ഹിന്ദുവിരോധം ഹിന്ദുസ്ഥാന്‍ വിരോധമായപ്പോള്‍

ഹിന്ദുവിരോധമാണ് ഒവൈസിയുടെ എ.ഐ.എം.ഐ.എം. എന്ന രാഷ്ട്രീയ പാര്‍ട്ടിയുടെ സ്വഭാവം. അവരുടെ ഈ ഹിന്ദുവിരോധം ഹിന്ദുസ്ഥാന്‍ വിരോധമായി മാറിയതെങ്ങനെയെന്ന് ഇക്കഴിഞ്ഞ ദിവസം ബീഹാര്‍ നിയമസഭാ സമ്മേളനം അനുഭവിച്ചറിഞ്ഞു. 17-ാം നിയമസഭാസമ്മേളനത്തിന്റെ സത്യപ്രതിജ്ഞാ ചടങ്ങ് നടക്കുകയാണ്. എ.ഐ.എം.ഐ.എമ്മിന്റെ അക്തറുല്‍ ഇമാമിന് താല്‍ക്കാലിക സ്പീക്കര്‍ ജതിന്റാംമാഞ്ചി സത്യപ്രതിജ്ഞ ചൊല്ലിക്കൊടുക്കുന്നു. ഹിന്ദിയിലും ഉറുദുവിലുമൊക്കെ ഈ നാടിനെ ഹിന്ദുസ്ഥാന്‍ എന്നാണ് വിളിക്കാറ്. എല്ലാവരും സത്യപ്രതിജ്ഞാവേളയില്‍ ഹിന്ദുസ്ഥാന്‍ എന്നു ഉച്ചരിച്ചു. എന്നാല്‍ അക്തറുല്‍ ഇമാം ഉറുദുവില്‍ സത്യപ്രതിജ്ഞചൊല്ലിയിട്ടും ‘ഹിന്ദുസ്ഥാന്‍’ എന്നു ഉച്ചരിച്ചില്ല. മാഞ്ചി രണ്ടുതവണ തിരുത്തിയിട്ടും ഇമാം ‘ഹിന്ദുസ്ഥാന്‍’ എന്നു പറഞ്ഞില്ല. പാകിസ്ഥാന്‍ എന്നു പറയാന്‍ പറ്റാത്തതുകൊണ്ടാവാം ഗതികേടിലായ ഇമാം ‘ഭാരതം’ എന്നു പറഞ്ഞു. ഇമാമിന്റെ കള്ളക്കളി കണ്ട് മറ്റു സാമാജികര്‍ പൊട്ടിച്ചിരിച്ചു. ‘ഹിന്ദുസ്ഥാന്‍ എന്ന് ഉച്ചരിക്കാന്‍ മടിയുള്ളവര്‍ പാകിസ്ഥാനില്‍ പോയിക്കോട്ടെ’ എന്നു പോലും ചിലര്‍ പ്രതികരിച്ചു.

ഇതേ നിയമസഭാ സമ്മേളനവേദി ഇതിനു വിരുദ്ധമായ ഒരു കാഴ്ചകൂടി കണ്ടു. ബീഹാറിലെ കോണ്‍ഗ്രസ്സിന്റെ നിയമസഭാംഗമായ ഷഖീല്‍ അഹമ്മദ് ഖാന്‍ സംസ്‌കൃത ഭാഷയില്‍ സത്യപ്രതിജ്ഞ ചൊല്ലി. സത്യപ്രതിജ്ഞ കഴിഞ്ഞ ഉടനെ നിയമസഭാവേദി നീണ്ട കരഘോഷം കൊണ്ടു മുഖരിതമായി. ഇമാം ഉണ്ടാക്കിയ നാണക്കേട് അഹമ്മദ്ഖാന്‍ കഴുകിക്കളഞ്ഞു എന്ന് ചിലര്‍ പ്രതികരിച്ചു. ‘യാഥാസ്ഥിതിക മനോഭാവം കൊണ്ടു സമൂഹത്തില്‍ വികസനം ഉണ്ടാവില്ല. അതിനാല്‍ നാം സ്‌നേഹവും സാഹോദര്യവും വളര്‍ത്തണം’ എന്നാണ് അഹമ്മദ് ഖാന്‍ പിന്നീട് പറഞ്ഞത്. ഇതു രണ്ട് മാതൃകകളാണ്. ഭാരതത്തിലെ മുസ്ലിങ്ങള്‍ക്കു മുമ്പിലുള്ള രണ്ടു മാതൃകകള്‍.