മധുരിക്കുന്ന ഓര്‍മ്മകളുടെ കോഴിക്കോട്‌

സാമൂതിരിയുടെ സാമ്രാജ്യം എന്നും നന്മയുടെ പ്രതീകമായിരുന്നു. കാലദേശങ്ങള്‍ക്കതീതമായി സകലരെയും സ്വീകരിച്ച നഗരം. എന്നും നന്മകള്‍ കൊണ്ട് സ്‌നേഹസമ്പന്നമായ പട്ടണം. അതായിരുന്നു കോഴിക്കോട്, അതാണ് കോഴിക്കോട്. മാനവേദന്‍ ചിറ മാനഞ്ചിറയായപ്പോഴും അതിനെ ചുറ്റിപ്പറ്റി ചരിത്രവും ഐതിഹ്യങ്ങളും നിറഞ്ഞു നിന്നു. അറബികള്‍ക്ക് ആതിഥ്യമരുളിയ കോഴിക്കോട് കേരളത്തിലെ പ്രമുഖ വ്യവസായ നഗരമായിരുന്നു ഒരു കാലത്ത്. ലോകത്തിലെ ഏറ്റവും വലിയ മരവ്യവസായം കല്ലായിപ്പുഴ കേന്ദ്രീകരിച്ചു നടന്നിരുന്നു. ആ കോഴിക്കോടിനെ വിലയിരുത്തുന്ന അപൂര്‍വ്വ പുസ്തകമാണ് ജോണ്‍ അഗസ്റ്റിന്‍ എഡിറ്റ് ചെയ്ത മധുരിക്കുന്ന കോഴിക്കോട്.

Add Kesari Weekly as a preferred source on Google

കോഴിക്കോട്ടേക്ക് വന്നെത്തിയവരും കോഴിക്കോട്ടു ജനിച്ച് വളര്‍ന്നവരും അടുത്തുനിന്നും അകന്നുനിന്നും കോഴിക്കോടിനെ എങ്ങിനെ നോക്കിക്കാണുന്നു എന്നതിന്റെ മനോഹരമായ വായനാചിത്രം ഇതില്‍ കാണാം. 1956-ല്‍ കോഴിക്കോട്ടേക്ക് ജോലി ആവശ്യാര്‍ത്ഥം എത്തിയ എം.ടി. വാസുദേവന്‍ നായര്‍ക്ക് ഉണര്‍വ്വും ഉന്മേഷവും നല്‍കിയ നഗരമായി കോഴിക്കോടിനെ അദ്ദേഹത്തിന്റെ കുറിപ്പില്‍ വായിക്കാം. കവയത്രി സുഗതകുമാരി കോഴിക്കോട്ടുമായുള്ള ബന്ധം അയവിറക്കുമ്പോള്‍ കോഴിക്കോടിന്റെ ചരിത്രത്തിലൂടെ സഞ്ചരിക്കുകയാണ് ചരിത്രകാരനായ ഡോ.എം.ജി.എസ്. നാരായണന്‍. സ്‌നേഹം മാത്രം മനസ്സിലുള്ള നല്ല സുഹൃത്തുക്കളെയും അതിഥികളെ ഉള്ളറിഞ്ഞ് സല്‍ക്കരിക്കുന്ന ജനങ്ങളെയും കുറിച്ചാണ് ഏ.കെ. ആന്റണി എഴുതിയത്.

യു.കെ.കുമാരന്‍, പി.കെ. ഗോപി, യു.എ.ഖാദര്‍, സി.ശിവപ്രസാദ്, ഏ.ശാന്തകുമാര്‍, ഭാഗ്യലക്ഷ്മി ഇങ്ങനെ അറിയപ്പെടുന്നവരും അല്ലാത്തവരുമായ സാഹിത്യകാരന്മാരുടെയും എഴുത്തുകാരുടെയും പത്രപ്രവര്‍ത്തകരുടെയുമെല്ലാം ഓര്‍മ്മകളും അനുഭവങ്ങളും ചേര്‍ന്ന ഈ പുസ്തകം ഒരു മധുരിക്കുന്ന ഓര്‍മ്മ തന്നെയാണ്.

മധുരിക്കുന്ന കോഴിക്കോട്
എഡിറ്റര്‍: ജോണ്‍ അഗസ്റ്റിന്‍
ഗ്രാന്മ ബുക്‌സ്
പുതിയറ, കോഴിക്കോട് – 4
പേജ്: 472 വില: 500 രൂപ
****************************************************************************************

രുചികരവും ആരോഗ്യദായകവുമായ ഭക്ഷണം തയ്യാറാക്കുന്നതെങ്ങിനെയെന്ന് വിവരിക്കുന്ന പുസ്തകമാണ് വിനയ പി.ജിയുടെ ഔഷധമൂല്യങ്ങളുള്ള പാചകം. നമ്മുടെ ചുറ്റുവട്ടത്തുനിന്നും തന്നെ കിട്ടുന്ന ഔഷധമൂല്യങ്ങളുള്ള ഭക്ഷ്യവസ്തുക്കള്‍ ഉപയോഗപ്പെടുത്തി തയ്യാറാക്കുന്ന വിഭവങ്ങള്‍ ഇതിലുണ്ട്. ഭക്ഷ്യവിഭവങ്ങളിലടങ്ങിയിരിക്കുന്ന പോഷകങ്ങള്‍, പ്രമേഹരോഗികള്‍ക്കുള്ള നിര്‍ദ്ദേശങ്ങള്‍, കുട്ടികള്‍ക്ക് നല്‍കേണ്ട ഭക്ഷണങ്ങള്‍ എന്നിവയും പുസ്തകത്തില്‍ ഉള്‍പ്പെടുത്തിയിട്ടുണ്ട്. മാറുന്ന ആഹാരരീതികള്‍, ജീവിതശൈലീരോഗങ്ങള്‍ക്ക് കാരണമാകുന്ന ഇന്ന ത്തെ കാലഘട്ടത്തില്‍ ഭക്ഷണരീതിയിലും പഴമയിലേക്ക് ഒരു തിരിച്ചുപോക്ക് അനിവാര്യമാണ്.

ഔഷധമൂല്യങ്ങളുള്ള
പാചകം
വിനയ പി.ജി.
കറന്റ് ബുക്‌സ്, തൃശ്ശൂര്‍
പേജ്: 59 വില: 75 രൂപ

***********************************************************************

ഫാസ്റ്റ്ഫുഡിന്റേയും ജങ്ക്ഫുഡിന്റേയും പിന്നാലെ പായുന്നവര്‍ക്ക് മുന്നില്‍, പഴമയുടെ കറിക്കൂട്ടുകള്‍ പരിചയപ്പെടുത്തുകയാണ് ‘ബ്രാഹ്മിന്‍സ് വീട്ടുപാചകം’ എന്ന കൃതിയിലൂടെ ഭാനു രാജു. നമ്മുടെ മുത്തശ്ശിമാര്‍ ഉണ്ടാക്കിയിരുന്ന ഭക്ഷണങ്ങള്‍, വിശപ്പ് മാറ്റാന്‍ മാത്രമല്ല ആരോഗ്യം കാത്തുരക്ഷിക്കാന്‍ കൂടിയുള്ളതായിരുന്നു. അതുകൊണ്ടുതന്നെ ആ ഭക്ഷ്യവിഭവങ്ങള്‍ നല്ലൊരു ഔഷധക്കൂട്ടുകള്‍ കൂടിയായിരുന്നു.

രുചികരവും പോഷകസമ്പുഷ്ടമായ ഭക്ഷ്യവിഭവങ്ങള്‍ തയ്യാറാക്കുന്ന രീതി ഇതില്‍ വിവരിക്കുന്നു. ഓരോ നാടിന്റേയും കാലാവസ്ഥയ്ക്കും കൂടി അനുയോജ്യമായതായിരിക്കണം ആ നാടിന്റെ ഭക്ഷണസംസ്‌കാരം. ആരോഗ്യമുള്ള തലമുറയെ വാര്‍ത്തെടുക്കാന്‍ നമ്മുടെ ആഹാരശീലം തന്നെ മാറ്റേണ്ടിയിരിക്കുന്നു. അനാരോഗ്യകരമായ ഭക്ഷണശീലങ്ങള്‍ പാടെ ഉപേക്ഷിക്കണം. നമ്മുടെ അടുക്കളകളില്‍ ലളിതമായി പാകം ചെയ്യാന്‍ പറ്റുന്ന കറിക്കൂട്ടുകളാണ് ഗ്രന്ഥകാരി പരിചയപ്പെടുത്തുന്നത്. ആരോഗ്യമുള്ള തലമുറയെ വാര്‍ത്തെടുക്കാന്‍ ഇന്നത്തെ ഭക്ഷണശീലങ്ങളില്‍ മാറ്റംവരുത്തേണ്ടത് അത്യന്താപേക്ഷിതമാണ്.