കാവ്യസപര്യയും ചെറുകഥകളും

വിഷ്ണു നാരായണന്‍ നമ്പൂതിരി
കവിതയുടെ മേല്‍ശാന്തി
കെ.കെ. പല്ലശ്ശന
എച്ച് ആന്റ് സി ബുക്‌സ്, തൃശ്ശൂര്‍
പേജ്: 88 വില: 100 രൂപ

ഭാരതീയ ദര്‍ശനങ്ങളെയും അതില്‍ അന്തര്‍ഗതമായ ധര്‍മ്മചിന്തയെയും കവിതയിലേക്കും ജീവിതത്തിലേക്കും ഒരുപോലെ ആവാഹിച്ച വ്യക്തിയാണ് വിഷ്ണു നാരായണന്‍ നമ്പൂതിരി. ഋഷിപ്രോക്തമായ ഭാരതീയ ചിന്താധാരയെ അദ്ദേഹം കവിതയിലൂടെ നവീനമായി പുനരാവിഷ്‌കരിക്കാന്‍ ശ്രമിച്ചു. വിഷ്ണു നാരായണന്‍ നമ്പൂതിരിയുടെ കവിതയിലേക്കും ജീവിതത്തിലേക്കുമുള്ള ഒരു തിരനോട്ടമാണ് കെ.കെ. പല്ലശ്ശന രചിച്ച ‘വിഷ്ണു നാരായണന്‍ നമ്പൂതിരി കവിതയുടെ മേല്‍ശാന്തി’ എന്ന പുസ്തകം.

സര്‍ഗ്ഗചേതനയുടെ ഗിരിശൃംഗങ്ങളിലേക്ക് എന്നും ഒരു തീര്‍ത്ഥാടകനായി കടന്നു ചെന്ന കവിയുടെ ജീവിതപന്ഥാവുകള്‍ പുസ്തകത്തില്‍ മനോഹരമായി എടുത്തു കാണിച്ചിട്ടുണ്ട്. കാളിദാസന്‍ മുതല്‍ യേറ്റ്‌സ് വരെയുള്ള കവികള്‍ വിഷ്ണു നാരായണന്‍ നമ്പൂതിരിയുടെ കാവ്യ ജീവിതത്തെ എങ്ങനെ സ്വാധീനിച്ചു എന്നതിന്റെ സൂചനകളും ഗ്രന്ഥകാരന്‍ അന്വേഷണാത്മകമായി നിരത്തിയിട്ടുണ്ട്. കാവ്യദേവതയെ നിത്യോപാസന ചെയ്ത ഒരു ഋഷികവിയുടെ കാല്പാടുകള്‍ തേടിയുള്ള യാത്രയാണ് ഈ ലഘുപുസ്തകം. വിഷ്ണു നാരായണന്‍ നമ്പൂതിരിയുടെ മകളായ ഡോ.അദിതി എഴുതിയ ഹൃദ്യമായ അവതാരിക ഈ പുസ്തകത്തിന് തിലകം ചാര്‍ത്തുന്നു.

കാവ്യപൗര്‍ണമി
ഡോ. ആര്‍.അശ്വതി
പൂര്‍ണ പബ്ലിക്കേഷന്‍സ്
കോഴിക്കോട്
പേജ്: 152 വില: 175

അനേകം കവികള്‍ നക്ഷത്രങ്ങളായി തിളങ്ങി നില്‍ക്കുന്ന കാവ്യനഭസ്സിലെ നിത്യപൗര്‍ണമിയായിരുന്നു എസ്.രമേശന്‍ നായര്‍. അളകനന്ദ മുതല്‍ അഗ്രേപശ്യാമി വരെയുള്ള കവിതയുടെ അവില്‍പ്പൊതികളെല്ലാം കൃഷ്ണാര്‍പ്പണമായി സമര്‍പ്പിച്ച രമേശന്‍ നായരുടെ കാവ്യപ്രപഞ്ചത്തെക്കുറിച്ച് ഡോ.ആര്‍. അശ്വതി നടത്തിയ പഠനഗ്രന്ഥമാണ് ‘കാവ്യപൗര്‍ണമി.’ പതിനാറ് അദ്ധ്യായങ്ങളിലായി കേസരി വാരികയില്‍ പ്രസിദ്ധീകരിച്ച ഈ പഠനം രമേശന്‍ നായരുടെ കാവ്യജീവിതത്തെ ആധികാരികമായി പഠന വിധേയമാക്കിയിരിക്കുന്നു.
ഗുരുപൗര്‍ണമി, കസ്തൂരിഗന്ധി, ജന്മപുരാണം, സ്വാതിമേഘം, സരയൂതീര്‍ത്ഥം, ഗ്രാമക്കുയില്‍ തുടങ്ങി രമേശന്‍ നായരുടെ പന്ത്രണ്ട് കാവ്യ സമാഹാരങ്ങളെയാണ് പുസ്തകത്തില്‍ വിശദമായ ചര്‍ച്ചയ്ക്ക് വിഷയമാക്കിയിരിക്കുന്നത്. രമേശന്‍ നായരുടെ കവിതകള്‍ വര്‍ത്തമാനകാല സമസ്യകള്‍ക്ക് ദിവ്യമായ ആത്മീയൗഷധം കല്പിക്കുന്ന കാവ്യമൃതസഞ്ജീവനിയാണെന്ന് എഴുത്തുകാരി ഈ പുസ്തകത്തിലൂടെ അടയാളപ്പെടുത്തുന്നു. ശ്രദ്ധേയമായ അവതാരിക കൊണ്ട് കവിയും ഗാനരചയിതാവുമായ ശ്രീകുമാരന്‍ തമ്പി ഈ പുസ്തകത്തെ അനുഗ്രഹിച്ചിരിക്കുന്നു.

പുലിയന്‍കുന്ന്
വള്ളുവനാടന്‍ കഥകള്‍
രജനി സുരേഷ്
പൂര്‍ണ പബ്ലിക്കേഷന്‍സ്
കോഴിക്കോട്
പേജ്: 108 വില : 120 രൂപ

വള്ളുവനാടിന്റെ സവിശേഷമായ ഭൂപ്രകൃതിയും ഭാഷാശൈലികളും അക്ഷരങ്ങളില്‍ ചാലിച്ചെടുത്ത് രജനി സുരേഷ് രചിച്ച ചെറുകഥകളുടെ സമാഹാരമാണ് ‘പുലിയന്‍കുന്ന്’. വള്ളുവനാടന്‍ പശ്ചാത്തലത്തിലുള്ള പതിനെട്ട് കഥകളുള്‍ക്കൊള്ളുന്ന ഈ സമാഹാരം ഒരു നാടിന്റെ പൈതൃകത്തിലൂടെയുള്ള സാംസ്‌കാരിക യാത്ര കൂടിയാണ്. ‘ഭാരതീയ ഭാവനകളിലും മൂല്യബോധത്തിലും അക്ഷരപുഷ്പാര്‍ച്ചന നടത്തുന്ന, സാംസ്‌കാരിക നവോത്ഥാനപ്രക്രിയയെ സ്വാഗതം ചെയ്യുന്ന ജീവിതഗന്ധമുള്ള കഥകളാണ്’ കഥാകാരിയെ വേറിട്ടു നിര്‍ത്തുന്നതെന്ന് അവതാരികയില്‍ ഡോ.കെ. ശ്രീകുമാര്‍ അഭിപ്രായപ്പെടുന്നു. ‘വള്ളുവനാടന്‍ സ്വത്വത്തിന്റെ അലകും പിടിയുമായ പ്രതിരൂപങ്ങള്‍ ഉയിര്‍ക്കുന്ന അനുഭൂതി ഹൃദ്യമാണെന്നും തെളിഞ്ഞ ഭാഷയുടെ സുഖം ഈ എഴുത്തിനുണ്ടെന്നും’ പ്രശസ്ത സാഹിത്യകാരനായ സി. രാധാകൃഷ്ണന്‍ അഭിപ്രായപ്പെടുന്നു.