ചട്ടമ്പിസ്വാമികളുടെ സദുപദേശങ്ങളായ തീര്‍ത്ഥപാദസമ്പ്രദായത്തെക്കുറിച്ച് തീര്‍ത്ഥപാദാശ്രമം മഠാധിപതിയും പരമാചാര്യനുമായിരുന്ന വിദ്യാനന്ദതീര്‍ത്ഥപാദ സ്വാമികള്‍ പലപ്പോഴായി എഴുതിയിട്ടുള്ളത് സംഗ്രഹിച്ച് പ്രസിദ്ധീകരിച്ചതാണ് ‘ചട്ടമ്പിസ്വാമികളും തീര്‍ത്ഥപാദ സമ്പ്രദായവും’ എന്ന പുസ്തകം. അദ്വൈതവേദാന്തത്തെയും തമിഴ് ശൈവസിദ്ധാന്തത്തെയും സമന്വയിപ്പിച്ചുകൊണ്ട് ചട്ടമ്പിസ്വാമികള്‍ പരമ്പരയാ നല്‍കിയ ആധ്യാത്മികോപദേശങ്ങളാണ് തീര്‍ത്ഥപാദ സമ്പ്രദായം എന്നറിയപ്പെടുന്നത്. ജ്ഞാനവിഷയങ്ങളില്‍ ശ്രീമദ് ശങ്കരഭഗവദ്പാദരുടെ സിദ്ധാന്തത്തെയും ഉപാസനാവിഷയങ്ങളില്‍ ദ്രാവിഡാചാര്യന്മാരുടെ ശൈവ സിദ്ധാന്തത്തെയും ഉള്‍പ്പെടുത്തിയിരിക്കുന്നു.
ആത്മാനുഭൂതിയെ ദ്യോതിപ്പിക്കുന്ന തീര്‍ത്ഥാദി ദശനാമങ്ങളും ഭാരതീയ സന്ന്യാസിമാര്‍ സാധാരണയായി സ്വീകരിച്ചുവരുന്ന വഴക്കവും കാണപ്പെടുന്നുണ്ട്. ശ്രീശങ്കര ഭഗവത്പാദരോടും അവിടുത്തെ അദ്വൈതസിദ്ധാന്തത്തോടുമുള്ളബഹുമാനസൂചകമായിട്ടാണ് ശ്രീചട്ടമ്പിസ്വാമിതിരുവടികള്‍ അവിടുത്തെ പരമ്പരയിലുള്ള ശിഷ്യന്മാര്‍ക്ക് തീര്‍ത്ഥനാമം നല്‍കി അനുഗ്രഹിച്ചത്.
”ത്രിവേണീസംഗമസ്ഥാനേ തത്ത്വമസ്യാദിലക്ഷണേ
സ്‌നായാത്തത്വാര്‍ത്ഥ ഭാവേന തീര്‍ത്ഥനാമാ സഉച്യതേ.”
”വേദാന്തമഹാവാക്യങ്ങളില്‍ സുപ്രസിദ്ധമായ ഒന്നാണല്ലോ തത്ത്വമസി മഹാവാക്യം. അതിലെ തത്, ത്വം, അസി എന്നീ മൂന്നുപദങ്ങളുടെ സംഗമസ്ഥാനമാകുന്ന ത്രിവേണിയില്‍ ബ്രഹ്മാനുഭൂതിയോടുകൂടി ആരാണോ സ്‌നാനംചെയ്യുന്നത് അദ്ദേഹമാണ് ‘തീര്‍ത്ഥന്‍’ എന്ന പേരില്‍ അറിയപ്പെടുന്ന സന്ന്യാസി. അതിനാല്‍, തീര്‍ത്ഥപാദസമ്പ്രദായത്തിലെ മുഖ്യമായ ഉപദേശത്തിന്റെ സാരം തത്ത്വമസി മഹാവാക്യത്തിന്റെ ലക്ഷ്യാര്‍ത്ഥമായ ജീവബ്രഹ്മൈക്യമാണെന്ന് മനസ്സിലാക്കാവുന്നതാണ്.” ശ്രീശങ്കരഭഗവത്പാദരുടെ അദ്വൈതമതത്തെയും ജ്ഞാനസംബന്ധര്‍, അപ്പര്‍, മാണിക്യവാചകര്‍ മുതലായ ദ്രാവിഡാചാര്യന്മാര്‍ പ്രചരിപ്പിച്ച ശൈവസമയത്തെയും കൂട്ടിയിണക്കി അദ്ദേഹം (ശ്രീചട്ടമ്പിസ്വാമികള്‍) നടപ്പില്‍ വരുത്തിയതാണ് തീര്‍ത്ഥപാദമതം എന്ന് ഉള്ളൂര്‍, കേരളസാഹിത്യചരിത്രത്തില്‍ രേഖപ്പെടുത്തിയിരിക്കുന്നത് തീര്‍ത്ഥപാദസമ്പ്രദായത്തെ ഉദ്ദേശിച്ചാണ്.
ചട്ടമ്പി സ്വാമികളുടെ ആധികാരികമായ ഒരു ലഘുജീവചരിത്രവും ഇതില്‍ ഉള്‍ക്കൊള്ളിച്ചിട്ടുള്ളത് ജിജ്ഞാസുക്കള്‍ക്ക് പ്രയോജനകരമാണ്. സ്വാമികളെക്കുറിച്ചുള്ള മഹാത്മാക്കളുടെ അഭിപ്രായങ്ങളും സ്വാമികളുടെ ജീവിതചര്യയുമെല്ലാം ഇതില്‍ വ്യക്തമായി അവതരിപ്പിച്ചിരിക്കുന്നു.
Discussion about this post