പെരിയോരുടെത് വ്യാജപുരസ്‌കാരം

സ്വപ്നസുരേഷിന്റെ വ്യാജബിരുദം പുറത്തായത് സ്വര്‍ണ്ണക്കള്ളക്കടത്ത് വാര്‍ത്തയായപ്പോഴാണ്. വ്യാജബിരുദം കൊണ്ട് താക്കോല്‍ സ്ഥാനങ്ങളിലെത്തപ്പെട്ടവര്‍ പലരുമുണ്ട്. വ്യാജബിരുദങ്ങളും ബഹുമതികളും സംഘടിപ്പിക്കുന്ന ഏര്‍പ്പാട് അടുത്തൊന്നും തുടങ്ങിയതല്ല. നാലുദശാബ്ദം മുമ്പ് ഇത്തരം തട്ടിപ്പു നടത്തിയ ആളാണ് തമിഴ്‌നാട്ടിലെ ദ്രാവിഡവാദത്തിന്റെ തലതൊട്ടപ്പന്‍ പെരിയോര്‍ രാമസ്വാമി നായ്ക്കര്‍. യുനസ്‌കോ പെരിയോര്‍ക്ക് ദക്ഷിണേഷ്യയിലെ സോക്രട്ടീസ് എന്ന ബഹുമതി നല്‍കി എന്നത് വ്യാജമാണെന്ന ചര്‍ച്ച തമിഴ്‌നാട്ടില്‍ ശക്തമായിട്ടുണ്ട്. യുനസ്‌കോ അല്ല തമിഴ്‌നാട്ടിലെ ‘യുനസ്‌കോ മണ്ഡ്രം’ എന്ന പ്രാദേശിക സംഘടനയാണ് ഒരു ഫലകം നല്‍കിയത്. മുന്‍ മുഖ്യമന്ത്രി കരുണാനിധിയും മുന്‍കേന്ദ്രമന്ത്രി ത്രിഗുണസെന്നും ചേര്‍ന്ന് ഈ ഫലകം രാമസ്വാമിയ്ക്ക് സമ്മാനിച്ചു. ഇതാണ് യുനസ്‌കോ ബഹുമതിയായി പ്രചരിപ്പിക്കുന്നത്. ഈ പുരസ്‌കാരത്തെ പുകഴ്ത്തിക്കൊണ്ട് നിരവധി ലേഖനങ്ങള്‍ തമിഴ്പത്രങ്ങളില്‍ വന്നു. ദ്രാവിഡകഴകം ജന.സെക്രട്ടറി വീരമണി ‘തന്തേ പെരിയാര്‍ യുനസ്‌കോയുടെ കണ്ണില്‍’ എന്ന പുസ്തകവും എഴുതി. ഇതൊക്കെ പച്ചക്കള്ളമാണെ ന്നു തെളിയുകയാണ്.

മുരുകനെ അധിക്ഷേപിക്കുന്ന കറുപ്പക്കൂട്ടത്തിന്റെ വീഡിയോ പോസ്റ്റിനെതിരെ തമിഴ്മക്കള്‍ രംഗത്തെത്തിയതോടെ കറുപ്പക്കൂട്ടത്തിന്റെ സംരക്ഷകരായ ദ്രാവിഡ കഴകക്കാര്‍ അങ്കലാപ്പിലാണ്. അതിനുപിന്നാലെയാണ് അവരുടെ ആള്‍ദൈവമായ രാമസ്വാമിയുടെ കപട ബഹുമതിയുടെ പൂച്ച് പുറത്താകുന്നത്. ഹിന്ദുവിരുദ്ധ ദേശവിരുദ്ധ-വികാരം ഇളക്കിവിടാനുള്ള ദ്രാവിഡനേതൃത്വത്തിന്റെ കുതന്ത്രങ്ങള്‍ പാളുകയാണ്.