അച്ഛന്‍

ഒറ്റയ്ക്കിരിക്കുമ്പോളെന്‍
മനസ്സിലോടിയെത്തുന്നു
ഇരുട്ടു ചാലിച്ചുള്ള
വാര്യത്തെ കുട്ടിക്കാലം

Add Kesari Weekly as a preferred source on Google

അകത്തും പുറത്തും
നടുമുറ്റത്തും ചുറ്റും
നനുത്ത വെളിച്ചം മാത്രം
വാര്യത്തെ ധാരാളിത്തം

ചിമ്മിണി വിളക്കിന്റെ
കടും പുകച്ചുരുള്‍ തീര്‍ക്കും
കറുത്ത ചുമര്‍ ചിത്ര
ഭീകര സമസ്യകള്‍

ADVERTISEMENT

അമ്മൂമ്മ വര്‍ണ്ണിച്ചങ്ങു
പെരുത്ത മാരീചന്റെ
കരാള രൂപം
പടിഞ്ഞാറ്റയി
ലൊളിക്കുന്നു

കോമ്പിരയ്ക്കുള്ളില്‍
കാവലിരിപ്പുണ്ടു
കുട്ടിച്ചാത്തന്‍
ചില്ലറത്തുട്ടില്‍ തൊട്ടാല്‍
കൈവിരല്‍ പൊള്ളിക്കുന്നോന്‍

അമ്പലപ്പറമ്പിലെ
ആല്‍മരച്ചില്ല മേളില്‍
ആയിരം മിന്നാ മിന്നി
ച്ചൂട്ടുകള്‍ പറക്കുന്നു

ചൂട്ടുകളാടിപ്പാടി
നാട്ടിട കടക്കുമ്പോള്‍
അച്ഛന്റെ ചുമയും
മൂളിപ്പാട്ടുമെന്‍ കൂടെക്കൂടും

തിണ്ണയിലിരുന്നച്ഛന്‍ വലിക്കും
ബീഡിച്ചുരുള്‍
ചുവട്ടിലിരുന്നു ഞാന്‍
പഠിച്ച പാഠം ചൊല്ലും

അച്ഛന്റെ വെളിച്ചത്തില്‍
ഇരുണ്ട ഭൂഖണ്ഡങ്ങള്‍
കടന്നു കിനാവിന്റെ
താഴ്‌വര പൂകുന്നുണ്ടാം

കണ്‍ തുറക്കുമ്പോള്‍ ചുറ്റും
വെളിച്ചം!
അച്ഛന്നൊപ്പം നടന്നു
കരേറി ഞാനിരുട്ടിന്‍
മഹാഗര്‍ത്തം

കളിച്ചും ചിരിച്ചും മെല്ലെ
തിരിച്ചു വരുമ്പോഴേക്കും
പകച്ചു പോകുന്നയ്യോ
ഇരുട്ടത്തായീ വീണ്ടും!

ദൂരേക്കു നോക്കിക്കൊണ്ടേ
യിരിപ്പാണിരുട്ടത്ത്
കൂരിരുള്‍ ഛേദിക്കുന്ന
വെളിച്ചം
വന്നെങ്കിലോ?