ജയവിജയന്മാര്‍ നായാട്ടിനിറങ്ങുന്നേ!

മുനിശാപമേറ്റ് പല ജന്മങ്ങളായി പല പേരില്‍ അസുരന്മാരായി ജനിച്ച ജയവിജയന്മാരുടെ കഥ പുരാണങ്ങളിലുണ്ട്. കലിയുഗത്തില്‍ കേരളത്തിന്റെ മണ്ണില്‍ അവര്‍ ഏതാണ്ടതേപേരില്‍ ജന്മമെടുക്കും എന്ന് ഏതെങ്കിലും പുരാണത്തില്‍ പറഞ്ഞിട്ടുണ്ടോ എന്നറിയില്ല. വന്യമൃഗ ശല്യം തീര്‍ക്കാന്‍ നായാട്ട് വേണം എന്ന കേരള മുഖ്യമന്ത്രി വിജയന്‍ സഖാവിന്റെയും സി.പി.എം കേന്ദ്ര കമ്മറ്റിയംഗം ഇ.പി. ജയരാജന്റെയും കയ്യൂക്കിന്റെ ഭാഷയിലുള്ള ആവശ്യം കേട്ടപ്പോള്‍ ഇവര്‍ ജയവിജയന്മാര്‍ തന്നെയോ എന്ന് സംശയിക്കുന്നവരെ കുറ്റപ്പെടുത്താനാവില്ലല്ലോ. ശരീര പ്രകൃതിയിലും വിശ്വസിക്കുന്ന ആദര്‍ശത്തിലും അതിനുവേണ്ടി ചെയ്യുന്ന പ്രവൃത്തിയിലുമൊക്കെ ജയവിജയന്മാരുടെ സ്വഭാവവുമായി ഇവര്‍ക്ക് നല്ല ചേര്‍ച്ച കാണുന്നവരുണ്ട്. അത് എന്തോ ആവട്ടെ, കേരളത്തില്‍ വര്‍ദ്ധിച്ചുവരുന്ന വന്യമൃഗശല്യത്തിന് ഏക പരിഹാരം നായാട്ടാണ് എന്ന് മുഖ്യമന്ത്രി വിജയന്‍ സഖാവ് പ്രഖ്യാപിച്ചിരിക്കയാണ്. പാര്‍ട്ടിയുടെ തലപ്പത്തിരിക്കുമ്പോള്‍ നരനായാട്ട് ഏറെ നടത്തി തഴമ്പിച്ചിട്ടുള്ള സഖാവിന് മുഖ്യമന്ത്രിയായിരിക്കുമ്പോള്‍ മൃഗയാവിനോദം നടത്താന്‍ തോന്നുന്നത് സ്വാഭാവികം. സ്വിമ്മിങ്ങ് പൂളും അകമ്പടിയാത്രയും പ്രജകളെ തൃക്കണ്‍പാര്‍ക്കാനുള്ള ജനസമ്പര്‍ക്ക ബസ് യാത്രയുമൊക്കെയുള്ള കൂട്ടത്തില്‍ മൃഗയാവിനോദവും കൂടിയാകാം. നായാട്ടിനുള്ള മോഹം മനസ്സില്‍ ഉടലെടുത്തതോടെ അതിനു വേണ്ടിയുള്ള നിയമനിര്‍മ്മാണത്തെക്കുറിച്ച് ചിന്തിക്കാന്‍ തുടങ്ങിയിരിക്കയാണ് അദ്ദേഹം എന്നാണ് പത്രവാര്‍ത്ത.

നായാട്ട് എന്ന് മുഖ്യന്‍ ഉച്ചരിച്ചതേയുള്ളു, ചിറ്റപ്പന്‍ സഖാവ് ഇ.പി.ജയരാജന്‍ തോക്കും വേട്ടനായ്ക്കളുമായി വേട്ടക്കിറങ്ങാന്‍ തയ്യാറായിക്കഴിഞ്ഞു. നോക്കണേ ജയവിജയന്മാരുടെ മാനസിക പൊരുത്തം! കേന്ദ്രസര്‍ക്കാര്‍ വന്യമൃഗപ്രശ്‌നം പരിഹരിച്ചില്ലെങ്കില്‍ നിയമം കയ്യിലെടുക്കുമെന്നാണ് കിസാന്‍ സഭ അഖിലേന്ത്യ വൈസ് പ്രസിഡന്റ്കൂടിയായ സഖാവ് പേരാമ്പ്രയില്‍ കിസാന്‍സഭയുടെ ഒരു യോഗത്തില്‍ പറഞ്ഞത്. ഇന്റിഗോ വിമാനത്തില്‍ വെച്ച് യൂത്ത് കോണ്‍ഗ്രസ്സു കാരെ കൈകാര്യം ചെയ്ത് കൈത്തരിപ്പ് മാറാതെ നില്‍ക്കുമ്പോഴാണ് സഖാവിന് ഒരു അവസരം വീണുകിട്ടിയിരിക്കുന്നത്. ജയരാജന്‍ മീശ വിറപ്പിച്ചതറിഞ്ഞ് ദല്‍ഹിയിലെ സിംഹാസനത്തില്‍ ഇരിക്കുന്ന മോദി തീര്‍ച്ചയായും ഭയന്നു വിറച്ചിട്ടുണ്ടാവണം. കേന്ദ്രസര്‍ക്കാരിന്റെ വാതില്‍ ചവിട്ടിപ്പൊളിക്കാന്‍ വരുന്നു എന്ന് വിളംബരം ചെയ്ത് കലിയുഗ ജയവിജയന്മാര്‍ കണ്ണൂരിലെ സകല പാര്‍ട്ടി ഗുണ്ടാ പരിവാരങ്ങളും ബോംബും വടിവാളുമടക്കമുള്ള ആയുധങ്ങളുമായി ദല്‍ഹിയിലേക്ക് പടക്കിറങ്ങുന്നത് പാവം മോദി ഏതെങ്കിലും ഗുഹയില്‍പ്പോയി ഒളിക്കും എന്ന് കരുതിയാവും. ദല്‍ഹിക്കു പോകും മുമ്പ് മോദിയോട് കളിച്ചാല്‍ എങ്ങനെയുണ്ടാകുമെന്ന് പാക് സൈനിക മേധാവി അസിം മുനീറിനോട് ഒന്ന് വിളിച്ചു ചോദിക്കുന്നത് നന്നാകും.