ഹിന്ദുവിരോധപ്പനി ബാധിച്ച പത്രാധിപന്മാര്‍

രാജ്യത്തെ ചില പത്രാധിപ വന്‍സ്രാവുകള്‍ക്ക് ഇയ്യിടെ കടുത്ത പനി! കോവിഡിനേക്കാള്‍ മാരകമായതാണത്രെ ഈ വിറയല്‍ ജ്വരം. ഇതിന്റെ ഒന്നാമത്തെ ലക്ഷണം മുസ്ലിം എന്നു കേട്ടാല്‍ കണ്ണില്‍ നിന്നും കുടുകുടെ കണ്ണീരൊഴുകും എന്നതാണ്. ഹിന്ദു എന്നു കേട്ടാല്‍ ശരീരം ചുട്ടുപൊള്ളും. കോണ്‍ഗ്രസ്സിനെയും സി.പി.എമ്മിനെയുമൊക്കെ ഈ വൈറസ് ബാധിച്ചിരുന്നു. ഇപ്പോള്‍ ഇതിന്റെ ഗുരുതരാവസ്ഥ ഏതാനും പത്രാധിപന്മാരിലാണ് കാണുന്നത്. മോദി പ്രധാനമന്ത്രിയായതോടെ ഇവര്‍ക്ക് ലക്ഷണങ്ങള്‍ കണ്ടു തുടങ്ങിയിരുന്നു. ഇടയ്ക്കിടെ കൂട്ടായി ഒപ്പുവെച്ച് മുസ്ലിങ്ങള്‍ അരക്ഷിതരാണ് എന്ന് പ്രസ്താവിക്കുന്ന സ്വഭാവം രോഗത്തിന്റെ ഭാഗമാണ്. ഹിന്ദു പത്രത്തിന്റെ എന്‍.റാം, മൃണാള്‍പാണ്ഡെ, ടെലഗ്രാഫിന്റെ ആര്‍.രാജഗോപാല്‍, ദി വയറിന്റെ സിദ്ധാര്‍ത്ഥ് വരദരാജന്‍, കാരവനിന്റെ വിനോദ് ജോസ് തുടങ്ങിയവര്‍ക്കാണ് ഈ രോഗബാധ ഇപ്പോള്‍ വളരെ കൂടിയിരിക്കുന്നത്. രോഗം പെട്ടെന്ന് മൂര്‍ച്ഛിക്കാന്‍ രണ്ടു കാരണമാണുണ്ടായത്. ഒന്ന്, കശ്മീര്‍ ഫയല്‍സ് എന്ന സിനിമ പുറത്തിറങ്ങിയതും അതിനു പ്രതീക്ഷിക്കാത്തവിധത്തില്‍ ജനങ്ങളെ സ്വാധീനിക്കാനായതും. രണ്ടാമത്തേത്, കര്‍ണ്ണാടകയിലെ ഹിജാബ് വിവാദം.

പനി മൂര്‍ച്ഛിച്ചപ്പോള്‍ ഇവര്‍ കേള്‍ക്കുന്നതൊക്കെ ഹിന്ദു അപകടത്തിലാണ്, മുസ്ലിങ്ങള്‍ നാട്ടിന് ഭീഷണിയാണ് എന്ന പ്രചരണം മാത്രം. ഉടനെ രോഗികളെല്ലാം ചേര്‍ന്ന് ഒരു പ്രസ്താവനയില്‍ ഒപ്പുവെച്ചു പത്രങ്ങള്‍ക്ക് നല്‍കി. ഹിന്ദുത്വക്കാരുടെ പ്രചരണം അവസാനിപ്പിക്കാന്‍ രാഷ്ട്രപതിയും സുപ്രീംകോടതിയും ഹൈക്കോടതിയും തിരഞ്ഞെടുപ്പു കമ്മീഷനുമൊക്കെ ഒന്നായി ഇടപെടണമെന്നാണ് പത്രക്കുറിപ്പിലെ ആവശ്യം. പ്രസ് കൗണ്‍സിലും വാര്‍ത്താ പ്രക്ഷേപണക്കാരും എല്ലാം ചേര്‍ന്ന് ഹിന്ദുക്കളെ മയക്കിക്കിടത്തി അധിനിവേശ ശക്തികളുടെ ആധിപത്യത്തിന് ഓശാന പാടണമെന്ന വ്യംഗ്യമായ ആവശ്യവും പത്രക്കുറിപ്പിലുണ്ട്.