രാമക്ഷേത്രം രാമരാജ്യത്തിനുള്ള പ്രചോദനമാകും – ഡോ. മന്‍മോഹന്‍ വൈദ്യ

ബെംഗളൂരു: അയോധ്യയില്‍ ഉയരുന്ന രാമക്ഷേത്രം കേവലമൊരു ക്ഷേത്രം മാത്രമല്ലെന്നും രാമരാജ്യത്തിനായുള്ള പ്രചോദനം കൂടിയാണെന്നും ആര്‍. എസ്.എസ് സഹസര്‍കാര്യവാഹ് ഡോ.മന്‍മോഹന്‍ വൈദ്യ പറഞ്ഞു. ബെംഗളൂരു ജനസേവാ വിദ്യാകേന്ദ്രയില്‍ അഖില ഭാരതീയ പ്രതിനിധി സഭയ്ക്ക് മുന്നോടിയായി നടത്തിയ വാര്‍ത്താ സമ്മേളനത്തിലാണ് അദ്ദേഹം ഇക്കാര്യം വിശദീകരിച്ചത്.

രാമക്ഷേത്ര നിര്‍മ്മാണ പ്രവര്‍ത്തന പ്രചാരണത്തില്‍ സ്വയംസേവകര്‍ രാജ്യത്തുടനീളം സജീവമായി പങ്കെടുത്തു. പ്രചാരണത്തിന്റെ ഭാഗമായി ആര്‍.എസ്. എസ് പ്രവര്‍ത്തകര്‍ 5,45,737 സ്ഥലങ്ങളിലെത്തി. ഏകദേശം 20 ലക്ഷം കാര്യകര്‍ത്താക്കള്‍ 12,47,21,000 ആളുകളുമായി ബന്ധപ്പെട്ടു. ഐക്യത്തിന്റെ വികാരം പ്രകടിപ്പിക്കുന്നതില്‍ രാമക്ഷേത്ര പ്രചാരണം വിജയിച്ചു.

സേവാഭാരതി പ്രവര്‍ത്തനം സജീവം
ലോക്ഡൗണ്‍ സമയത്ത് സേവാഭാരതിയിലൂടെ സ്വയംസേവകര്‍ വിവിധ പ്രവര്‍ത്തനങ്ങളില്‍ സജീവമായിരുന്നു.

5,70,000 ആര്‍.എസ്.എസ് കാര്യകര്‍ത്താക്കള്‍ രാജ്യത്തെ 92,656 സ്ഥലങ്ങളില്‍ സേവനമനുഷ്ഠിച്ചു. 73 ലക്ഷത്തോളം പേര്‍ക്ക് റേഷന്‍ വിതരണം ചെയതു. 4.5 കോടി ആളുകള്‍ക്ക് ഭക്ഷ്യ പാക്കറ്റുകള്‍ നല്‍കി. 90 ലക്ഷം മാസ്‌കുകള്‍ വിതരണം ചെയ്തു. 60,000 യൂണിറ്റ് രക്തം ദാനം ചെയ്തു. 20 ലക്ഷത്തിലധികം കുടിയേറ്റ തൊഴിലാളികള്‍ക്കും രണ്ടര ലക്ഷത്തോളം നാടോടികള്‍ക്കും സഹായം എത്തിച്ചു. ഇതു കൂടാതെ രാജ്യമെമ്പാടും നിരവധി വിഭാഗങ്ങള്‍ക്ക് ആര്‍എസ്എസ് സഹായം എത്തിച്ചു. കൊവിഡും രാമക്ഷേത്ര നിര്‍മാണവും ഭാരതീയ സമൂഹത്തിന്റെ ഊര്‍ജസ്വലതയും സാംസ്‌കാരിക ഐക്യവും പ്രകടമാക്കി.

കൊവിഡ് കാലത്ത് എല്ലാ സംസ്ഥാനങ്ങളിലും ആദ്യദിവസം മുതല്‍ ആര്‍.എസ്.എസ് പ്രവര്‍ത്തകര്‍ സേവന പ്രവര്‍ത്തനങ്ങളില്‍ സജീവമായി. വൈറസ് തങ്ങളെയും ബാധിക്കാമെന്ന് അറിഞ്ഞിട്ടും സ്വയംസേവകര്‍ കൊവിഡ് സമയത്ത് രാജ്യമെമ്പാടും സേവനമനുഷ്ഠിച്ചു. പലര്‍ക്കും ജീവന്‍ നഷ്ടപ്പെട്ടു. സര്‍ക്കാരിനും ഭരണകൂടത്തിനും ഒപ്പം സ്ഥിതി ലഘൂകരിക്കുന്നതില്‍ സമൂഹം തുല്യമായി ഇടപെട്ട ഏക രാജ്യം ഇന്ത്യയാണെന്നും അദ്ദേഹം പറഞ്ഞു.

മാര്‍ച്ച് 19, 20 തീയതികളില്‍ പ്രതിനിധിസഭ നടന്നു. കൊവിഡ് സാഹചര്യത്തില്‍ ക്രിയാത്മകമായി പ്രതികരിച്ച സമൂഹത്തിനെയും മറ്റു രാജ്യങ്ങള്‍ക്ക് വാക്‌സിന്‍ നല്‍കി സഹായിച്ച കേന്ദ്രസര്‍ക്കാരിനെയും അഭിനന്ദിച്ചും രാമക്ഷേത്ര നിര്‍മ്മാണ സമയത്ത് രാജ്യം പ്രകടിപ്പിച്ച ഐക്യത്തെ കുറിച്ചുമുള്ള രണ്ടു പ്രമേയങ്ങള്‍ പ്രതിനിധി സഭയില്‍ അംഗീകരിച്ചു.

പ്രതിനിധി സഭയ്ക്ക് തുടക്കം കുറിച്ച് സര്‍സംഘചാലക് ഡോ. മോഹന്‍ ഭാഗവതും സര്‍കാര്യവാഹ് സുരേഷ് ഭയ്യാജി ജോഷിയും ഭാരതാംബയുടെ ചിത്രത്തില്‍ പൂക്കള്‍ അര്‍പ്പിച്ചു.