പാര്ലമെന്റില് കോണ്ഗ്രസ്സിന്റെ അംഗസംഖ്യ കൂട്ടാന് കേരളത്തില് നിന്നുള്ള എം.പിമാര്ക്ക് സാധിച്ചുവെങ്കിലും ഉത്തരേന്ത്യന് നേതൃത്വത്തിനുമുമ്പില് വെള്ളം കോരാനും വിറകുവെട്ടാനുമേ അവര്ക്ക് യോഗമുള്ളു. ലോകസഭയില് ഏറ്റവും സീനിയറായ കോണ്ഗ്രസ് എം.പി. കൊടിക്കുന്നില് സുരേഷാണ്. ഹിന്ദിയില് സത്യപ്രതിജ്ഞ ചൊല്ലി സുരേഷ് സഭയുടെ കയ്യടി വാങ്ങുകയും ചെയ്തു. എന്നാല് അക്കാരണത്താല് തന്നെ സോണിയ സുരേഷിനെ ശാസിക്കുകയാണുണ്ടായത്. ലോകസഭയിലെ കക്ഷിനേതാവ് എന്ന സ്ഥാനവും സുരേഷിനു കൊടുത്തില്ല. പകരം ബംഗാളില് നിന്നുള്ള സവര്ണനായ ആദിര് രഞ്ജന് ചൗധരിയ്ക്കാണു ആ സ്ഥാനം നല്കിയത്. സുരേഷിന്റെ ഹിന്ദി മോശമായതിനാലാണത്രേ തഴഞ്ഞത്.
കേരളത്തിലെ കോണ്ഗ്രസ് എം.പി.മാര്ക്ക് പാര്ട്ടിയുടെ തഴയലിനു വിധേയരാകാനാണ് യോഗമെങ്കിലും അവര് തങ്ങളുടെ വീരശൂരപരാക്രമം കാണിക്കുന്നതില് ഒട്ടും മിടുക്കു കുറച്ചിട്ടില്ല. സത്യപ്രതിജ്ഞ ചെയ്യാനെത്തിയ പ്രജ്ഞാസിംഗ് താക്കൂറിനെ അവര് ശല്യം ചെയ്തു. പ്രതിജ്ഞ ചൊല്ലുമ്പോള് പ്രജ്ഞ സ്വന്തം പേരിനൊപ്പം ഗുരുവിന്റെയും പരമ്പരയുടെയും പേരു പറഞ്ഞു എന്നതാണ് അവര് കണ്ട വലിയ അപരാധം. സന്യാസിമാര് സ്വന്തം പേരിനൊപ്പം ഗുരുവിന്റെയും പരമ്പരയുടെയും പേരു പറയുന്നത് സാധാരണം. സന്യാസി നാമം കേട്ടപ്പോള് ‘മതേതര’ കോണ്ഗ്രസ്സുകാര്ക്കു ഹാലിളകി. കേരളത്തിലെ യു.ഡി.എഫ് എം.പിമാര് സഭയില് തിളങ്ങി എ ന്നാണ് ഒരു ഇസ്ലാമിസ്റ്റ് പത്രം എഴുതിയത്. ഈ സമയം സോണിയയും രാഹുലും സഭയില് കൂളായി ഇരിക്കുകയായിരുന്നു. അവര്ക്ക് പ്രജ്ഞ ചെയ്തതില് ഒരു ക്ഷോഭവും ഉണ്ടായില്ല. വിറകുവെട്ടികള്ക്ക് മാത്രമേ ഇത്തരം അവസരങ്ങളില് ‘തിളങ്ങാ’ നാകൂ!