ശ്രീമദ് ഭാഗവതത്തിലെ
പ്രധാന സ്തുതികള്
വിജയശ്രീ ബാലന് പൂതേരി
പൂതേരി ബുക്സ്, മലപ്പുറം
പേജ്: 88 വില: 70 രൂപ
ശ്രീമദ് ഭാഗവതത്തിലെ പ്രധാനസ്തുതികള് ഒരു ലഘുകൃതിയില് സമാഹരിച്ചിരിക്കുകയാണ് വിജയശ്രീ ബാലന് പൂതേരി. പുരാണങ്ങളില് ശ്രേഷ്ഠമെന്ന് പുകഴ്കൊണ്ട ശ്രീമദ് ഭാഗവതം അസംഖ്യം ശാശ്വത മൂല്യങ്ങള് ഉള്ക്കൊള്ളുന്നതാണ്. ജനമനസ്സുകളെ വിമലീകരിക്കുന്നതിനും ശാന്തിയേകുന്നതിനും ഭാഗവതയജ്ഞങ്ങള് പ്രയോജനപ്പെടുന്നു. ഭാഗവതപുരാണത്തിലെ അമൃതനിഷ്യന്ദികളായ ഭഗവല് സ്തുതികള് നിത്യപാരായണത്തിനനുയോജ്യമാണെന്നു പറയേണ്ടതില്ലല്ലോ. കുന്തീസ്തുതി, ഭീഷ്മസ്തുതി, ശ്രീശുകസ്തുതി തുടങ്ങി പതിനഞ്ചു സ്തുതികള് ഈ ചെറുഗ്രന്ഥത്തിലുണ്ട്. ശ്രീമദ് ഭാഗവതം പ്രഥമ സ്കന്ധത്തില് 8-ാം അദ്ധ്യായത്തിലാണ് കുന്തീസ്തുതിയുള്ളത്. കുരുക്ഷേത്രയുദ്ധം കഴിഞ്ഞ് ദ്വാരകയിലേക്ക് തിരിച്ചുപോകുന്ന ഭഗവാന് ശ്രീകൃഷ്ണനെ പാണ്ഡവ മാതാവായ കുന്തീദേവി സ്തുതിക്കുന്നതാണ് കുന്തീസ്തുതി. ഇത്തരത്തില് സന്ദര്ഭവിവരണത്തോടൊപ്പമാണ് എല്ലാ സ്തുതികളും അവതരിപ്പിച്ചിട്ടുള്ളത്. സ്തുതികള് സംസ്കൃത ശ്ലോകങ്ങളാണ്. അവയ്ക്ക് ലളിതമായി അര്ത്ഥം വിവരിച്ചിട്ടുണ്ട്. ഭാഗവതം വായിക്കുന്നവര്ക്ക് സൂക്ഷിക്കാവുന്ന മികച്ച കൈ പ്പുസ്തകം തന്നെയാണിത്.
ശ്രീദേവി മഹാഭാഗവതം
വിജയശ്രീ ബാലന് പൂതേരി
പൂതേരി ബുക്സ്
മലപ്പുറം
പേജ്: 272 വില: 200 രൂപ
ജഗദംബികയായ ദേവിയെക്കുറിച്ചുള്ള പുരാണമാണ് ശ്രീദേവി മഹാഭാഗവതം. നൈമിശാരണ്യത്തില് വച്ച് ശുനകാദി മഹര്ഷിമാരുടെ ആവശ്യപ്രകാരം സൂതന് വിവരിച്ച ദേവീ ഭാഗവതകഥകള് കേള്ക്കുന്നതും പാരായണം ചെയ്യുന്നതും പുണ്യകരമാണെന്നു വിശ്വസിക്കപ്പെടുന്നു. പവിത്രമായ ആ കഥകള് ‘ശ്രീദേവി മഹാഭാഗവതം’ എന്ന ഗ്രന്ഥത്തില് വിജയശ്രീ ബാലന് പൂതേരി ലളിതമായ ഗദ്യത്തില് അവതരിപ്പിച്ചിരിക്കുന്നു. പന്ത്രണ്ടദ്ധ്യായമാണീ കൃതിക്കുള്ളത്. മറ്റു പുരാണങ്ങളില് നിന്ന് നാം വായിച്ചറിഞ്ഞ ചില കഥകളും ഈ കൃതിയിലുണ്ട്. ഭീഷ്മപ്രതിജ്ഞ, കൗരവരും പാണ്ഡവരും, സര്പ്പസത്രം, സത്യവാന് സാവിത്രി തുടങ്ങിയവ അത്തരത്തിലുളളവയാണ്. ഗായത്രീസാധന, സന്ധ്യാപൂജ, ജപഫലങ്ങള്, ദിനചര്യ, പ്രാണായാമം, രുദ്രാക്ഷമാഹാത്മ്യം തുടങ്ങിയവയും ഈ ഗ്രന്ഥത്തില് വിവരിക്കുന്നു. സാധകര്ക്കാവും ഇവ ഏറെ പ്രയോജനപ്പെടുന്നത്. ശ്രീ കൃഷ്ണ ലീലകള്, കൃഷ്ണന്റെ വരലാഭം എന്നിങ്ങനെ കൃഷ്ണകഥകളും, ദക്ഷയാഗം, പാര്വ്വതീജനനം തുടങ്ങി ശിവകഥകളും ഈ കൃതിയില് കാണാം. തികഞ്ഞ പാരായണക്ഷമതയുള്ള ഈ കൃതി ആദ്ധ്യാത്മിക സാ ഹിത്യശാഖയ്ക്ക് ഒരു മുതല്ക്കൂട്ട്തന്നെയാണെന്നു സംശയിക്കാതെ പറയാം.
തളിക്ഷേത്രവും ഹൈന്ദവ
നവോത്ഥാനവും
വിജയശ്രീ ബാലന് പൂതേരി
പൂതേരി ബുക്സ്, മലപ്പുറം
പേജ്: 168 വില: 100 രൂപ
കേരളത്തിലെ പ്രത്യേകിച്ച് മലബാറിലെ ഹൈന്ദവ ജനതയുടെ നവോത്ഥാനത്തിന് പ്രചോദനമേകിയ ഒന്നാണ് അങ്ങാടിപ്പുറം തളിമഹാദേവക്ഷേത്ര സമരം. പ്രസ്തുത സമരത്തെ ആസ്പദമാക്കി വിജയശ്രീ ബാലന് പൂതേരി രചിച്ച കൃതിയാണ് ‘തളിക്ഷേത്രവും ഹൈന്ദവ നവോത്ഥാനവും’. ടിപ്പുവിന്റെ പടയോട്ടക്കാലത്ത് തകര്ക്കപ്പെട്ട ക്ഷേത്രങ്ങളില് ഒന്നാണ് അങ്ങാടിപ്പുറം തളിമഹാദേവക്ഷേത്രം. ഈ ക്ഷേത്രത്തിന്റെ പുനരുദ്ധാരണത്തിന് ഹൈന്ദവ ജനത ഒരുങ്ങിയവേളയില് നേരിടേണ്ടി വന്നത് ശക്തമായ വെല്ലുവിളികളാണ്. അവയെ അതിജീവിച്ചുകൊണ്ട് ഹിന്ദുക്കള് ആരാധനാസ്വാതന്ത്ര്യം നേടിയെടുത്ത്, മഹത്തായ തളി മഹാദേവക്ഷേത്രം പുനരുദ്ധരിച്ചു. അതിന്റെ വിശദമായ ചരിത്രമാണീ കൃതിയിലെ മുപ്പത്തിരണ്ടദ്ധ്യായത്തിലുള്ളത്. ഐതിഹാസികമായ തളി സമരത്തിലെ നിരോധനാജ്ഞ, അറസ്റ്റ്, സത്യഗ്രഹസമരം എല്ലാം വിശദമായി ഈ കൃതിയില് പ്രതിപാദിക്കുന്നു. കേളപ്പജിയുടെ നേതൃത്വത്തിലാണ് തളി സമരം നടന്നത്. സി.പി.ജനാര്ദ്ദനന്, മാധവ്ജി, പി.വാസുദേവന് തുടങ്ങിയവരുടെ ശക്തമായ പ്രവര്ത്തനങ്ങളുമുണ്ടായിരുന്നു. തളിക്ഷേത്ര സമരം ഹൈന്ദവര്ക്കിടയില് ഉത്സാഹവും ഉണര്വ്വും ആത്മധൈര്യവും പ്രദാനം ചെയ്തുവെന്ന വസ്തുത എടുത്തു പറയേണ്ടതാണെന്ന് ഗ്രന്ഥകാരന് സൂചിപ്പിക്കുന്നു.