കുഞ്ഞനന്തന്റെ ചോരക്ക് പകരംവീട്ടേണ്ടേ സഖാവേ?

സി.പി.എമ്മിന്റെ പാനൂര്‍ ഏരിയ കമ്മറ്റിയംഗമായിരുന്ന പി.കെ. കുഞ്ഞനന്തനെ ജയിലിലിട്ട് നീതി നല്‍കാതെ, ചികിത്സ നല്‍കാതെ കൊലക്ക് കൊടുത്തവരെ എന്തു ചെയ്യണം? മറ്റാര്‍ക്കു സംശയം തോന്നിയാലും ഇ.പി.ജയരാജന് സംശയമില്ല. പാര്‍ട്ടി കോടതി നിശ്ചയിക്കുന്ന ശിക്ഷ നല്‍കുക തന്നെ വേണം. ഇക്കാര്യം അദ്ദേഹം തുറന്നു പറഞ്ഞിട്ടില്ലെങ്കിലും കുഞ്ഞനന്തന്റെ അഞ്ചാം രക്തസാക്ഷി ദിനത്തില്‍ പാനൂരില്‍ നടത്തിയ അനുസ്മരണ പ്രസംഗത്തില്‍ അതുണ്ട്. പാര്‍ട്ടി തിട്ടൂരം ലംഘിച്ച് ആര്‍.എസ്.എസ് ശാഖ നടത്തിയവരും കുലംകുത്തികളും ചെയ്ത അപരാധത്തേക്കാള്‍ കടുത്തതാണ് കുഞ്ഞനന്തന്‍ സഖാവിനെ ജയിലിലിട്ട് കൊന്നത് എന്നതില്‍ ആര്‍ക്കും സംശയമുണ്ടാവില്ല. ആര്‍.എസ്.എസ്സുകാര്‍ക്കും ടി.പി. ചന്ദ്രശേഖരനും നല്‍കിയത് മരണശിക്ഷയായിരുന്നു. അപ്പോള്‍ കുഞ്ഞനന്തനെ ശിക്ഷിച്ച ജഡ്ജിമാര്‍ക്കുള്ള പാര്‍ട്ടി കോടതിയുടെ ശിക്ഷ എന്താണെന്ന് ഊഹിക്കാമല്ലോ.

ചിറ്റപ്പന്‍ സഖാവിന്റെ പാനൂരിലെ കുഞ്ഞനന്തന്‍ അനുസ്മരണ പ്രസംഗം വെറുംവാക്കല്ല, ജുഡീഷ്യറിക്കു നേരെയുള്ള കുറ്റപത്രമാണ്. ജയിലില്‍ കിടന്ന് മരിക്കേണ്ടി വന്നയാള്‍ നിസ്സാരനല്ല. പാര്‍ട്ടിയുടെ നേതാവ് എന്നതിനു പുറമെ നിരപരാധി, ജനങ്ങള്‍ക്കു വേണ്ടി പോരാടി നാടിനെ ഉയര്‍ത്തിക്കൊണ്ടുവന്ന വിപ്ലവകാരി, പൊതുപ്രവര്‍ത്തകന്‍ എന്നീ യോഗ്യതയുള്ളയാള്‍ എന്ന് കുറ്റപത്രത്തില്‍ എടുത്തു പറയുന്നു. അയാളോട് കാണിച്ച അനീതി എന്താണെന്നും കുറ്റപത്രത്തിലുണ്ട്. നീതിപീഠത്തിന് മുമ്പില്‍ സത്യം വെളിപ്പെടുത്തിയിട്ടും ഭരണകൂടത്തിന്റെ താല്പര്യപ്രകാരം ഇടതുപക്ഷ വിരുദ്ധ ജുഡീഷ്യറി കുഞ്ഞനന്തനെ ജയിലിലയച്ചു. രോഗിയായപ്പോള്‍ ചികിത്സ പോലും നല്‍കിയില്ല. യാതനയും വേദനയും ത്യാഗവും സഹിച്ച് കുഞ്ഞനന്തന്‍ ജയിലില്‍ കിടന്ന് നമ്മെ വിട്ടുപോയി. രക്തസാക്ഷിയുടെ ചോരയ്ക്ക് പകരം ചോദിക്കല്‍ പാര്‍ട്ടിയുടെ നയമാണ്. അതിനാല്‍ ഈ കുറ്റപത്രം പാര്‍ട്ടി കോടതി പരിഗണിച്ചാല്‍ മാത്രം മതി ബാക്കി കാര്യങ്ങള്‍ ചെയ്യാന്‍ മുഖ്യന്‍ സഖാവ് ആയിരവും അഞ്ഞുറും ദിവസം വീതം പരോള്‍ നല്കി പുറത്തു എത്തിച്ച വിപ്ലവ സഖാക്കള്‍ റെഡിയായി നില്‍പ്പുണ്ട്.