നല്ല ദേശീയ മാതൃകകള് ഉള്ളപ്പോള് നാമെന്തിന് വിദേശിയുടെ വഴി തേടണം? ഭാരതത്തില് ഇത്തരം ചിന്ത തീവ്രമാകുകയാണ്. ചികിത്സാരംഗത്ത് ഭാരതത്തിനുള്ള പൈതൃകം മറ്റൊരു രാജ്യത്തിനും അവകാശപ്പെടാനില്ല. പിന്നെ നാമെന്തിന് യൂറോപ്യന്മാരുടെ വൈദ്യപ്രതിജ്ഞയ്ക്ക് പിന്നാലെ പോകണം? ഇപ്പോള് നമ്മുടെ മെഡിക്കല് വിദ്യാര്ത്ഥികള് ഹിപ്പോക്രാറ്റസ് പ്രതിജ്ഞയാണെടുക്കുന്നത്. 1948 ല് ലോകമെഡിക്കല് അസോസിയേഷന് ആണ് പ്രാചീന ഗ്രീക്ക് ഭിഷഗ്വരനായ ഹിപ്പോക്രാറ്റസിന്റെ പേരില് പ്രതിജ്ഞ ആരംഭിച്ചത്. നമ്മുടെ മെഡിക്കല് കമ്മീഷനും അത് കോപ്പിയടിച്ചു. അതിലും പഴക്കമുള്ള ചരകന്റെ പൈതൃകമാണ് നമുക്കുള്ളത്. നമുക്ക് ഹിപ്പോക്രാറ്റസ് പ്രതിജ്ഞയ്ക്ക് പകരം എന്തുകൊണ്ട് ചരകശപഥം സ്വീകരിച്ചു കൂടാ? ദേശീയ മെഡിക്കല് കമ്മീഷന് ഇങ്ങനെ മാറിചിന്തിച്ചു.
ഇനി നമ്മുടെ മെഡിക്കല് വിദ്യാര്ത്ഥികള് ചരക പ്രതിജ്ഞയെടുക്കട്ടെ എന്നവര് തീരുമാനിച്ചു. ഇതിന് അംഗീകാരം കിട്ടിയാല് ഇനിയുള്ള വിദ്യാര്ത്ഥികള് പുതിയ പ്രതിജ്ഞ സ്വീകരിക്കും. ചരകനെക്കുറിച്ചും ഭാരതത്തിന്റെ വൈദ്യ പാരമ്പര്യത്തെക്കുറിച്ചും വിദ്യാര്ത്ഥികളില് അഭിമാനം വളരും. വെള്ള കോട്ട് സ്വീകരിക്കുന്ന ചടങ്ങിലും അവസാന വര്ഷ ബിരുദദാന ചടങ്ങിലും ചരകന് ശപഥമാവും ഇനിയുണ്ടാവുക. ഓരോ ഭാരതീയന്റെയും ആത്മാഭിമാനം വര്ദ്ധിപ്പിക്കുന്ന ഇത്തരം നിരവധി പൊളിച്ചെഴുത്തുകള്ക്ക് മോദി ഭരണത്തില് രാജ്യം സാക്ഷ്യം വഹിക്കുകയാണ്.