ചിന്തോദ്ദീപകമായ സാഹിത്യ രചനകള്‍

സുഭാഷ് ചന്ദ്രബോസ്
പൊള്ളുന്ന രഹസ്യങ്ങള്‍
മാത്യൂസ് അവന്തി
അവന്തി പബ്ലിക്കേഷന്‍സ്
കോട്ടയം
പേജ്: 128 വില: 120 രൂപ

വിദേശകൂറുള്ള ചില ചരിത്രകാരന്മാരും കപട ബുദ്ധിജീവികളും നിറം പിടിപ്പിച്ച് എഴുതിവെച്ച ചരിത്രപുസ്തകമാണ് പലരും ഇന്ന് ആധികാരിക രേഖകളായി കണക്കാക്കുന്നത്. ഭാരതത്തിന്റെ യഥാര്‍ത്ഥ സ്വാതന്ത്ര്യത്തിനുവേണ്ടി നൂറ്റാണ്ടുകളായി നടന്ന പ്രക്ഷോഭത്തിന്റെ യഥാര്‍ത്ഥ ചരിത്രം പുറത്തു വരേണ്ടത് കാലഘട്ടത്തിന്റെ ആവശ്യമായിവന്നിരിക്കുന്നു. സ്വാ തന്ത്ര്യ സമരചരിത്രത്തിലെ ചില പൊള്ളുന്ന യാഥാര്‍ത്ഥ്യങ്ങള്‍ തുറന്നു കാട്ടുകയാണ് മാത്യൂസ് അവന്തി ”സുഭാഷ് ചന്ദ്രബോസ് – പൊള്ളുന്ന രഹസ്യങ്ങള്‍” എന്ന പുസ്തകത്തിലൂടെ. ഐ.എന്‍.എ എന്ന സൈനിക സംഘടനയുപയോഗിച്ച് അകത്തുനിന്നും പുറത്തുനിന്നും ഭാരതത്തിന്റെ സ്വാതന്ത്ര്യസമരപോരാട്ടങ്ങള്‍ക്ക് നേതൃത്വം കൊ ടുത്ത നേതാജിയെന്നറിയപ്പെടുന്ന സുഭാഷ് ചന്ദ്രബോസിന്റെ ധീരോദാത്തമായ ജീവചരിത്രം വിവരിക്കുകയാണ് ഈ പുസ്തകത്തില്‍.

കാളീനടനം
കവനമന്ദിരം പങ്കജാക്ഷന്‍
വേദ ബുക്‌സ്, കോഴിക്കോട്
പേജ്:212 വില: 250 രൂപ

ഇരുപത്തിരണ്ട് ലേഖനങ്ങളുടെ സമാഹാരമാണ് കാളീനടനം. ശബ്ദബ്രഹ്‌മവും അക്ഷരമാലയും എന്ന ആദ്യലേഖനം സാധാരണമലയാളിക്ക് അപരിചിതമായ ഒരു ലോകത്തെ കാട്ടിത്തരുന്നു. അക്ഷരമാലയേയും ഭാഷാശാസ്ത്രത്തേയും യോഗജ്ഞാനത്തിന്റെ വെളിച്ചത്തില്‍ അധികമാരും അപഗ്രഥിച്ചിട്ടില്ല. വര്‍ണ്ണമാലയും സൗന്ദര്യലഹരിയും സര്‍ ജോണ്‍ വുഡ്‌റോഫിന്റെയും മാനനീയ പി. മാധവ്ജിയുടെയും പഠനങ്ങളും ചെലുത്തുന്ന പ്രഭാവം ഇതിലുണ്ട്. ശൈവസംഹിതയുടെ ഉള്ളറകളിലേയ്ക്കു കടന്നു ചെല്ലുന്നതാണ് സത്യം, ശിവം, സുന്ദരം, ശാന്തം എന്ന പഠനം. ഏതു സംഗീത പ്രേമികള്‍ക്കുമറിയുന്ന ‘വാതാപി ഗണപതിം ഭജേം-‘ എന്ന കീര്‍ത്തനത്തെ സമഗ്രമായി പരിചയപ്പെടുത്തുന്നതാണ് മറ്റൊരു ലേഖനം. ശ്രീവടക്കുംനാഥക്ഷേത്രത്തെ സമ്പൂര്‍ണ്ണമായി പരിചയപ്പെടുത്തുന്ന സുദീര്‍ഘമായ രചന മൂര്‍ത്തിപൂജയുടെ ശാസ്ത്രീയത വെളിപ്പെടുത്തുന്നു. ഇങ്ങനെ ഈ ഗ്രന്ഥം ആദ്യന്തം അമൂല്യ വിജ്ഞാനങ്ങളുടെ ശേഖരമാണ്. സനാതനസംസ്‌കാരത്തെ യഥായോഗ്യം സമൂഹത്തിലാകെ പ്രചരിപ്പിക്കുകയെന്ന വിശിഷ്ടദൗത്യത്തിനുവേണ്ടി ബദ്ധകങ്കണരായ കോഴിക്കോട് വേദ ബുക്‌സ് പ്രവര്‍ത്തകരെ ഇതിന്റെ പ്രസാധനത്തിന്റെ പേരില്‍ അഭിനന്ദിക്കുന്നു.

എനിക്ക് ഞാനാകണം
പി.കെ. ഗോപി
ഫിംഗര്‍ ബുക്‌സ്
കോഴിക്കോട്
പേജ്: 64 വില: 80 രൂപ

കവി പി.കെ.ഗോപിയുടെ കവിതകളില്‍ മണ്ണോളം താഴ്മ നേടാനുള്ള വെമ്പല്‍ എല്ലാ കാലത്തുമുണ്ട്. താഴ്മ താന്‍ അഭ്യുന്നതിയുടെ സന്ദേശം കൈവിടാതെ സൂക്ഷിക്കുന്ന മാതൃകാ കവിയാണ് അദ്ദേഹം. പ്രകൃതിയുടെ നേര്‍പകര്‍പ്പിന്റെ ധാരാളിത്തം മതിയാവോളം സന്നിവേശിപ്പിക്കാന്‍ ശ്രമിക്കുന്ന കവിതകളാണ് എനിക്ക് ഞാനാകണം എന്ന 25 കവിതകളുടെ സമാഹാരം. ബാലമനസ്സിനെ അളക്കുമ്പോഴാണ് അവര്‍ പീലി വിടര്‍ത്തിയാടിയ, ഓടിമറയുന്ന ആകാശവീഥിയും കാടും മേടും പുഴയും പാതയും ഓര്‍ക്കുക. ബാല്യകാലത്തിന്റെ സ്മരണകള്‍ ഉണര്‍ത്തുന്ന കവിതകളാണ് ഇതിലുള്ളത്.
പച്ച നിറത്തിലെ പായലും പരല്‍ മീനും നാഴികമണിയും കവിതകണമായി മാറിയപ്പോള്‍ കരിഞ്ഞ കതിരും പൊളിഞ്ഞ ശിലയും നികത്തിയ പാടവും കൂടെയുണ്ട്. അതിലൂടെയാണ് മണ്ണില്‍ തൊട്ട വൃക്ഷമാകാനും ദൂരമളന്ന് പറക്കുന്ന പക്ഷിയാകാനും കടലും കാറ്റുമാകാനും കാലമുറക്കെപാടാറുള്ള കാവ്യമാകാനും കവി നമ്മെ തോന്നിപ്പിക്കുന്നത്. ഒരോ കവിതയും വരികളും വരയും കൊണ്ട് ശ്രദ്ധേയമാണ്.