‘സമസ്ത’യെ പേറി വിജയന്‍ സഖാവ് !

നോക്കണേ വിജയന്‍ സഖാവിന്റെ ഗതികേട്. കുറേക്കാലമായി മുസ്ലിം ലീഗിന്റെ ചുമലില്‍ കടല്‍കിഴവനെപ്പോലെ അള്ളിപിടിച്ചു കിടന്നിരുന്ന ‘സമസ്ത’ മത നേതാക്കള്‍ ഇപ്പോള്‍ അദ്ദേഹത്തിന്റെ തോളിലാണ്! ‘സമസ്ത’ സുന്നികള്‍ക്ക് ലീഗിന്റെ പച്ചയേക്കാള്‍ പ്രിയം സിപിഎമ്മിന്റെ ചുകപ്പിനോടാണത്രെ! ഇതോടെ സിപിഎമ്മിന്റെ മതേതര പ്രതിച്ഛായയ്ക്ക് നല്ല പച്ച നിറം കൈവന്നിരിക്കുന്നു! സി.പി.എമ്മിനെയും വിജയന്‍ സഖാവിന്റെ ഇടതു ഭരണത്തെയും ഈ നിലയിലെത്തിച്ചത് അവര്‍ വഖഫ് ബോര്‍ഡിനെ തൊട്ടുകളിച്ചതാണ്.

വിജയന്‍ സഖാവിന്റെ അഞ്ചു വര്‍ഷത്തെ ഭരണകാലത്ത് സഖാക്കള്‍ക്ക് വഖഫ് ബോര്‍ഡിന്റെ പടി ചവിട്ടാന്‍ പോലും സാധിച്ചിട്ടില്ല. അവിടെ എന്തു നടക്കണം എന്ന് തീരുമാനിക്കുന്നത് അന്നത്തെ വകുപ്പ് മന്ത്രി കെ.ടി ജലീല്‍ ആയിരുന്നില്ല, മറിച്ച് വഖഫ് ബോര്‍ഡില്‍ ലീഗുകാര്‍ നിയമിച്ച ഉദ്യോഗസ്ഥരും ബോര്‍ഡിലെ തിരഞ്ഞെടുക്കപ്പെട്ട മുതവല്ലിമാരും ആയിരുന്നു. ഇത് പൊളിക്കാനാണ് വഖഫ്‌ബോര്‍ഡ് നിയമനം പി.എസ്.സിക്ക് വിടാന്‍ സി.പി. എം തീരുമാനിച്ചത്. എന്നാല്‍ ദേവസ്വംബോര്‍ഡ് അല്ല വഖഫ് ബോര്‍ഡ് എന്ന് തിരിച്ചറിയാന്‍ അധിക സമയം വേണ്ടിവന്നില്ല. മുസ്ലിം ലീഗ് പതിനെട്ടോളം മുസ്ലിം സംഘടനകളെ ചേര്‍ത്ത് മുസ്ലിം കോഡിനേഷന്‍ കമ്മിറ്റി രൂപീകരിക്കുകയും പള്ളികളെ മുന്‍നിര്‍ത്തി പ്രക്ഷോഭം നടത്താന്‍ പോകുന്നു എന്ന് പ്രഖ്യാപിക്കുകയും ചെയ്തു. ഈ പ്രതിഷേധത്തില്‍ നിന്ന് തടി രക്ഷിക്കാനാണ് ‘സമസ്ത’യെ പേറി നടക്കാന്‍ വിജയന്‍ സഖാവ് നിര്‍ബന്ധിതനായത്. ദേവസ്വം ഭരണം സംബന്ധിച്ചും അവിടുത്തെ നിയമനം സംബന്ധിച്ചും ഏതെങ്കിലും ഹിന്ദു സംഘടനകളോട് ചര്‍ച്ച ചെയ്യാന്‍ മുഖ്യമന്ത്രി തയ്യാറായിട്ടുണ്ടോ? ശബരിമലയില്‍ ആചാരലംഘനം നടത്താന്‍ യുവതികളെ പ്രവേശിപ്പിക്കുക വഴി ഹിന്ദു വിശ്വാസത്തെയും മത നേതൃത്വത്തെയും വെല്ലുവിളിക്കുകയല്ലേ ചെയ്തത് ?

എന്നാല്‍ മുസ്‌ലിം സംഘടനകള്‍ വഖഫ് നിയമനം സംബന്ധിച്ച് പ്രക്ഷോഭത്തിനിറങ്ങിയപ്പോള്‍ സഖാക്കളുടെ നിലപാടു തന്നെ മാറി. ഇതോടെ സുന്നി യാഥാസ്ഥിതിക നേതാക്കളെ തോളിലേറ്റേണ്ട ഗതികേടില്‍ വരെ എത്തി സി.പി.എം. പള്ളിയില്‍ രാഷ്ട്രീയം ഒഴിവാക്കണം എന്ന് അപേക്ഷിക്കുന്ന സ്ഥിതിയും ഉണ്ടായി. ഇതേ കൂട്ടരാണ് പൗരത്വനിയമത്തിനെതിരെ പള്ളികള്‍ കേന്ദ്രീകരിച്ച് പ്രക്ഷോഭം നടത്തിയവരെ മഹത്വവത്കരിച്ചത്.