സ്പീക്കറുടെ ജനാധിപത്യബോധം

നമ്മുടെ സംസ്‌കാരത്തിന്റെയും ജനാധിപത്യത്തിന്റെയും മഹത്വം പഠിക്കാന്‍ കേരള നിയമസഭാ സ്പീക്കര്‍ ശ്രീരാമകൃഷ്ണന്റെ കാല്‍ക്കല്‍ തന്നെ പോയിരിക്കണം. ആ മൊഴിമുത്തുകള്‍ അടര്‍ന്നു വീഴുമ്പോള്‍ തന്നെ പിടിച്ചെടുത്ത് മനസ്സില്‍ സൂക്ഷിച്ചുവെക്കണം. അദ്ദേഹം മൊഴിയുകയാണ്: ”നമ്മുടെ സംസ്‌കാരത്തിന് നശീകരണമാനം മാത്രമേയുള്ളുവെന്നാണ് ചിലര്‍ വിശ്വസിക്കുന്നതും പ്രചരിപ്പിക്കാന്‍ ശ്രമിക്കുന്നതും. ആളുകള്‍ക്ക് സംവദിക്കാനും വിയോജിക്കാനും സാധിക്കുന്ന നിരവധി സംഭവങ്ങളാണ് പുരാണങ്ങളിലുള്ളത്. വിവിധതരം സംവാദങ്ങളുടെ സംഭരണിയാണ് നമ്മുടെ സംസ്‌കാരം. പുരാണങ്ങളെയും അവയിലെ കഥാപാത്രങ്ങളെയും നമ്മുടെ വായനയുടെയും ധാരണയുടെയും അടിസ്ഥാനത്തില്‍ വ്യാഖ്യാനിക്കാം. അവ ആരുടെയും സ്വകാര്യസ്വത്തല്ല” – ഇങ്ങനെ പോകുന്ന ഇയ്യിടെ കോഴിക്കോട്ടെ ഒരു പുസ്തകപ്രകാശനച്ചടങ്ങിലെ അദ്ദേഹത്തിന്റെ വാക്കുകള്‍.

Add Kesari Weekly as a preferred source on Google

‘ജയ്ശ്രീരാം വിളി കേള്‍ക്കാന്‍ വയ്യെങ്കില്‍ ചന്ദ്രനിലേക്ക് പോയ്ക്കൊള്ളു’ എന്ന് അടൂര്‍ ഗോപാലകൃഷ്ണനോട് ബി.ജെ.പി. വക്താവ് ബി.ഗോപാലകൃഷ്ണന്‍ അഭിപ്രായപ്പെട്ടതാണ് സ്പീക്കറില്‍ നിന്നും ഇത്തരം മഹത് വചനങ്ങള്‍ പുറത്തുവരുന്നതിനുള്ള പ്രകോപനമായത്.

അടൂര്‍ ഗോപാലകൃഷ്ണന് സ്വന്തം അഭിപ്രായം പറയാം. സ്പീക്കര്‍ ശ്രീരാമകൃഷ്ണനും സ്വന്തം അഭിപ്രായം പറയാം. എന്നാല്‍ ബി.ഗോപാലകൃഷ്ണന് അതിനോട് വിയോജിക്കാനുള്ള സ്വാതന്ത്ര്യം സ്പീക്കറുടെ ജനാധിപത്യത്തില്‍ ഇല്ല. സ്വന്തം പാര്‍ട്ടിഗ്രാമങ്ങളില്‍ പോയി വിയോജിക്കാനുള്ള അഭിപ്രായം നടപ്പാക്കാന്‍ സ്പീക്കര്‍ സാറിന് ഒന്നു ഉപദേശിക്കാമോ? 2015 മാര്‍ച്ച് 13ന് നിയമസഭയില്‍ പേക്കൂത്തു നടത്തി സ്പീക്കറുടെ കസേരയും ഉപകരണങ്ങളും തകര്‍ത്ത 6 ഇടതു എം.എല്‍.എമാരുടെ പേരിലുള്ള കേസ് റദ്ദാക്കാന്‍ തീരുമാനിച്ച സര്‍ക്കാരിന്റെ ഭാഗമായ സ്പീക്കര്‍ക്ക് ജനാധിപത്യത്തെക്കുറിച്ചും നമ്മുടെ നാടിന്റെ സം സ്‌കാരത്തെക്കുറിച്ചും പറയാന്‍ എന്തു ധാര്‍മ്മികതയാണുള്ളത്?