അരീക്കാട് പ്രദേശത്തെ സംഘ വിവിധക്ഷേത്ര പ്രവര്ത്തനങ്ങളിലെ സജീവ സാന്നിദ്ധ്യമായിരുന്നു ഈയിടെ അന്തരിച്ച എറക്കത്തില് പ്രഭാകരന്. ബാലസ്വയംസേവകനായി തന്നെ സംഘത്തിലെത്തിയ പ്രഭാകരേട്ടന് അരീക്കാട് ശാഖയുടെ മുഖ്യശിക്ഷകനായി പ്രവര്ത്തിച്ചിട്ടുണ്ട്. പിന്നീട് സംഘ നിര്ദ്ദേശപ്രകാരം ജനസംഘ പ്രവര്ത്തനത്തില് സജീവമായി. അടിയന്തരാവസ്ഥ കാലഘട്ടത്തിലെ ഒളിപ്രവര്ത്തനങ്ങള്ക്കും നേതൃത്വം നല്കി. അടിയന്തരാവസ്ഥയെ നേരിടുന്നതിനു വേണ്ടി വയനാട്ടിലെ കല്പറ്റയില് വെച്ചു ചേര്ന്ന രഹസ്യയോഗത്തിലും പങ്കെടുത്തിരുന്നു. അക്കാലത്ത് കുരുക്ഷേത്രം വിതരണം ചെയ്യുന്നതിനും നേതൃത്വം നല്കി.
ഇടക്കാലത്ത് വ്യക്തിപരമായ പ്രശ്നങ്ങള് കാരണം സംഘടനാ പ്രവര്ത്തനങ്ങളില് നിന്ന് വിട്ടുനില്ക്കേണ്ടി വന്ന പ്രഭാകരേട്ടന് പിന്നീട് പൂര്വ്വാധികം ഊര്ജ്ജസ്വലതയോടുകൂടി സംഘടനാ പ്രവര്ത്തനത്തില് സജീവമായി. അതില് കേസരി വാരികയ്ക്കുള്ള പങ്ക് ചെറുതല്ല. പ്രവര്ത്തനത്തില് നിന്ന് വിട്ടുനിന്ന സമയത്തും ചെറുപ്പം മുതല് താന് ശീലമാക്കിയ കേസരി വായന അദ്ദേഹം മുടക്കിയിരുന്നില്ല. യഥാര്ത്ഥത്തില് കേസരിയുമായുള്ള ആത്മ ബന്ധമാണ് അദ്ദേഹത്തിന്റെ തിരിച്ചുവരവിന് ആക്കം കൂട്ടിയത്. ഭാരതീയ ജനതാപാര്ട്ടിയുടെ പഞ്ചായത്ത് സെക്രട്ടറി സ്ഥാനം അലങ്കരിച്ചിരുന്ന അദ്ദേഹം മരണപ്പെടുന്ന സമയത്ത് ഭാരതീയ ജനതാപാര്ട്ടിയുടെ അരീക്കാട് ഏരിയകമ്മറ്റി അംഗം എന്ന നിലയില് പ്രവര്ത്തിച്ചു വരികയായിരുന്നു.
ജനസംഘം, ഭാരതീയ ജനതാപാര്ട്ടി, ബാലഗോകുലം, അര്പ്പിതസേവാസംഘം, സേവാഭാരതി സ്വാശ്രയ സംഘം, ക്ഷേത്രകമ്മറ്റി, റസിഡന്സ് അസോസിയേഷന് തുടങ്ങിയ പ്രവര്ത്തന മേഖലകളില് സജീവമായിരുന്ന പ്രഭാകരേട്ടന്റെ വിയോഗത്തോടെ അരീക്കാട് പ്രദേശത്തെ ഹൈന്ദവ പ്രസ്ഥാനങ്ങളുടെ മുന്നിര പോരാളിയെയാണ് നഷ്ടപ്പെടുന്നത്.
പ്രഭാകരേട്ടന്റെ ഭൗതിക ശരീരം ചിതയില് എരിഞ്ഞടങ്ങിയെങ്കിലും, അദ്ദേഹത്തിന്റെ ആദര്ശനിഷ്ഠ, കണിശത, സത്യസന്ധത, സംഘടനാ പ്രതിബദ്ധത തുടങ്ങിയ ഗുണങ്ങള് പ്രവര്ത്തകര്ക്ക് മാതൃകയായി എന്നും ജ്വലിച്ചു നില്ക്കും.