രാഷ്ട്രസേവാ, രാഘവീയം  മാധ്യമ പുരസ്‌കാരങ്ങള്‍ പ്രഖ്യാപിച്ചു

കോഴിക്കോട്: മാധ്യമ മേഖലയിലെ സമഗ്രസംഭാവന  പരിഗണിച്ച് ‘കേസരി’ വാരികയും ഹിന്ദുസ്ഥാന്‍ പ്രകാശന്‍ ട്രസ്റ്റും സംയുക്തമായി നല്‍കുന്ന 2023 ലെ ‘രാഷ്ട്രസേവാ’ പുരസ്‌കാരത്തിന് ജന്മഭൂമി ന്യൂസ് എഡിറ്ററും ഗ്രന്ഥകാരനുമായ മുരളി പാറപ്പുറം അര്‍ഹനായി. അമ്പതിനായിരം രൂപയും ശില്‍പ്പവും അടങ്ങുന്നതാണ് പുരസ്‌കാരം.

യുവ മാധ്യമപ്രവര്‍ത്തകര്‍ക്കുള്ള ‘രാഘവീയം’ പുരസ്‌കാരത്തിന് മാതൃഭൂമി ഓണ്‍ലൈന്‍ എഡിഷനിലെ കണ്ടന്റ് റൈറ്റര്‍ അമൃത എ.യു അര്‍ഹയായി. വനവാസി മേഖലയിലെ പാരമ്പര്യ കൃഷിയുടെ തിരിച്ചുവരവിനെ അടിസ്ഥാനമാക്കി തയ്യാറാക്കിയ ‘കാളിയമ്മയുടെ കഥ’ എന്ന ഫീച്ചറാണ് പുരസ്‌കാരത്തിന് അര്‍ഹമായത്. ഇരുപത്തയ്യായിരം രൂപയും ശില്പവും അടങ്ങുന്നതാണ് പുരസ്‌കാരം. പ്രമുഖ പത്രപ്രവര്‍ത്തകരായ പി.രാജന്‍, എം.രാജശേഖര പണിക്കര്‍, പി.ബാലകൃഷ്ണന്‍, എം.സുധീന്ദ്രകുമാര്‍ എന്നിവരടങ്ങുന്ന പുരസ്‌കാര നിര്‍ണ്ണയ സമിതിയാണ് ജേതാക്കളെ തിരഞ്ഞെടുത്തത്.