സേവാഭാരതിയുടേത് സമാനതകളില്ലാത്ത പ്രവര്‍ത്തനം -പി.ഗോപാലന്‍കുട്ടി മാസ്റ്റര്‍

കോഴിക്കോട്: സേവാഭാരതി സമൂഹത്തില്‍ ചെയ്യുന്നത് സമാനതകളില്ലാത്ത സേവാ പ്രവര്‍ത്തനമാണെന്ന് ആര്‍ എസ് എസ് പ്രാന്ത കാര്യവാഹ് പി.ഗോപാലന്‍ കുട്ടി മാസ്റ്റര്‍ പറഞ്ഞു. മത്സ്യ പ്രവര്‍ത്തക കുടുംബങ്ങള്‍ക്കായുള്ള ഭക്ഷ്യധാന്യക്കിറ്റ് എലത്തൂര്‍ ശ്രീകുറുംബ ക്ഷേത്രസമാജം സെക്രട്ടറി പവിത്രന് കൈമാറിക്കൊണ്ട് നടന്ന ഉദ്ഘാടന ചടങ്ങില്‍ സംസാരിക്കുകയായിരുന്നു അദ്ദേഹം. 7500 മത്സ്യ പ്രവര്‍ത്തക കുടുംബങ്ങള്‍ക്ക് ഭക്ഷ്യധാന്യക്കിറ്റ് നല്‍കാനുള്ള കോഴിക്കോട് മഹാനഗരം സേവാഭാരതിയുടെ നടപടി അഭിനന്ദനാര്‍ഹമാണെന്ന് അദ്ദേഹം പറഞ്ഞു. പ്രളയകാലത്ത് രണ്ടാംനിര സൈനികരെന്ന് വിശേഷിപ്പിച്ച മത്സ്യ പ്രവര്‍ത്തകരെ ഈ ദുരിത സമയത്ത് സഹായിക്കാന്‍ സംസ്ഥാന സര്‍ക്കാര്‍ തയ്യാറായില്ല. ട്രോളിങ്ങ് നിരോധനം വരാന്‍ പോകുന്നു. ഇവര്‍ എങ്ങനെ ജീവിക്കും എന്നത് പ്രധാന പ്രശ്‌നമാണ്. മത്സ്യബന്ധനമല്ലാതെ മറ്റൊരു തൊഴിലും വശമില്ലാത്തവരാണ് ഇവരില്‍ ഭൂരിഭാഗവും. തീരദേശ പ്രദേശമായതിനാല്‍ ഭൂമിയില്‍ പണി ചെയ്യുന്നതിനും പരിമിതി ഉണ്ട്. ഈ സാഹചര്യത്തില്‍ മത്സ്യ പ്രവര്‍ത്തക കുടുംബങ്ങള്‍ക്ക് ആശ്വാസവും ആത്മവിശ്വാസവും പകരേണ്ടത് സമൂഹത്തിന്റെ ആകമാനം കര്‍ത്തവ്യമാണ്. സേവാഭാരതി ആ കര്‍ത്തവ്യം നിറവേറ്റുന്നതില്‍ സന്തോഷമുണ്ട്. ഈ ലോക്ക് ഡൗണ്‍ കാലത്ത് കോഴിക്കോട് സേവാഭാരതി മാത്രം ഒരു കോടിയിലധികം രൂപയുടെ ഭക്ഷ്യധാന്യക്കിറ്റുകള്‍ വിതരണം ചെയ്തു. ആറ് ലക്ഷത്തോളം രൂപയുടെ മരുന്ന് സൗജന്യമായി നല്‍കി.ഏപ്രില്‍ 13 മുതല്‍ ദിവസവും 1500 പേര്‍ക്ക് മെഡിക്കല്‍ കോളേജില്‍ ഭക്ഷണം കൊടുക്കുന്നു. മറ്റ് തരത്തിലുള്ള നിരവധി സഹായങ്ങളും സേവാഭാരതി പ്രവര്‍ത്തകര്‍ നല്‍കുന്നുണ്ട്. ഇതെല്ലാം സമൂഹത്തിന്റെ നിസ്സീമമായ സഹായ സഹകരങ്ങള്‍ കൊണ്ടാണ്.സമൂഹത്തിന് സേവാഭാരതിയിലുള്ള വിശ്വാസമാണ് ഇത് കാണിക്കുന്നത്, ഗോപാലന്‍കുട്ടി മാസ്റ്റര്‍ പറഞ്ഞു.