No products in the cart.
സ്‌കൈറൂട്ട് – ഭാരതത്തിന്റെ സ്പേസ് എക്സ്
യദു
അങ്ങേയറ്റം സാങ്കേതിക സങ്കീര്‍ണ്ണമായ മേഖലകളില്‍, അതും പരാജയസാധ്യതകള്‍, വന്‍ മുതല്‍മുടക്ക് എല്ലാം ഉള്ള ബഹിരാകാശരംഗത്ത് എല്ലാം മുതല്‍മുടക്കി ബിസിനസുകാര്‍ ഭാഗ്യപരീക്ഷണത്തിനു തയ്യാറാകില്ല. മുടക്കുന്ന പണത്തിന്റെയും സമയത്തിന്റെയും ഒക്കെ ലാഭകരമായ തിരിച്ചുവരവ് എന്നത് തന്നെയാണ് വിഷയം. അതുകൊണ്ടുതന്നെ ഈ മേഖലയില്‍ ശ്രദ്ധ കേന്ദ്രീകരിക്കണമെങ്കില്‍ ബിസിനസ്സ് മനോഭാവമല്ല പകരം ഉള്ളില്‍ തട്ടിയ സമര്‍പ്പണവും താല്പര്യവുമാണ് വേണ്ടത്. അതാണ് അമേരിക്കയില്‍ എലോണ്‍ മസ്‌ക് ചെയ്തത്. അനേകമനേകം പരാജയങ്ങള്‍ നല്‍കിയ പാഠങ്ങളിലൂടെ വന്‍ വിജയങ്ങളുടെ പടവുകള്‍ എലോണ്‍ മസ്‌കിന്റെ സ്പേസ് എക്സ് കീഴടക്കുന്നത് ഇന്ന് ലോകം അദ്ഭുതാദരങ്ങളോടെ നോക്കി നില്‍ക്കുകയാണ്.
ബഹിരാകാശരംഗത്തെ സ്വകാര്യസംരംഭമെന്ന ഏറെക്കുറെ അസാധ്യമെന്നു കരുതപ്പെടുന്ന മേഖലയിലേക്ക് ഈ കാലെടുത്തുവെയ്ക്കാന്‍ ഭാരതത്തിലും സംരംഭകര്‍ ഉണ്ടാകുന്നു എന്ന അദ്ഭുതപ്പെടുത്തുന്ന വാര്‍ത്തയിലൂടെയാണ് ഇപ്പോള്‍ നാം കടന്നുപോയ്‌ക്കൊണ്ടിരിക്കുന്നത്. 2018 ല്‍ ഹൈദരാബാദ് ആസ്ഥാനമായി മുന്‍ ഐ.എസ്.ആര്‍.ഒ ശാസ്ത്രജ്ഞരായ പവന്‍ കുമാര്‍ ചന്ദനയും നാഗ ഭാരത് ഡക്കയും ചേര്‍ന്ന് സ്ഥാപിച്ച സ്റ്റാര്‍ട്ടപ് ആയ സ്‌കൈറൂട്ട് ആണ് തങ്ങള്‍ സ്വന്തമായി വികസിപ്പിച്ച ആദ്യ റോക്കറ്റ് വിക്രം വിക്ഷേപിക്കാന്‍ തയ്യാറെടുക്കുന്നത്. ഈ കുറിപ്പ് എഴുതിക്കൊണ്ടിരിക്കുമ്പോള്‍ ശ്രീഹരിക്കോട്ടയിലെ സതീഷ് ധവാന്‍ സെന്ററില്‍ റോക്കറ്റിന്റെ അവസാനവട്ട ട്രയലുകള്‍ നടക്കുകയാണ്.
ഭൂമിയുടെ താഴ്ന്ന ഭ്രമണപഥത്തില്‍ 480 കിലോഗ്രാം വരെ ഭാരമുള്ള ഉപഗ്രഹങ്ങളെ എത്തിക്കുന്ന റോക്കറ്റ് ആണ് ഇപ്പോള്‍ വിക്ഷേപിക്കുന്നത്. നിരീക്ഷണ, ഗവേഷണ, വിദ്യാഭ്യാസ ആവശ്യങ്ങള്‍ക്കുള്ള ചെറു ഉപഗ്രഹങ്ങള്‍ മുഴുവന്‍ ഈ ഭ്രമണപഥത്തിലേക്കാണ് അയക്കുന്നത്. അതുകൊണ്ടുതന്നെ, കുറഞ്ഞ ചെലവില്‍ ലോ എര്‍ത് ഓര്‍ബിറ്റിലേക്ക് ഉള്ള വിക്ഷേപണങ്ങളുടെ വന്‍ വിപണിയാണ് തുറന്നു കിടക്കുന്നത്. സ്പേസ് എക്സ്, യൂറോപ്യന്‍ സ്പേസ് ഏജന്‍സി തുടങ്ങിയ വന്‍ കമ്പനികള്‍ ശ്രദ്ധ കേന്ദ്രീകരിക്കുന്നത് വലിയ ഉപഗ്രഹങ്ങളുടെ വിക്ഷേപണത്തില്‍ ആയതുകൊണ്ട് ഈ മേഖല ഇപ്പോള്‍ മത്സര രഹിതമാണ് എന്നുതന്നെ പറയാം.
സ്‌കൈറൂട്ട് കമ്പനിയും അവരുടെ റോക്കറ്റുകളും കഴിവ് തെളിയിച്ചു കഴിഞ്ഞാല്‍ അവരുടെ സാദ്ധ്യതകള്‍ അനന്തമാണ്. അവ രാജ്യത്തിന് നേടിത്തരുന്ന വിദേശനാണ്യവും ഖ്യാതിയും വളരെ വലുതാണ്. ക്രമേണ ഐ.എസ്.ആര്‍.ഒ പഠന ഗവേഷണങ്ങള്‍ക്ക് മാത്രം പ്രാധാന്യം കൊടുത്ത് റോക്കറ്റ് വിക്ഷേപണം, ഉപഗ്രഹനിര്‍മ്മാണം എന്നിവ പൂര്‍ണ്ണമായും സ്വകാര്യസംരംഭങ്ങള്‍ക്ക് നല്‍കുക എന്ന നയമാണ് രാജ്യം സ്വീകരിക്കാന്‍ പോകുന്നത്. അതോടെ ബഹിരാകാശമേഖലയുടെ വളര്‍ച്ച, വരും പതിറ്റാണ്ടുകളില്‍ പല മടങ്ങ് വര്‍ദ്ധിക്കുന്നത് നമുക്ക് കാണാന്‍ കഴിയും.
Kesari Shop
Latest
