ഉണര്‍ന്ന് പ്രവര്‍ത്തിക്കുന്നവനുള്ളതാണ് വിജയം: ഡോ. മോഹന്‍ ഭാഗവത്

പാട്‌ന: അനുകൂല സാഹചര്യത്തില്‍ വിശ്രമിക്കുന്നവര്‍ പരാജയപ്പെടുമെന്നും ഉണര്‍ന്ന് പ്രവര്‍ത്തിക്കുന്നവനുള്ളതാണ് വിജയമെന്നും ആര്‍എസ്എസ് സര്‍സംഘചാലക് ഡോ.മോഹന്‍ ഭാഗവത്. ആര്‍എസ്എസ് പാട്‌ന മഹാനഗര്‍ സാംഘിക്കില്‍ സംസാരിക്കുകയായിരുന്നു അദ്ദേഹം. രാജ്യത്ത് ഇന്ന് അനുകൂല സാഹചര്യമാണ്. ഈ അവസരം കാര്യക്ഷമമായി പ്രവര്‍ത്തിച്ച് വിജയം കൈവരിക്കാന്‍ ഉള്ളതാണെന്ന് അദ്ദേഹം ഓര്‍മ്മിപ്പിച്ചു. അവഗണനയുടെ കാലം കഴിഞ്ഞു. ആര്‍എസ്എസിന് ആദരവ് ലഭിക്കുന്ന കാലമായി. നമ്മുടെ അവസ്ഥയ്ക്ക് മാറ്റം വന്നെങ്കിലും ലക്ഷ്യം മാറിയിട്ടില്ലെന്നത് മറക്കരുതെന്ന് അദ്ദേഹം പറഞ്ഞു. സ്വയംസേവകര്‍ ചെടിച്ചട്ടിയിലെ പൂക്കളല്ലെന്നും ആവശ്യത്തിനുള്ള പോഷണങ്ങള്‍ സ്വയം കണ്ടെത്തി വളരുന്ന കാട്ടുപുഷ്പങ്ങളാണെന്നും അദ്ദേഹം കൂട്ടിച്ചേര്‍ത്തു.

എല്ലാ ദിവസവും ശാഖയില്‍ പങ്കെടുക്കുക, ശാഖയില്‍ നിന്ന് ലഭിക്കുന്ന ശീലമനുസരിച്ച പെരുമാറുക, നാം ലക്ഷ്യം വെക്കുന്ന സമൂഹ സൃഷ്ടിക്ക് ഉത്തരവാദിത്തത്തോടെ പ്രവര്‍ത്തിക്കുക, ആസക്തി ത്യാഗത്തെ ജീവിതത്തില്‍ പകര്‍ത്തുക എന്നീ നാലു കാര്യങ്ങള്‍ ചെയ്യുമെന്ന് സ്വയം സേവകര്‍ ദൃഢനിശ്ചയം എടുക്കണമെന്ന് അദ്ദേഹം ആവശ്യപ്പെട്ടു. ദക്ഷിണ ബിഹാര്‍ പ്രാന്ത സംഘചാലക് രാജ്കുമാര്‍ സിന്‍ഹ, മഹാനഗര്‍ സംഘചാലക് ഡോ. രാജീവ് കുമാര്‍ സിങ് എന്നിവര്‍ വേദിയില്‍ സന്നിഹിതരായിരുന്നു.