ഭാരതത്തിന്റെ അത്ലറ്റ് സ്വപ്നങ്ങള്ക്ക് കരുത്തു പകര്ന്ന പരിശീലകനായിരുന്നു അടുത്തിടെ അന്തരിച്ച ഒതയോത്ത് മാധവന് നമ്പ്യാര്. 1932 ഫെബ്രുവരി 16 ന് കോഴിക്കോട് ജില്ലയിലെ വടകര മണിയൂര് ഗ്രാമത്തിലെ ഒതയോത്ത് തറവാട്ടിലാണ് അദ്ദേഹം ജനിച്ചത്. ഗുരുവായൂരപ്പന് കോളേജിലെ പഠന കാലത്ത് അവിടത്തെ പ്രിന്സിപ്പലിന്റെ ഉപദേശപ്രകാരം സായുധസേനയില് ചേര്ന്നു. 15 വര്ഷത്തോളം ഇന്ത്യന് എയര്ഫോഴ്സില് സേവനം അനുഷ്ഠിച്ചു. 1970 ല് സര്ജന്റായി വിരമിച്ചു. സേനയിലെ ഔദ്യോഗിക ജീവിതത്തിനിടയിലും മികച്ച അത്ലറ്റ് ആയിരുന്നു ഒ.എം നമ്പ്യാര്. സര്വീസസ് കോച്ച് ആയിട്ടായിരുന്നു തുടക്കം. 1971 ല് കേരള സ്പോര്ട്സ് കൗണ്സിലില് ചേര്ന്നു.
1976 ല് കണ്ണൂര് സ്പോര്ട്സ് ഡിവിഷന് രൂപീകരിച്ചപ്പോള് ഒ.എം നമ്പ്യാര് അവിടെത്തെ ആദ്യ പരിശീലകനായി. അവിടെ ആദ്യബാച്ചിലെത്തിയ പി.ടി. ഉഷയെ പയ്യോളി എക്സ്പ്രസാക്കി മാറ്റാന് നമ്പ്യാരിലെ പരിശീലകന് അധികം സമയം വേണ്ടിവന്നില്ല. അദ്ദേഹത്തിന്റെ പരിശീലനത്തിലൂടെ 1986 ലെ ഏഷ്യന് ഗെയിംസില് 200 മീറ്റര്, 400 മീറ്റര് റിലേ എന്നിവയില് പി.ടി ഉഷക്ക് നാല് സ്വര്ണ്ണ മെഡലുകള് നേടിയെടുക്കാന് സാധിച്ചു. 1985 ല് അത്ലറ്റ് കോച്ചുമാര്ക്ക് ദ്രോണാചാര്യ അവാര്ഡ് നല്കാന് തീരുമാനിച്ചപ്പോള് ആദ്യം അവാര്ഡ് ലഭിച്ച മൂന്ന് പേരില് മാധവന് നമ്പ്യാരും ഉണ്ടായിരുന്നു.
അഖിലഭാരതീയ പൂര്വ്വസൈനിക സേവാപരിഷത്തിന്റെ മുന് സംസ്ഥാന രക്ഷാധികാരിയായി മാധവന് നമ്പ്യാര് സേവനം അനുഷ്ഠിച്ചിട്ടുണ്ട്. കോഴിക്കോട് ജില്ലാ സൈനിക സേവാ പരിഷത്തിന്റെ പ്രവര്ത്തനങ്ങളില് സജീവസാന്നിധ്യമായിരുന്നു. പരിഷത്തിന്റെ വിജയവാഡ ആന്ധ്രാപ്രദേശ് ദേശീയ സമ്മേളനത്തില് നിറഞ്ഞു നിന്ന വ്യക്തിത്വമായിരുന്നു അദ്ദേഹം. 2021 ല് ഭാരതസര്ക്കാര് അദ്ദേഹത്തെ പത്മശ്രീ പുരസ്കാരം നല്കി ആദരിച്ചു.
ഭാര്യ: ലീലാ അമ്മ. മക്കള്: പി. മുരളീധരന് (ഇന്ത്യന് റെയില്വേ, കണ്ണൂര്), ഒ. സുരേഷ് ബാബു (ബിസിനസ്, വടകര), ഒ. ദിനേഷ് (സായി തിരുവനന്തപുരം), ഒ. ബിന്ദു.
പത്മശ്രീ ഒ.എം നമ്പ്യാരുടെ വിയോഗം ഭാരതത്തിന്റെ കായിക രംഗത്തിന് തീരാനഷ്ടമാണ്. അദ്ദേഹത്തിന്റെ ഓര്മ്മകള്ക്ക് മുന്നില് ആദരാഞ്ജലികള് അര്പ്പിക്കുന്നു.