വേടന്‍

അരുത് വേടാ എന്ന്
വാല്മീകി
പാടൂ വേടാ എന്ന്
വാഴ്ത്തുപാട്ടുകാര്‍
ഇടയില്‍ പെട്ട്
ഇഴയുന്നു
ലഹരി നുണഞ്ഞ
ക്രൗഞ്ചപ്പറവകള്‍.

Add Kesari Weekly as a preferred source on Google

നീയും ഞാനും
നിന്റെ കണ്ണുകള്‍ കാണാന്‍ ഞാനിനി
സ്വപ്നങ്ങളിലേക്കുള്ള
കിളിവാതിലുകള്‍
ഒന്നൊന്നായി തുറന്നിടും
നിന്റെ മധുരനാദം കേള്‍ക്കാന്‍
ഞാനിനി കിളിയൊച്ചകളിലേക്കു
ചെവി കൂര്‍പ്പിക്കും
നിന്റെ പാദപതനങ്ങള്‍
കേള്‍ക്കാന്‍ ഞാനിനി
മണ്ണില്‍ ചെവി ചേര്‍ത്തുകിടക്കും…
അകത്തേക്കു വലിച്ച ശ്വാസം
പുറത്തേക്കുപോകാതെ
അവിടെത്തന്നെ
തണുത്തു മരവിച്ചു
കിടക്കും വരെ.

കടല്‍
പുല്‍ത്തുമ്പിലെ
ജലകണമിപ്പഴും
അലയടിക്കുന്ന കടലിനെ
കിനാവ് കാണുന്നു
കടല്‍ കാണണമെന്ന
മോഹത്താല്‍
ഒരു ജലകണമായി
പുല്‍ത്തുമ്പില്‍ തങ്ങിനില്‍ക്കാന്‍
വെറുതെ മോഹിക്കുന്നു കടലും!