കോഴിക്കോട് ജില്ലയിലെ ഉള്ളിയേരിയില് രാഷ്ട്രീയ സ്വയംസേവക സംഘത്തിന്റെ പ്രവര്ത്തനമാരംഭിച്ച കാലത്ത് ബാലസ്വയംസേവകനായിരുന്ന പത്മനാഭന് പിന്നീട് വളര്ന്ന് എഞ്ചിനീയറായപ്പോള് സംഘപ്രവര്ത്തകര്ക്കു മാത്രമല്ല, നാട്ടിലെ നാനാജാതി മതവിഭാഗക്കാര്ക്കെല്ലാം ആശ്രയവും വഴികാട്ടിയുമായ നുരമ്പാട്ട് പത്മനാഭന് നമ്പ്യാരായി മാറി. ഇക്കഴിഞ്ഞ ഒക്ടോബര് 31ന് അദ്ദേഹം ഇഹലോകവാസം വെടിഞ്ഞു. യാദവറാവു ജോഷി, ആര്.ഹരി, പി.പരമേശ്വരന്, ദേവകിയമ്മ, വിനോദിനിയമ്മ തുടങ്ങിയ ആര്.എസ്.എസ്. ജനസംഘം നേതാക്കള്ക്കെല്ലാം ആതിഥ്യമരുളിയ വീടായിരുന്നു നൊരമ്പാട്ട്. ഈ കാര്യകര്ത്താക്കളെ അടുത്തറിയാന് ചെറുപ്പത്തില് തന്നെ പത്മനാഭന്നമ്പ്യാര്ക്ക് ഭാഗ്യമുണ്ടായി. പിന്നീട് ബാലുശ്ശേരി, നന്മണ്ട തുടങ്ങി സ്ഥലങ്ങളില് ശാഖയെടുക്കാന് നടന്നു പോയിട്ടുണ്ട്.
സാമ്പത്തിക കഷ്ടപ്പാടുകള്ക്കിടയിലും പഠനംപൂര്ത്തിയാക്കി പിഡബ്ല്യുഡി വകുപ്പില് എഞ്ചിനീയറായി ജോലി ചെയ്യുമ്പോഴും സംഘപ്രവര്ത്തകരുടെ അത്താണിയായി നിലകൊണ്ടു. അടിയന്തരാവസ്ഥയില് ഒളിവില് കഴിഞ്ഞിരുന്ന സംഘകാര്യകര്ത്താക്കള്ക്ക് ആശ്രയമായിരുന്നു അദ്ദേഹത്തിന്റെ വീട്. അയോദ്ധ്യാ കര്സേവാ വേളയില് ഉള്ളിയേരിയില് നിന്നും കര്സേവയ്ക്കു പോയവര്ക്ക് എല്ലാസഹായവും ചെയ്തു കൊടുത്തതും അദ്ദേഹമായിരുന്നു. ഉള്ളിയേരി 19-ലെ മരുതൂര് ക്ഷേത്രത്തിന്റെ പുനരുദ്ധാരണത്തിനു നേതൃത്വം നല്കി. ക്ഷേത്രകമ്മറ്റി പ്രസിഡണ്ടായും പ്രവര്ത്തിച്ചു. വിദ്യാനികേതന് വിദ്യാലയം ഉള്ളിയേരിയില് ആരംഭിക്കാന് തീരുമാനിച്ചതു മുതല് അതിന്റെ കെട്ടിടനിര്മ്മാണമുള്പ്പെടെയുള്ള കാര്യങ്ങള്ക്ക് ചുക്കാന് പിടിച്ചതും അദ്ദേഹമാണ്. ഇതിനായുള്ള ശ്രീവ്യാസ എഡുക്കേഷണല് ട്രസ്റ്റിന്റെ അധ്യക്ഷനായിരുന്നു. അദ്ദേഹത്തിന്റെ മരണവിവരമറിഞ്ഞ് വീട്ടിലെത്തിയ ഒരു മുസ്ലീം സുഹൃത്ത് പറഞ്ഞത് ‘ഞങ്ങള്ക്ക് പള്ളി ഉണ്ടാക്കിത്തന്നയാളാണ് അദ്ദേഹം’ എന്നാണ്. ചുരുങ്ങിയ സ്ഥലത്തു സൗകര്യപ്രദമായ വിധം പള്ളിയ്ക്ക് പ്ലാന് വരച്ചു നല്കിയത് അദ്ദേഹമായിരുന്നു.
പെരുമാറ്റംകൊണ്ടും സഹായസഹകരണംകൊണ്ടും മറ്റുള്ളവരുടെയെല്ലാം ആദരവു പിടിച്ചുപറ്റുകയും അവര്ക്ക് സ്വീകാര്യനാവുകയും ചെയ്ത പത്മനാഭന് നമ്പ്യാര് ഉള്ളിയേരിയിലെ ഹൈന്ദവ പ്രവര്ത്തനങ്ങളുടെ അത്താണിയായിരുന്നു. ഭാര്യ: സരള. മക്കള്: സ്വപ്ന, സുനില്, സഹോദരങ്ങള്: അപ്പുണി നമ്പ്യാര്, രാധ (ശ്രീമതി), ചന്ദ്രശേഖരന്, പരേതനായ ബാലകൃഷ്ണന്.