മമത ബംഗാളിന്റെ പ്രധാനമന്ത്രി!

മമത ബാനര്‍ജി ബംഗാളിന്റെ മുഖ്യമന്ത്രിയല്ല; പ്രധാനമന്ത്രിയാണ്. അതിനാല്‍ ഭാരത പ്രധാനമന്ത്രിക്ക് ബംഗാളി ലെത്തിയാല്‍ അവരെ കാണാന്‍ അരമണിക്കൂര്‍ കാത്തിരിക്കണം. എന്നാല്‍ തന്നെ ഏതാനും മിനുറ്റുകളുടെ ദര്‍ശനത്തിനേ അനുവാദമുള്ളു. ഇപ്പോള്‍ മനസ്സിലായില്ലേ ബംഗാള്‍ പ്രധാനമന്ത്രിയ്ക്ക് ഭാരതപ്രധാനമന്ത്രിയേക്കാള്‍ വിലയുണ്ടെന്ന്. ബംഗാള്‍ പ്രധാനമന്ത്രിയ്ക്ക് അഹിതമായ ഒരു കാര്യം പോലും കേന്ദ്രം ചെയ്തുപോകരുത്. അവിടെ എന്തു നടക്കുന്നു എന്ന് അന്വേഷിക്കരുത്. കേന്ദ്രം അയക്കുന്ന ഐ.എ.എസ്. ഉദ്യോഗസ്ഥന്മാരെ തിരിച്ചുവിളിക്കാന്‍ പാടില്ല. തൃണമൂലുകാര്‍ ബി.ജെ.പി പ്രവര്‍ത്തകരെ തെരുവിലിട്ട് തല്ലിയാലും മാനഭംഗപ്പെടുത്തിയാലും ചോദിക്കാന്‍ പാടില്ല. രാജ്യത്തിന്റെ നിയമമല്ല ബംഗാളില്‍. ബംഗാളില്‍ മമതയുടെ നിയമമാണ് നടപ്പാവുക. കേന്ദ്രം നിശ്ചയിച്ച ഗവര്‍ണര്‍ കേവലം നോക്കുകുത്തി; ശല്യക്കാരന്‍.

Add Kesari Weekly as a preferred source on Google

ബംഗാളിലെ ചുഴലിക്കാറ്റ് ദുരന്തബാധിതപ്രദേശത്ത് വിമാന നിരീക്ഷ ണത്തിനെത്തിയ പ്രധാനമന്ത്രി ദുരിതാശ്വാസപ്രവര്‍ത്തനം വിലയിരുത്താന്‍ വിളിച്ചയോഗത്തിന് അരമണിക്കൂര്‍ വൈകിയാണ് മമത എത്തിയത്. തന്റെ കയ്യിലുള്ള ചില കടലാസ്സുകള്‍ പ്രധാനമന്ത്രിയ്ക്ക് നല്‍കിയ ശേഷം വന്നതിലും വേഗത്തില്‍ തിരിച്ചുപോയി. ചീഫ് സെക്രട്ടറിയെയോ ഹോം സെക്രട്ടറിയെയോ യോഗത്തില്‍ പങ്കെടുക്കാന്‍ അനുവദിച്ചതുമില്ല. നിയമസഭയിലെ പ്രതിപക്ഷനേതാവ് സുവേന്ദു അധികാരിയെ യോഗത്തിനു വിളിച്ചതാണ് മമതയെ പ്രകോപിച്ചത്. മോദി ബംഗാളിലെ പ്രതിപക്ഷനേതാവിനെ മാത്രമല്ല ലോകസഭയിലെ പ്രതിപക്ഷനേതാവ് അദിര്‍രഞ്ജന്‍ ചൗധരിയേയും വിളിച്ചിരുന്നു. വാക്‌സിന്‍ സര്‍ട്ടിഫിക്കറ്റില്‍ മോദിക്കുപകരം തന്റെ ചിത്രം വെച്ച മമത താനാണ് ബംഗാള്‍ പ്രധാനമന്ത്രി എന്നു പ്രഖ്യാപിച്ചിരിക്കയാണ്.