ഈ ഗുലാംനബി ആസാദിന് എന്തുപറ്റി? ഈ പഹയനും ‘മോദിഫാന്’ ആയി മാറിയോ? രാജ്യസഭയിലെ അദ്ദേഹത്തിന്റെ വിടവാങ്ങല് പ്രസംഗം കേട്ട് ഇസ്ലാമിസ്റ്റുകള് മാത്രമല്ല സ്വന്തം പാര്ട്ടിയായ കോണ്ഗ്രസ്സിലെ നേതാക്കള് പോലും ഞെട്ടിപ്പോയി. മോദി ഭരണത്തില് മുസ്ലിങ്ങളെ നിരന്തരം പീഡിപ്പിക്കുകയാണെന്നും അവര്ക്കിവിടെ ജീവിക്കാന് പറ്റാതായിരിക്കുന്നു എന്നുമല്ലേ കോണ്ഗ്രസ് നേതാക്കളും കമ്മ്യൂണിസ്റ്റു കൂലി പ്രസംഗകരുംവരെ ഒരേ രാഗത്തില് പാടിക്കൊണ്ടിരിക്കുന്നത്. അതിനിടയ്ക്കാണ് രാജ്യസഭയ്ക്കകത്തുവെച്ച് ഗുലാംനബി ആസാദ് വിതുമ്പിക്കൊണ്ട് പറയുന്നത് താന് ഒരു ഹിന്ദുസ്ഥാനി മുസ്ലിമാണെന്ന്. മാത്രമോ, ‘ലോകത്തിലെ ഏതെങ്കിലും മുസ്ലിമിന് അഭിമാനം തോന്നണമെങ്കില് അതു ഹിന്ദുസ്ഥാനിലെ മുസ്ലിമിനു മാത്രമായിരിക്കണം’ എന്നു കൂടി അദ്ദേഹം പറഞ്ഞിരിക്കയാണ്. ഹിന്ദുക്കളോ ക്രിസ്ത്യാനികളോ ഇല്ലാത്ത അഫ്ഗാനിസ്ഥാനിലും ഇറാനിലും മുസ്ലീങ്ങള് തമ്മില് പ്രശ്നമാണെന്നും അദ്ദേഹം പറഞ്ഞു. ‘അയല്രാജ്യങ്ങളിലെ തിന്മകളില് നിന്ന് സുരക്ഷിതരാണ് തങ്ങളെന്നതില് ഇന്ത്യയിലെ മുസ്ലിമിനു സ്വയം അഭിമാനം തോന്നണം’ എന്ന ഉപദേശവും അദ്ദേഹം ഇവിടെത്തെ മുസ്ലിങ്ങള്ക്ക് നല്കിയിട്ടുണ്ട്.
ഇവിടെ തങ്ങളുടെ മതവിശ്വാസം സുരക്ഷിതമല്ലെന്നു പറഞ്ഞുകൊണ്ടു ചിലര് ആടുമേയ്ക്കാന് സിറിയയിലേയ്ക്ക് പോയിരുന്നു. അവരുടെ മൃതദേഹം പോലും ബന്ധുക്കള്ക്ക് കണികാണാനായിട്ടില്ല. പോയവരില് ബാക്കിയായവര് അഫ്ഘാന് ജയിലിലുമാണ്. എന്നാലും ഇന്ത്യയെ മുസ്ലിങ്ങള്ക്കുപോലും രക്ഷയില്ലാത്ത പാകിസ്ഥാനും അഫ്ഘാനിസ്ഥാനുമാക്കിയാലേ അടങ്ങിയിരിക്കൂ എന്ന വാശിയിലാണ് ഇസ്ലാമിസ്റ്റുകള്. അവര്ക്ക് ചൂട്ടുപിടിക്കാന് കോണ്ഗ്രസ്സുകാരും കമ്മ്യൂണിസ്റ്റുകാരും ഒരുളുപ്പുമില്ലാതെ തയ്യാറാവുകയും ചെയ്യുന്നു. ദേശീയ മുസ്ലീം എന്ന വര്ഗ്ഗം ഈ രാജ്യത്ത് കുറ്റിയറ്റുപോകുമ്പോഴാണ് ഗുലാം നബി ആസാദില് നിന്ന് ഇങ്ങനെയൊരു വേറിട്ട ശബ്ദം ഉയരുന്നത്. അദ്ദേഹത്തെ ബി.ജെ.പിയായി മുദ്രകുത്താന് ശ്രമം തുടങ്ങിക്കഴിഞ്ഞു.