പ്രഭാഷകന്, പ്രതിഭാശാലിയായ മലയാള അദ്ധ്യാപകന്, മത പ്രഭാഷകന് എന്നീ നിലകളില് പൈതൃകത്തെ ആദരിച്ച മഹാത്മാവായിരുന്നു പ്രൊഫ. ടോണി മാത്യു. സംസ്കൃതിയുടെ വേരുകള് തേടി പ്രഭാഷണങ്ങളും പുസ്തക രചനയും തീര്ത്ഥയാത്രകളുമായി ഒരു മനുഷ്യ ജന്മത്തെ അനശ്വരമാക്കി. പത്രപ്രവര്ത്തകന്, സാഹിത്യകാരന്, അദ്ധ്യാപകന്, ഗ്രന്ഥകര്ത്താവ് എന്നീ നിലകളില് അദ്ദേഹം പ്രകാശമാനമായ ജീവിതം നയിച്ചു. മഹാകവി വെണ്ണിക്കുളം ഗോപാലക്കുറുപ്പ് സ്മാരക സമിതി പ്രസിഡന്റ്, തപസ്യ കലാ സാഹിത്യവേദി ജില്ലാ രക്ഷാധികാരി എന്നി ചുമതലകള് വഹിച്ചിരുന്നു. ബാലഗോകുലം ജില്ലാ രക്ഷാധികാരി ആയിരിക്കെയാണ് അന്ത്യം. കേന്ദ്ര സാഹിത്യ അക്കാദമി അംഗം, ഗുരുധര്മ്മ പ്രചാര സഭ കേന്ദ്ര കമ്മറ്റിയംഗം എന്നീ നിലകളിലും പ്രവര്ത്തിച്ചിരുന്നു. കൃഷ്ണനെ ക്രിസ്തുവിലൂടെ സാക്ഷാത്കരിച്ച മഹത് വ്യക്തിയായിരുന്നു അദ്ദേഹം. ഹൈന്ദവ ബിംബങ്ങളെ ക്രിസ്തുമതത്തോടൊപ്പം ആദരവോടെയും അഭിമാനത്തോടെയും കാത്ത പ്രഗത്ഭനായ കോളേജ് അദ്ധ്യാപകനായിരുന്നു.
ഭാരത സംസ്കൃതിയുടെ കാലംകാത്ത ബിംബങ്ങളെ സാഹിത്യവുമായി ചേര്ത്ത് ധാരാളം കൃതികള് അദ്ദേഹം രചിച്ചിട്ടുണ്ട്. സനാതന ധര്മ്മസന്ദേശം, സ്വാമി വിവേകാനന്ദന്, അംബേദ്കര് – അയ്യന്കാളി, വെളിച്ചത്തിന്റെ നുറുങ്ങുകള് തുടങ്ങി നാല്പതോളം പുസ്തക രചന ഇദ്ദേഹം നടത്തിയിട്ടുണ്ട്. 1978 മുതല് 2004 വരെ റാന്നി സെന്റ് തോമസ് കോളേജിലെ മലയാള വിഭാഗം അദ്ധ്യാപകനായിരുന്നു. ലൗലി ഭാര്യയും ഹരിത, മൃദുല, യദു എന്നിവര് മക്കളുമാണ്. ബോണി, മോട്ടി, ആര്യ എന്നിവര് മരുമക്കളാണ്.
സനാതന ധര്മ്മത്തിന്റെയും ഭാരതീയ സംസ്കൃതിയുടെയും കാവലാളായി, മലയാള ഭാഷയുടെ ഉയര്ത്തെഴുന്നേല്പ്പിനും വേണ്ടി, സര്ഗ്ഗശേഷിയുള്ള നിരവധി കൃതികളുടെ രചയിതാവും ഉജ്ജ്വല വാഗ്മിയുമായിരുന്നു പ്രൊഫ. ടോണി മാത്യു. അദ്ദേഹത്തിന്റെ വേര്പാട് ഭാരതീയ ദര്ശനത്തിനും ഭാഷാ സാഹിത്യത്തിനും തീരാ നഷ്ടമാണ്. അദ്ദേഹത്തിന്റെ ആത്മാവിന് നിത്യശാന്തി നേരുന്നു.