെ മാനിക്കലാണ് ഭാരതീയ ധര്മ്മം. വൈവിധ്യങ്ങളില് അഭിരമിക്കാം. എന്നാല് അത് വൈരുദ്ധ്യമാകരുത് അദ്ദേഹം പറഞ്ഞു.
മാധ്യമങ്ങള് നിര്ണായകമായ സ്വാധീനശക്തി: സ്വാമി വിവേകാമൃതാനന്ദപുരി
കോഴിക്കോട്: മാധ്യമങ്ങള് സമൂഹത്തിലെ നിര്ണായകമായ സ്വാധീനശക്തിയാണെന്ന് കോഴിക്കോട് അമൃതാനന്ദമയി മഠം അദ്ധ്യക്ഷന് സ്വാമി വിവേകാമൃതാനന്ദപുരി. പരിപാടിയില് അനുഗ്രഹ ഭാഷണം നടത്തുകയായിരുന്നു അദ്ദേഹം. മാധ്യമങ്ങള് മനുഷ്യന്റെ സമസ്ത ജീവിതത്തേയും സ്വാധീനിക്കുന്നുണ്ട്. സാധാരണ ജനങ്ങള്ക്ക് സത്യവും അസത്യവും ഏതെന്ന് വേര്തിരിച്ചറിയാന് സഹായിക്കുകയെന്നതാണ് മാധ്യമങ്ങളുടെ കടമ. മൂല്യാധിഷ്ഠിതമായ പ്രവര്ത്തനമാണ് ഈ മേഖലയില് ആവശ്യം. മഹാത്മാഗാന്ധി സ്കൂള് ഓഫ് മാസ് കമ്മ്യൂണിക്കേഷന് ഇക്കാര്യം ഫലപ്രദമായി നിറവേറ്റുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു.
ADVERTISEMENT
പുതിയ മാധ്യമ സംസ്കാരം സൃഷ്ടിക്കണം: അഡ്വ. പി.കെ. ശ്രീകുമാര്
കോഴിക്കോട്: മാധ്യമ മേഖലയില് പുതിയ സംസ്കാരം സൃഷ്ടിക്കാന് പ്രവര്ത്തനം ആരംഭിക്കുന്ന മീഡിയ സ്കൂളിലൂടെ സാധിക്കുമെന്ന് ഹിന്ദുസ്ഥാന് പ്രകാശന് ട്രസ്റ്റ് മാനേജിംഗ് ട്രസ്റ്റി അഡ്വ. പി.കെ. ശ്രീകുമാര് പറഞ്ഞു. ചടങ്ങില് അദ്ധ്യക്ഷ ഭാഷണം നടത്തുകയായിരുന്നു അദ്ദേഹം. മാധ്യമ മേഖലയില് ഗാന്ധിജി തന്റേതായ നിലയില് വ്യക്തിമുദ്ര പതിപ്പിച്ചിട്ടുണ്ട്. പത്രാധിപര് എന്ന നിലയില് അദ്ദേഹം മികച്ച സംഭാവനകളാണ് നല്കിയിട്ടുള്ളത്. മാധ്യമ പ്രവര്ത്തനത്തെ സ്വാതന്ത്ര്യസമരവുമായി ബന്ധിപ്പിക്കാന് അദ്ദേഹത്തിന് സാധിച്ചു. ഗാന്ധിജിയുടെ പേരില് ആരംഭിക്കുന്ന മീഡിയ സ്കൂള് അദ്ദേഹത്തിന്റെ ദര്ശനങ്ങളില് നിന്ന് പ്രേരണ ഉള്ക്കൊള്ളുന്നതായിരിക്കുമെന്നും അദ്ദേഹം കൂട്ടിച്ചേര്ത്തു.
ദേശീയബോധവും സാമൂഹിക പ്രതിബദ്ധതയും ആവശ്യം: ഡോ. എന്.ആര്. മധു
കോഴിക്കോട്: മാധ്യമപ്രവര്ത്തകര്ക്ക് ദേശീയബോധവും സാമൂഹിക പ്രതിബദ്ധതയും ആവശ്യമാണെന്ന് കേസരി മുഖ്യപത്രാധിപര് ഡോ. എന്.ആര്. മധു പറഞ്ഞു. ചടങ്ങില് ആമുഖപ്രഭാഷണം നടത്തുകയായിരുന്നു അദ്ദേഹം. ഇത്തരമൊരു മീഡിയ സ്കൂള് യാഥാര്ത്ഥ്യമാവുന്നതിലൂടെ നിരവധി ആളുകളുടെ വളരെക്കാലത്തെ സ്വപ്നമാണ് സാക്ഷാത്കരിക്കപ്പെടുന്നത്. കേരളത്തിന്റെ മാധ്യമ രംഗത്ത് നവീനമായ മാധ്യമ സംസ്കാരം സൃഷ്ടിക്കാന് മഹാത്മാ ഗാന്ധി സ്കൂള് ഓഫ് മാസ് കമ്മ്യൂണിക്കേഷന് പ്രതിജ്ഞാബദ്ധമാണ്. പ്രമുഖരും പ്രഗത്ഭരുമായ നിരവധി പേരുടെ പങ്കാളിത്തം ഈ സംരംഭത്തിന് ഉണ്ടെന്നും അദ്ദേഹം കൂട്ടിച്ചേര്ത്തു.
മാധ്യമങ്ങളുടെ ഗുണനിലവാരം വര്ധിക്കണം: പി.എസ്. രാകേഷ്
കോഴിക്കോട്: മാധ്യമപ്രവര്ത്തനത്തിന്റെ ഗുണമേന്മ ഇനിയും വര്ധിക്കേണ്ടതുണ്ടെന്ന് കാലിക്കറ്റ് പ്രസ് ക്ലബ്ബ് സെക്രട്ടറി പി.എസ്.രാകേഷ് പറഞ്ഞു. ചടങ്ങില് ആശംസാ ഭാഷണം നടത്തുകയായിരുന്നു അദ്ദേഹം. മാധ്യമ മേഖല വലിയ പ്രതിസന്ധികള് നേരിടുകയാണ്. മാധ്യമങ്ങള്ക്ക് സമൂഹത്തില് നിന്ന് നിരന്തരം വിമര്ശനങ്ങള് ഏറ്റുവാങ്ങേണ്ടിവരുന്നുണ്ട്. എന്നാല് ജനാധിപത്യ മൂല്യങ്ങള് ശക്തിപ്പെടുത്തുന്നതില് മാധ്യമങ്ങള് വഹിക്കുന്ന പങ്ക് വളരെ വലുതാണെന്നും അദ്ദേഹം പറഞ്ഞു.
മീഡിയ സ്കൂളിന്റെ പ്രൊമോ വീഡിയോ അഡ്വ. കെ.കെ. ബാലറാമും ബ്രോഷര് പ്രകാശനം കോഴിക്കോട് അമൃതാനന്ദമയി മഠം അദ്ധ്യക്ഷന് സ്വാമി വിവേകാമൃതാനന്ദപുരിയും നിര്വ്വഹിച്ചു.
ഹിന്ദുസ്ഥാന് പ്രകാശന് ട്രസ്റ്റ് മാനേജിംഗ് ട്രസ്റ്റി അഡ്വ. പി.കെ. ശ്രീകുമാര് അദ്ധ്യക്ഷനായി. കേസരി മുഖ്യപത്രാധിപര് ഡോ. എന്.ആര്. മധു ആമുഖഭാഷണം നടത്തി. കാലിക്കറ്റ് പ്രസ് ക്ലബ് സെക്രട്ടറി പി.എസ്. രാകേഷ് ആശംസകള് നേര്ന്നു. എ.കെ. അനുരാജ് സ്വാഗതവും സി.എം. രാമചന്ദ്രന് നന്ദിയും പറഞ്ഞു.
Related Posts
Latest
