മാധ്യമപ്രവര്ത്തനത്തിന്റെ മറവില് അഴിമതിയും കൊള്ളയും നടത്തുന്ന ചില മാധ്യമ പ്രവര്ത്തകരെ ചൂണ്ടിക്കാണിച്ചുകൊണ്ടുള്ള ജി.കെ.സുരേഷ് ബാബുവിന്റെ ലേഖനം (കേസരി ജൂണ് 18) ഇന്നത്തെക്കാലത്ത് ഏറെ പ്രസക്തിയുള്ളതാണ്. ഇന്ന് പത്രപ്രവര്ത്തനത്തിന് എന്ത് പരിശുദ്ധി…! തങ്ങളുടെ കയ്യില് കിട്ടുന്ന പല രഹസ്യ വാര്ത്തകളും വച്ച് വില പേശുന്നവരാണ് പല മാധ്യമപ്രവര്ത്തകരും. ഇത്തരക്കാര് പത്രപ്രവര്ത്തനത്തിന്റെ മാന്യതയ്ക്ക് തീരാകളങ്കമാണ് സൃഷ്ടിക്കുന്നത്.
സാധാരണക്കാരായ ആളുകള് ഒരു ചെറിയ തെറ്റ് ചെയ്താല് വലിയ കുറ്റം ചുമത്തി ജയിലിലടയ്ക്കുമ്പോള് സമൂഹത്തില് മാന്യതയുടെ മുഖം മൂടി ധരിച്ചിരിക്കുന്ന ഇത്തരത്തിലുള്ളവരെ ചോദ്യം ചെയ്യാനോ ശിക്ഷകൊടുക്കുവാനോ നമ്മുടെ ഭരണകൂടം തയ്യാറാവില്ല. ഈ ഇരട്ടത്താപ്പ് പൊതുസമൂഹം തിരിച്ചറിയണം.
ഇപ്പോഴത്തെ ഭരണകൂടം എല്ലാത്തരം കൊള്ളയും പ്രോത്സാഹിപ്പിക്കുന്ന രീതിയാണ് കാണുന്നത്. മരംകൊള്ളയും കടല്ക്കൊള്ളയും സ്വര്ണ്ണക്കൊള്ളയും മാത്രമല്ല സമസ്തമേഖലകളിലും കൊള്ളനടത്താന് സജ്ജരായിരിക്കുകയാണ് ഇവര്. കേരള സമൂഹം അതിനാണ് തങ്ങളെ വീണ്ടും ഭരണത്തിലേറ്റിയിരിക്കുന്നത് എന്നാണ് അവര് കരുതിയത് എന്ന് തോന്നുന്നു. എന്തായാലും ജനം എന്നെങ്കിലും ഇത് തിരിച്ചറിഞ്ഞ് പ്രതികരിക്കും എന്ന് പ്രതീക്ഷിക്കാം.