ശ്രീശങ്കരന്‍ ഭാരതത്തെ ഏകീകരിച്ച പുണ്യാത്മാവ് -സ്വാമി ചിദാനന്ദ സരസ്വതി

ന്യൂദല്‍ഹി: അദ്വൈത ദര്‍ശനത്താല്‍ ഭാരതത്തെ ഏകീകരിച്ച പുണ്യാത്മാവാണ് ശങ്കരാചാര്യ സ്വാമികള്‍ എന്ന് ഋഷികേശിലെ പരമാര്‍ത്ഥ നികേതന്‍ ആശ്രമം അധ്യക്ഷന്‍ സ്വാമി ചിദാനന്ദസരസ്വതി പറഞ്ഞു. ആദിശങ്കരാചാര്യസേവാസമിതി സംഘടിപ്പിച്ച ആദിശങ്കര ജയന്തി ആഘോഷം ‘അദ്വൈതശങ്കരം’ ഉദ്ഘാടനം ചെയ്യുകയായിരുന്നു അദ്ദേഹം. കാലടിയില്‍ ജനിച്ച അദ്ദേഹം ഭാരതം മുഴുവന്‍ സഞ്ചരിച്ച് സനാതനധര്‍മത്തിന് ശക്തി പകര്‍ന്നു. ആദിശങ്കരനെ പോലെയുള്ള യുഗപുരുഷന്മാരുടെ ജന്മംകൊണ്ട് പവിത്രമായ ഭൂമിയാണ് ഭാരതം. പുതിയകാലത്ത് സ്വയം തിരിച്ചറിവ് നേടുകയെന്നത് വളരെ സുപ്രധാനമാണ്. അതിന് നമുക്ക് ശങ്കരാചാര്യ കൃതികളെ ആശ്രയിക്കാവുന്നതാണെന്ന് അദ്ദേഹം കൂട്ടിച്ചേര്‍ത്തു. അദ്വൈതശങ്കരം ചെയര്‍മാന്‍ ജി. അശോക് കുമാര്‍ അദ്ധ്യക്ഷനായി. ഭാരതത്തിന് ആത്മീയ ഉണര്‍വ്വേകിയ മഹാപുരുഷനാണ് ശങ്കരാചാര്യരെന്ന് മാതാ അമൃതാനന്ദമയിമഠം ഉപാദ്ധ്യക്ഷന്‍ സ്വാമി അമൃതസ്വരൂപാനന്ദപുരി വീഡിയോ സന്ദേശത്തില്‍ പറഞ്ഞു. ശങ്കരാചാര്യരെ കൂടുതല്‍ അറിയേണ്ട കാലം അതിക്രമിച്ചതായി മുഖ്യപ്രഭാഷണം നടത്തിയ ഹിന്ദുഐക്യവേദി സംസ്ഥാന അദ്ധ്യക്ഷ കെ.പി. ശശികല ടീച്ചര്‍ പറഞ്ഞു.

Add Kesari Weekly as a preferred source on Google

സംഘാടക സമിതി രക്ഷാധികാരി അറ്റോര്‍ണി ജനറല്‍ ആര്‍. വെങ്കട്ടരമണി, മാതാ അമൃതാനന്ദമയിമഠം ദല്‍ഹി അധ്യക്ഷന്‍ സ്വാമി നിജാമൃതാനന്ദപുരി, ആര്‍എസ്എസ് ദല്‍ഹി സംഘചാലക് ഡോ. അനില്‍ അഗര്‍വാള്‍, ജനസേവന്യാസ് ട്രസ്റ്റ് അദ്ധ്യക്ഷന്‍ സുഭാഷ് സുനേജ, ഡോ. ശ്രീനിവാസന്‍ തമ്പുരാന്‍, എസ്.കെ. നായര്‍ എന്നിവര്‍ സംസാരിച്ചു. ഡോ. ഗൗരിപ്രിയ സോമനാഥും സംഘവും അവതരിപ്പിച്ച വന്ദേശങ്കരവും അരങ്ങേറി.