ഭാരതീയസംസ്കൃതിയുടെ മാഹാത്മ്യാതിശയങ്ങളെ സാമാന്യജനങ്ങളിലേക്കെത്തിക്കാന് അക്ഷരപ്പൂക്കള് കൊണ്ടു വേദസാഹിത്യമാല തീര്ത്ത പുണ്യാവതാരമാണ് മഹര്ഷി വേദവ്യാസന്. ആ മഹാനുഭാവന്റെ ചരിത്രം ശുദ്ധവും മധുരവുമായ ഭാഷയില് വ്യാസകഥ’ എന്ന ബാലസാഹിത്യ നോവലിലൂടെ അവതരിപ്പിച്ചിരിക്കുകയാണ് കേസരി വാരികയുടെ സഹപത്രാധിപരായ ടി.വിജയന്. ഭഗവാന് വേദവ്യാസന്റെ കര്മ്മനിയോഗങ്ങളിലൂടെയുള്ള സാഹിത്യസഞ്ചാരമാണ് വ്യാസകഥ.
കുട്ടികള്ക്കായുള്ള മയില്പ്പീലി മാസികയില് ഖണ്ഡശ്ശയായി പ്രസിദ്ധീകരിച്ച നോവലാണ് ഇപ്പോള് പുസ്തകരൂപത്തില് പുറത്തിറക്കിയിരിക്കുന്നത്. വൈദികകാലത്തെ സുപ്രധാന സംഭവങ്ങളും ഇതിഹാസത്തിലെ പരിചിതവും അപരിചിതവുമായ കഥാസന്ദര്ഭങ്ങളും ലളിതമായ പദപ്രയോഗങ്ങളിലൂടെ ഇതില് അവതരിപ്പിച്ചിരിക്കുന്നു. രാഷ്ട്രീയ സ്വയംസേവക സംഘത്തിന്റെ പ്രാന്തസംഘചാലകനായിരുന്ന അഡ്വ.ടി.വി അനന്തന്റെ പ്രഭാഷണത്തില് നിന്നും പ്രചോദനമുള്ക്കൊണ്ടാണ് ഈ നോവല് രചിക്കപ്പെട്ടിരിക്കുന്നത്. അതിനു ആധാരമായത് കെ.എം മുന്ഷിയുടെ കൃഷ്ണാവതാര പരമ്പരയും.
വ്യാസന്റെ ബാല്യം മുതല് ഇതിഹാസനിര്മ്മിതിയുടെ ആരംഭം വരെയുള്ള ജീവിതാഖ്യായിക വിവരിക്കുന്ന ഈ നോവലിന് പ്രൗഢ ഗംഭീരമായ അവതാരിക എഴുതിയിരിക്കുന്നത് മഹാകവി എസ്. രമേശന് നായരാണ് എന്നത് ഇതിന്റെ മാറ്റ് കൂട്ടുന്നു. വ്യാസജീവിതത്തെ കൂടുതല് ആഴത്തിലറിയാന് കുട്ടികള്ക്ക് മാത്രമല്ല മുതിര്ന്നവര്ക്കും ഈ ഗ്രന്ഥം ഉപകാരപ്പെടുമെന്നതില് തര്ക്കമില്ല.
വ്യാസകഥ
ബാലസാഹിത്യനോവല്
ടി.വിജയന്
കുരുക്ഷേത്ര പ്രകാശന്, കൊച്ചി
പേജ് 104 വില 100